Alaıda ókinishke qaraı daıyn jumystan bas tartyp, eńbek etýge qulyqsyz jandar da kezdesedi. Qazirdiń ózinde 200-ge jýyq jumysshy mamandyǵyna suranys bar.
Qalalyq jumyspen qamtý ortalyǵynda jumyssyz retinde 540 azamat tirkelgen. Ortalyq mamandary olarǵa laıyqty jumys izdeýmen aınalysýda. Qazirdiń ózinde «Jumyspen qamtýdyń jol kartasyn» júzege asyrý aıasynda 200-ge tarta jumysshy qajet.
– Kóbi jumys isteýge yntasyz. Bireýi jalaqysy az dese, endi biri basqa sebepterdi alǵa tartady. Baǵdarlama aıasynda jumysshylardyń jalaqysy 85 myń teńgeden bastalady, jumys aýqymyna qaraı odan joǵary da bolýy múmkin. Esepte turǵandardyń kóbiniń joǵary bilimi bar. Sondyqtan olar qara jumysqa barǵysy kelmeıdi,–deıdi qalalyq jumyspen qamtý ortalyǵynyń mamany Aleksandr Solodka.
Baǵdarlama aıasynda qazirde qurylys jáne jol jóndeý salasyndaǵy mamandarǵa suranys joǵary. Dıplom mańyzdy emes, eń bastysy, sol baǵytta tájirıbesi bolsa jetkilikti, tym quryǵanda qulshynysy kerek deıdi ortalyq mamandary.
– Jumyspen qamtý ortalyǵy jazǵy demalysta stýdentterge laıyqty jumys taýyp berýge kómektesetinin estip, kelip otyrmyn. О́zime laıyqty jumys izdeýdemin. Tabylsa eńbek eter edim, – deıdi stýdent Mılana Batyrbaeva.
«Jumyspen qamtýdyń jol kartasy» aıasynda Kókshetaý qalasynda jalpy somasy 10,4 mıllıard teńge bolatyn 33 joba iske asyrylýda. Bul 2600 jańa jumys oryndarynyń ashylýyna múmkindik berýde. Onyń 1300-i jumyspen qamtý ortalyǵy arqyly ótýi tıis. Jol kartasy aıasynda ázirge 26 kókshetaýlyq jumyspen qamtyldy.
