Jýyrda Soltústik Qazaqstan oblysyndaǵy JShS-lardyń biriniń basshysy egiske daıyndap qoıǵan quny 900 myń teńge turatyn gerbısıdiniń qoldy bolǵanyn aıtyp, polısııaǵa shaǵym túsirgen.
Urylar qoımada turǵan 225 lıtr (erite kele ol birneshe myń gektarǵa jetedi) gerbısıdti qoldy qylǵan. Qylmysty ashýǵa aýdandyq qana emes, oblystyq PD mamandary da tartylady. Kúdik osy JShS-da byltyr jumys istegen, buryn sottalǵan, 1970 jáne 1986 jyldary týǵan Petropavldyń eki turǵynyna túsedi. Aqyry olardyń úılerin teksergende urlanǵan gerbısıd tabylyp, tolyǵymen ıesine qaıtaryldy.
Qazir urylar ýaqytsha ustaý oqshaýlaǵyshyna qamalyp, ústerinen Qylmystyq kodekstiń «Urlyq» atty 188-shi baby boıynsha qylmystyq is qozǵalǵan. «Biz kóktemgi egiske daıyndyq júrgizile bastaǵan 27 sáýirden beri «Astyq» atty aldyn alý sharalaryn júrgizýdemiz. Osy sharanyń sheńberinde krımınaldyq polısııanyń barlyq bólimsheleri tuqym, gerbısıd, janar-jaǵar maı jáne qosalqy bólshekterdiń urlyǵyna qarsy áreket etýde. Egis pen astyq jınaý naýqandarynda agrarııler ózderiniń múddelerin qorǵaýǵa aıryqsha zárý. Biz olardy qoldaýǵa árqashan daıyn bolýymyz kerek», deıdi oblystyq PD Krımınaldyq polısııa basqarmasynyń bastyǵy, polkovnık Petr Klımov.
Bıyl aýylsharýashylyǵy taýar óndirýshileriniń menshigine qarsy 5 qylmys jasalǵan eken, búgingi tańǵa deıin sonyń 4-ýi ashylǵan.
Soltústik Qazaqstan oblysy
