Reseı Federasııasynan ákelinetin benzın kóleminiń qysqarýyna baılanysty Qazaqstan naryǵynda benzın baǵasy kúrt qymbattap ketýi múmkin.
Bul týraly jýrnalısterge bergen suhbatynda Munaı jáne gaz mınıstri Uzaqbaı Qarabalın málimdedi.
«Qazaqstan Reseıden joǵary oktandy benzındi belgili bir mólsherde udaıy ımporttap otyratyny belgili. Sebebi, bizdiń zaýyttar ishki naryqty benzınniń mundaı túrlerimen qamtamasyz ete almaıdy», - dedi U.Qarabalın.
Onyń aıtýynsha, Reseıden jylyna 800-900 myń tonna benzın ımporttalady.
«Qazan aıynda Omby, Ýfa qalalaryndaǵy iri zaýyttar josparly túrdegi jóndeý jumystarynan ótedi dep josparlanýda. Osyǵan oraı, Reseıden ákelinetin munaı ónimderiniń mólsheri azaıady. Bul – ýaqytsha qubylys, desek te, bul jaıt Qazaqstandaǵy benzın baǵasyna áser etetin bolady», - dedi mınıstr.
Uzaqbaı Qarabalın Qazaqstan naryǵynda benzınniń baǵasy ósýi múmkin degen boljam aıtty.
«Qazir sizge naqty aıta almaımyn, biraq 5-7 paıyzdan aspaıdy dep boljap otyrmyz», - dep oıyn túıindedi ol.
Sáken Maılybaı.
