Búgin Prezıdent janyndaǵy Memlekettik basqarý akademııasynda «A» korpýsy memlekettik qyzmetshileriniń biliktiligin arttyrý semınary ótkizildi. Onyń ashylýyna arnalǵan jıyndy Prezıdent ákimshiligi basshysynyń orynbasary Ǵabıdolla Ábdirahymov qysqasha sóz sóılep ashyp, úsh kúndik merzimge belgilenip otyrǵan semınardyń máni týraly aıtyp berdi.
«A» korpýsy memlekettik qyzmetshileriniń kásibı biliktiligin arttyrý maqsatymen alǵash ret semınar ótkizilip otyr. Endigi jerde bul baǵyttaǵy jumys jyl saıyn shaqyrylady. О́ıtkeni, bilimdi úzdiksiz damytý - ómir talaby. Al órkenıetke bet burǵan alpaýyt elderdiń bári de osy máseleden syrt aınalyp ótken emes. Sondyqtan bizdiń memleketke semınar ótkizýge kelgen shet eldiń belgili sarapshylary 3 modýldi baǵyt boıynsha (kóshbasshylyq, memlekettik organdardaǵy aýdıt, jobalardy basqarý) dáris oqıdy. Alǵashqy dáristi Germanııadaǵy Shpaıer akademııasynyń doktory Djýlııa Fleısher ótkizedi. -Búgingi semınarǵa memlekettik organdardaǵy jaýapty hatshylar qatysyp otyr. Keleshekte barlyq aýmaqtardaǵy jergilikti bılik ókilderi onlaın rejiminde biliktilikterin jetildiredi, -dedi Ǵ. Ábdirahymov osy oraıda.
Memlekettik qyzmet isteri agenttiginiń tóraǵasy Álıhan Baımenov óz kezeginde «A» korpýsy memlekettik qyzmetshileriniń sany 500-den asyp ketkenin málimdedi. Sondaı-aq ol aldaǵy merzimde barlyq memlekettik qyzmetshilerdiń bilimin jetildirýge mán beriletinin eskertip ótti. Bul óz kezeginde jańa jobalardyń sátti iske asyrylýyna negiz qalaıdy. Semınardy ótkizýdegi túpki maqsat da osy.
Prezıdent janyndaǵy Memlekettik basqarý akademııasynyń rektory Bolatbek Ábdirásilovtiń málimdeýinshe, semınardy ótkizýshilerdiń bilimi men biliktiligi óte joǵary. Olar jańa baǵdarlamalardy oqytý isin meńgergen. Sonyń biri Tonı Blerdiń keńesshiler tobynda bolǵan Rıchard Makklelan. Ol ekinshi kúni jobalardy basqarý jóninen dáris oqıdy. Al úshinshi kúni sarapshy Per Jevar (Fransııa) kóshbasshylyq týraly sabaq ótkizedi.
Ámirhan Almaǵanbetov.
