Mundaı óreskel oqıǵa shaǵyn qalada sırek bolady. Sondyqtan ol jerge birneshe adamdyq tergeý toby 2-3 mashınamen barlyq dabyldaryn sarnatyp jetedi. Aýlada júrgen turǵyndar túgili odan kóshede ketip bara jatqan qalalyqtar da shoshynyp, úrkip qalady. «Eki birdeı adam ólip jatqan» úıdiń esigi biteýli bolady. Polısııa ony buzyp kirse, eshqandaı máıit joq, úı bos tur eken. Kórshilerinen anyqtaǵanda úı ıesi saıajaıǵa, áıeli dúkenge ketken bolyp shyǵady. Polısııa olardyń oralýyn tosyp, tiri bolǵandaryna kózderin jetkizgen soń dabyldyń jalǵan ekendigin habarlaıdy.
Qazirgi zamanda daýystyń dirili men yrǵaǵynan-aq telefon soǵýshynyń kim ekendigi op-ońaı anyqtalady ǵoı. Sóıtip, 43 jasta bolsa da araqtyń álegimen aqymaqtyq qylǵan erkek qolǵa túsedi. «Endi oǵan 80 myń teńgege deıin aıyppul salynýy múmkin. Qazir istiń materıaldary sotqa daıyndalýda», deıdi qalalyq polısııanyń birinshi bóliminiń bastyǵy, podpolkovnık Balabek Jahın.
Jyl basynan beri Petropavlda arnaýly qyzmetterge osyndaı 95 jalǵan dabyl túsken eken. Olardyń kóbi anyqtalyp, 30 AEK kóleminde aıyppul tólegen.
PETROPAVL
