«Bul jergilikti aldyn-alý jumystarynyń álsizdigin jáne karantındik sharalardyń tıisti deńgeıde saqtalmaı otyrǵandyǵyn kórsetedi. Ekonomıkalyq qajettilikke baılanysty shaǵyn jáne orta bıznestiń keıbir salalarynyń qyzmetine shekteýler alynyp tastaldy. Degenmen, bul qaýipsizdik sharalaryn elemeýge bolady degendi bildirmeıdi. Karantındik rejımniń talaptary saqtalýy kerek jáne oǵan barlyǵy mindetti. Alaıda, Taraz qalasy men aýdan ortalyqtarynda kóptegen turǵyndar qorǵanysh medısınalyq maskalaryn paıdalanbaýda. Al, saýda oryndary men basqa da nysandarda azamattardyń qaýipsizdigin qamtamasyz etý boıynsha tıisti talaptar oryndalmaı otyr. Aıtalyq, Talas jáne Baızaq aýdandarynda bir jerde adamdardyń kóp jınalýyna qatysty jaǵdaıdyń saldarynan aýrýshańdyqtyń ósýi oryn alǵan», dedi Berdibek Saparbaev.
Oblystyq taýarlar men qyzmetterdiń sapasyn jáne qaýipsizdigin baqylaý departamentiniń basshysy Berik Jarqynbekov aǵymdaǵy jyldyń 24 naýryzynan 21 mamyryna deıin aımaqta koronavırýstyq ınfeksııanyń 229 jaǵdaıy tirkelgenin jetkizdi. Onyń basym bóligi Taraz qalasy men Qordaı jáne Baızaq aýdandarynda oryn alǵan. Osy ýaqytqa deıin aýrýdyń óńirimizge syrttan kelý jaǵdaılary kóbirek baıqalsa, sońǵy kezderi jergilikti turǵyndar arasynda juqtyrý deregi ósip otyr eken. Atalǵan departament basshysy aýrýdyń kóbeıýiniń negizgi sebepteri retinde kásipkerlik pen saýda nysandaryna adamdardyń kóp jınalýy, maskalyq rejımniń buzylýy, áleýmettik qashyqtyqtyń saqtalmaýy ekenin atap ótti. Máselen, sońǵy kúnderi Talas aýdanynda koronavırýstyq ınfeksııanyń 6 oqıǵasy tirkelgen. Alǵashqy naýqas ortalyq aýdandyq aýrýhanaǵa jatqyzý kezinde belgili bolǵan. Zerthanalyq zertteý barysynda atalǵan naýqaspen baılanysta bolǵan 4 adamnyń indet juqtyrǵandyǵy anyqtalǵan. Aýdandaǵy kelesi ınfeksııa aýdan ortalyǵy Qarataý qalasynyń turǵynynan tabylǵan.
Al oblystyq densaýlyq saqtaý basqarmasynyń basshysy Marat Jumanqulovtyń aıtýynsha, oblystyń 36 eldimekeninde koronavırýstyq ınfeksııa anyqtalǵan. Sońǵy aptadaǵy indet juqtyrý deregi Baızaq aýdanynyń Sarykemer aýylynda anyqtalǵan. Qazirgi tańda juqpaly aýrýlar aýrýhanasynda 70 naýqas em alyp jatsa, 1504 adam dárigerlerdiń baqylaýyndaǵy úı karantınine alynǵan. Emdelip shyqqandardyń sany jalpy sany 155 bolsa, 1 adam qaıtys bolǵan.
Jıynda Berdibek Saparbaev jergilikti atqarýshy organdar men salalyq vedomstvo basshylaryna halyq arasynda túsindirý sharalaryn kúsheıtý kerektigin, keıingi kezderi jumystaryn álsiretip alǵan mobıldi toptardyń qyzmetin qaıta jandandyrý qajettigin aıtty. Sondaı-aq, basqosýda turǵyndar tarapynan túsken ótinishterge baılanysty halyqqa qyzmet kórsetý ortalyqtarynyń qyzmetin 25 mamyrdan qaıta bastaý týraly sheshim qabyldandy. Sonymen qatar, óz jumysynda jibergen kemshilikteri úshin Taraz qalasynyń, Talas jáne Baızaq aýdandarynyń ákimderine sógis jarııalanyp, osy baǵytqa jetekshilik etetin Taraz qalasy ákiminiń orynbasary qyzmetinen bosatyldy. Budan bólek, Qordaı, Baızaq jáne Talas aýdandary ákimderiniń orynbasarlarynyń jeke jaýapkershiligi qaralatyn bolady.
Shtab otyrysynda azamattardyń jekelegen sanattaryna arnalǵan áleýmettik tólemderge qatysty másele de jan-jaqty saralandy. Memleket tarapynan qarajat qarastyrylǵanymen, jergilikti jerlerde áleýmettik járdemaqylardy tóleý qarqyny kóńil kónshitpeıdi. Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekovtiń aıtýynsha, T.Rysqulov aýdanynda azyq-túlik jáne turmystyq jıyntyqpen qamtamasyz etý tólemi bar-joǵy 38 paıyzǵa ǵana oryndalǵan. Al, Taraz qalasy jáne oblystyń barlyq aýdandarynda memleket tarapynan ataýly áleýmettik kómekke bólingen qarajat tolyq ıgerilmegen. Bul rette Berdibek Saparbaev jergilikti atqarýshy organdardyń basshylaryn áleýmettik qamsyzdandyrý jáne turǵyndardy jumyspen qamtý jaıyna basa nazar aýdarýǵa shaqyrdy. Buǵan jumyspen qamtýdyń jol kartasynyń ınfraqurylymdyq jobalary meılinshe oń yqpalyn tıgizedi. Alaıda, atalǵan baǵyttaǵy jumystardy shırata túsý qajet. Máselen, jospar boıynsha 18 myńnan astam turǵyn jumyspen qamtýdyń ártúrli sharalaryna tartylýy tıis bolsa, búgingi tańda jobalar boıynsha 7 myń adam ǵana jumys tartylǵan.
Jambyl oblysy
