El kúzetinde turǵan arystarymyzǵa qamqorlyq tanytý durys-aq. Áıtpegende, sandalyp baspana izdep júrgen áskerı qyzmetshi Otanyn qalaı qorǵaıdy? Sondyqtan Qorǵanys mınıstrliginiń bastamasy baspanaǵa ulasqanyn jigerdiń janylǵany, jaqsylyq alaýynyń jaǵylǵany dep baǵalaýǵa bolady. Sebebi búgingi Qazaqstan armııasy basshylyǵynyń nazar aýdaratyn basym baǵyty – áskerı qalashyqtardyń ınfraqurylymyn damytý men sardarlardyń, olardyń otbasynyń ómir súrýine qolaıly jaǵdaı jasaý.
Qarýly Kúshter sapyndaǵy jaýyngerlerge jasalynyp jatqan bul ıgi úrdis jaqynda «Iýjnyı» jabyq áskerı qalashyǵynda jalǵasyn tapty. Bul qalashyq Shyǵys Qazaqstan oblysyndaǵy Aıagóz garnızonynda ornalasqan. Osylaısha atalǵan garnızondaǵy áskerı bólimderdiń sardarlaryna bas-aıaǵy 60 páterdi paıdalanýǵa berildi
– Qorǵanys mınıstrliginiń basshylyǵymen eń mańyzdy áleýmettik máseleniń biri sanalatyn áskerı qyzmetshilerdi turaqty baspanamen ǵana emes, sondaı-aq qyzmettik úımen qamtamasyz etý máselesi óz sheshimin tabýda. Áskerı qyzmetshiler jańa páterlerin tolyq ishki árleý jumystarynan keıin alady. Plastıkalyq terezeler, kireberis jáne ishki esikter, santehnıkalyq qurylǵylar, elektr plıtalar ornatylyp, órt dabyl bergishteri, elektr jáne sý eseptegish quraldary iske qosylǵan. Úıdiń qasbeti jeldetiletin otqa tózimdi júıelermen qaptalǵan, – dedi «Shyǵys» óńirlik qolbasshylyǵy áskerleriniń qolbasshysy general-maıor Asan Júsipov.
Sondaı-aq aýla aýmaǵy abattandyrylyp, balalarǵa arnalǵan oıyn alańy men jattyǵý quraldary ornalasypty. Bul áskerı qalashyqtaǵy kóptegen ǵımarattar men qurylystar sonaý 1970-1990 jyldary boı kótergen. Alaıda keıingi jyldary olardyń kelbeti túbegeıli ózgerdi. 1350 páterden turatyn 18 turǵyn úıdiń 15-ine tolyq jóndeý jumystary júrgizildi.
Bıylǵy jospar boıynsha 36 ǵımarat pen qurylysqa kúrdeli jóndeý jumystaryn júrgizý qarastyrylyp otyr. 70 páterden turatyn bir turǵyn úı shilde aıynda aıaqtalmaq. Al osydan týra eki jyl buryn munda 1000 oryndyq jańa mektep ashyldy. Budan bólek, qalashyqta 200 oryndyq balabaqsha, áskerı emhana men gospıtal, azyq-túlik dúkenderi jáne basqa da nysandar bar. Sportpen shuǵyldanamyn degenge sport kesheniniń esigi ashyq. Onda áskerı qyzmetshilerdiń balalary fýtbol, voleıbol, taekvondo, djıý-djıtsý jáne basqa da sporttyq seksııalarǵa qatysady. Mádenı-demalys ortalyǵynda 6 men 14 jas aralyǵyndaǵy balalarǵa arnalǵan bı úıirmeleri jumys istep tur. Mektep qabyrǵasynda qolóner men mýzykany damytýǵa arnalǵan shyǵarmashylyq úıirmeler, sondaı-aq sport seksııalary qolǵa alynǵan. Áskerı qyzmetshiler men olardyń otbasy músheleri qalashyq aýmaǵy abattandyrylyp, baspanalary barynsha túrlengennen keıin jaǵdaılary tipten jaqsara túsetinin aıtady.
