Aleksandr Sızonenko
Boıynyń tym uzyndyǵynyń arqasynda Ýkraınanyń Herson oblysynda týyp-ósken Aleksandr Sızonenkonyń esimi tórtkúl dúnıege máshhúr boldy. Sporttyń bul túrinde ol biraz tabystarǵa qol jetkizgenin kózi qaraqty kórermender umyta qoıǵan joq. Aleksandr ózi namysyn qorǵaǵan qos komandanyń da beldi oıynshylarynyń biri boldy. «Spartaktyń» sapynda aıshyqty ónerimen kózge túsip, Odaq birinshiliginiń kúmis medalin ıelendi. Biraq KSRO quramasy sapynda oınaý baqyty oǵan buıyrmady. Kezekti bir básekede jaraqat alǵan Sızonenko 1986 jyly úlken sportpen qosh aıtysty. Keıinnen túrli aýrýǵa shaldyǵyp, júrip-turýdan qaldy. 2012 jyly ol 53 jasqa qaraǵan shaǵynda qaıtys boldy.
Sýn Mınmın
36 jastaǵy Qytaı basketbolshysy Sýn Mınmınniń boıy – 236 santımetr. 2006-2014 jyldar aralyǵynda óz elinde, Meksıka, Japonııa jáne AQSh-ta baq synaǵan onyń Ulttyq basketbol lıgasynda (UBQ) da óner kórsetý múmkindigi bolǵan. Alaıda shamamen dál sol tusta onyń mı isigi dertine dýshar bolǵany anyqtalyp, Sýnge óz armanymen qosh aıtysýyna týra keldi.
George Mýreshan
Rýmynııalyq George Mýreshannyń boıy – 231 santımetr. Sporttyq mansabyn Klýj qalasyndaǵy ýnıversıtetter komandasynda bastaǵan ol 1993 jyly UBQ-daǵy «Vashıngton Býllets» klýbynyń jeıdesin kıdi. Odan keıin «Nıý-Djersı» jáne Fransııa chempıonattarynda aıshyqty ónerimen kózge tústi. Mýreshannyń esimi álemdegi eń beldi chempıonattyń eń boıshań oıynshysy retinde tarıhta qaldy.
Sondaı-aq álemdegi eń boıshań basketbolshylar qatarynda Manýte Bol (Sýdan, boıy – 231 sm.), Sýleıman Alı Nashnýsh (Lıvııa, 230 sm.), Slavko Vranesh (Chernogorııa, 230 sm.), Iаo Mın (Qytaı, 229 sm.), Shon Bredlı (Germanııa/AQSh, 229 sm.), Pavel Podkolzın (Reseı, 226 sm), Sım Býllar (Úndistan, 226 sm), Charlz Nevıtt (AQSh, 226 sm), Mark Iton (AQSh, 226 sm.), Rık Smıts (AQSh, 224 sm.) jáne Boban Marıanovıch (Serbııa, 224 sm.) syndy sańlaqtar bar.
Baıyptap qarasaq, bul azamattardyń barlyǵynyń da taǵdyry san qıly ekenin baıqaý qıyn emes. Keıbireýleri aıyqpas dertke shaldyǵyp, taǵdyrdyń ashysy men tushysyn molynan tatsa, keıbireýi tamasha sporttyq karera jasap, bul kúnderi baı-qýatty ómir keshýde. Taǵy bir aıta keterligi, sol alyptardyń deni túrli fılmderge túsip, akterlik kásipte de ózderin moıyndatqan eken.
Álemdegi eń boıshań basketbolshylar jaıyndaǵy aqparatty oqı otyryp, sol tizimnen ózimizdiń jerlesimiz Ývaıs Ahtaevtyń esimin keziktire almadyq. Bálkim, kezinde ondaı alyp adamnyń bul jalǵanda jer basyp júrgenin sheteldikter bilmeýi de múmkin ǵoı. Biraq kezindegi Keńes Odaǵy men Qazaqstan halqyna Ahtaevtyń esim etene tanys. Cheshenstannan deportasııalanyp kelgen Ývaıstyń boıy 236 santımetr bolǵan. 1947-1957 jyldar aralyǵynda ol «Býrevestnıktiń» (Almaty) sapynda óner kórsetip, KSRO-daǵy eń tanymal basketbolshylardyń birine aınaldy. Osyndaı boıshań oıynshyny buryn-sońdy kórmegen qarsylastary oǵan qarsy qandaı taktıka qoldanýdy bilmeı ábigerge túsetin. Sol alyptyń ónerin tamashalaý úshin sport keshenderine kórermender kóptep jınalatyn. Jankúıerler ony erkeletip, «cheshen Vasıa» dep ataıdy. Taǵy bir aıta keterligi, Ývaıs Ahtaevtyń esimi eki qolymen dopty ustap, shyǵyrshyqqa ústinen salatyn jáne alańnyń bir shetinen ekinshi shetine op-ońaı pas bere alatyn tuńǵysh basketbolshy retinde el esinde qaldy.
Ývaıs Ahtaev
1957 jyly qant dıabetine shaldyqqan Ahtaev basketbolshy retindegi karerasyn aıaqtap, bapkerliktiń qamytyn kıdi. 1978 jyldyń jazynda KSRO men Qazaqstannyń eń ataqty basketbolshylarynyń biri sanalǵan ol 47 jasynda jaryq dúnıemen qosh aıtysty.
