Aımaqtar • 16 Mamyr, 2020

Shyǵys Qazaqstan: Asqar Mamın Abaıdyń 175 jyldyǵyna daıyndyq barysymen tanysty

50 ret kórsetildi

Abaı alańynda aýqymdy jóndeý jumystary bastalǵan.

Premer-Mınıstr Semeı qalasynyń áleýmettik-ekonomıkalyq damýymen tanysty jáne Abaı Qunanbaıulynyń aldaǵy mereıtoıyna daıyndyq júrip jatqan nysandardy aralap kórdi. Bul týraly Semeı aqparattyq ortalyǵy habarlady.

Qazir qaladaǵy Abaı alańynda aýqymdy jóndeý jumystary bastalǵan. Alańnyń beınesi tolyǵymen ózgeredi. Joba boıynsha bordıýrlerdi jańartý, oıshyldyń qurmetine arnalǵan eskertkishti jaryqtandyrý qarastyrylǵan. Sport jáne balalar alańdary, avtokólikterge arnalǵan turaq, sýburqaq salynady. Merdiger «Fırma Azııa» JShS barlyq jumystar shilde aıyna deıin aıaqtalatynyn aıtady.

Abaı teatry Abaı Qunanbaevtyń 175 jyldyq mereıtoıyna daıyndyq jumystaryn júrgizýde. Jóndeýge byltyr qarjy bólingen. Abaıdyń 175 jyldyǵyna oraı eń mańyzdy is-sharalar Semeı teatrynda ótedi.

Teatrdyń ishi de ózgeredi. Ekinshi qabattyń foıesi basqasha kórinip, kórermender zaly da ózgeredi. Abaı mereıtoıyna oraı teatr ártisteri jańartylǵan sahnaǵa shyǵatyn bolady. Qazirgi ýaqytta jumysshylar jańa jabyndy ornatýda. Daıyndyq bólmelerinde de, ákimshilik qanatynda da jóndeý jumystary bastaldy.

Úkimet basshysy Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-murajaıyna da bardy. Asqar Mamın Qaraǵaıly yqshamaýdanynda júrip jatqan jumystarmen de tanysyp shyqty. Aýdannyń jalpy kólemi - 203 ga. Turǵyn úı qory 787,7 myń sharshy metrdi quraıdy. Búgingi kúni shaǵyn aýdanda 25 000-nan astam adam turady. 720 oqýshyǵa arnalǵan fızıka-matematıka baǵytyndaǵy Nazarbaev Zııatkerlik mektebi salyndy. Memlekettik-jeke menshik seriktestik aıasynda 320 oryndyq balabaqsha boı kóterdi.

Qaraǵaıly shaǵyn aýdanynda búgingi kúni jalpy aýdany 111,965 myń sh. m. 20 úı paıdalanýǵa berildi. 2019 jyly jalpy aýdany 95,883 myń sharshy metr 1269 páter bolatyn 18 úıdiń qurylysy bastaldy.

Asqar Mamın shaǵyn aýdanda salynyp jatqan segiz úıdiń qurylys barysymen tanysty. Sondaı-aq, munda úsh mektep, alty balabaqsha, muz modýliniń jáne ońaltý ortalyǵynyń qurylysy qarastyrylǵan. Premer-mınıstr Qaraǵaıly shaǵyn aýdanyndaǵy biregeı sport kesheninde bolyp, bul qazaqstandyqtardyń bos ýaqytyn tıimdi ótkizýge qajetti nysandar ekenin atap ótti. Sport kesheniniń qurylysy 2017 jyly bastaldy. Aýqymdy mádenı-sporttyq sharalardy ótkizý josparlanǵan úlken zal bes myń orynǵa eseptelgen.

Barlyq halyqaralyq standarttar boıynsha salynǵan keshen sporttyń ár túri boıynsha jarystar ótkizýge múmkindik beredi. Basseın týrnırler, júzý, akvaaerobıka, sý doby jáne sýǵa sekirý, halyqtyń saýyqtyrý júzýine arnalǵan. Sport ǵımaratynyń jalpy aýdany 33,8 myń sharshy metrdi quraıdy. Iri keshenniń qurylysyn otandyq kompanııa "Fırma Azııa"JShS júzege asyrdy. Jobanyń jalpy quny 26 mıllıard teńge.

Úkimet basshysy Semeı qalasynda Abaı Qunanbaevtyń 175 jyldyǵyna arnalǵan is-sharalarǵa alys jáne jaqyn shetelderden kelgen qonaqtar kóp bolatynyn atap ótti.

SEMEI

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar