Pavlodar qalasynyń ákimi Qaırat Núkenov «jumyspen qamtýdyń jol kartasy» aıasynda 5 myń adamdy juyspen qamtý josparlanǵanyn atap ótti.
-Baǵdarlama aıasynda bizdiń ákimdikke qarasty 39 joba júzege asyrylady, - dedi Qaırat Núkenov.
–Bul jobalarǵa 10 mıllıard teńge bólingen. 5 myńnan astam adamdy jumyspen qamtý josparlanǵan.
Eń iri joba – Jetekshi aýylyndaǵy mekteptiń jumysyna 300 adam tartylady. Moıyldy mektebiniń jumysynda 100 oryn bar. Sondaı-aq balabaqshalar jóndelip, joldarǵa asfalt tóseledi. Baǵdarlama aıasynda jumyspen qamtý ortalyǵyndaǵy jumyssyz retinde tirkelgen azamattar jumyspen qamtylady. Jas erekshelikterine shekteý joq. Qala ákiminiń aıtýynsha, «jumyspen qamtýdyń jol kartasy» aıasynda jumys jasaıtyndardyń ortasha jalaqysy 80-150 myń teńge aralyǵynda bolady. Sonymen qatar, Qaırat Núkenov bıyl qalada 101 oıyn alańy ornatylyp, 101 aýlada kólik turaqtary keńeıtilip, 101 aýla jaryqtandyrylatynyn aıtty.
-Qalamyzda 1380 kópqabatty úı, 600 aýla bar. Bıyl 101 aýlany jaryqtandyrsaq, jalpy jaryqtandyrý máselesi sheshilip qalýy tıis. Jaryqtandyrylmaǵan 10 paıyz aýla qalýy múmkin, - dedi shahar basshysy. Atalǵan jobalardyń biri oblys ortalyǵyndaǵy №39 mekteptiń jóndeý jumystary. Oǵan 146 mln teńge bólingen. Jóndeýdi júzege asyratyn negizgi merdiger «Vershına» kompanııasy bolsa, qosalqy merdiger – «Kommýntrans LTD» JShS.
-Baǵdarlama aıasynda jumyssyz bolǵan 16 adamdy jumyspen qamtydyq, - dedi «Kommýntrans LTD» JShS dırektory Arman Aǵybaev.
–Olardyń kóbi jastar. Jalaqylary 85 myń teńgeden kem bolmaıdy. Mamandyqtaryna qaraı tólenedi. Bul mekteptiń jalpy aýmaǵy 9 myń sharshy metrden asady. Ondaǵy qurylys ǵımarattarynyń aýmaǵy 3909 sharshy metr. Osy 3909 sharshy metr aýmaqta kúrdeli jóndeý jasalady.
Onyń ishinde atap ótetin basseın bar. Basseın tolyq jóndeýden ótedi. Onyń shomylý aýmaǵy 190 sharshy metr. Oǵan qosa, mekteptiń tóbesi, qasbeti, qos sport zaly sııaqty ǵımaratty tolyqtaı jóndeýden ótkizemiz.
