Onlaın jıynǵa fılologııa ǵylymdarynyń doktory, professor Mekemtas Myrzahmet, alashtanýshy, tarıh ǵalymdarynyń doktory, professor, akademık Mámbet Qoıgeldıev, jazýshy Smaǵul Elýbaı, ǵalym Talas Omarbekov, tarıh ǵalymdarynyń doktory Qaıdar Aldajumanov, jazýshy, pýblısıst, tarıh ǵylymdarynyń kandıdaty Beıbit Qoıshybaev, Sh.Ýálıhanov atyndaǵy Tarıh jáne etnologııa ınstıtýtynyń dırektory Zııabek Qabyldınov, fılologııa ǵylymdarynyń doktory, professor Aıgúl Isimaqova qatysty.
«Egemen Qazaqstan» gazetiniń basqarma tóraǵasy, dóńgelek ústeldiń moderatory Darhan Qydyráli bul taqyrypty qozǵaýdyń mańyzdylyǵyna toqtaldy.
«О́zderińizge málim, 31 mamyr – Qazaqstanda saıası qýǵyn-súrgin asharshylyq pen qurandaryn eske alý kúni. Osyǵan oraı el gazeti «Egemen Qazaqstan» arnaıy dóńgelek ústel uıymdastyryp otyr. Biraz ýaqyttan beri el gazetinde asharshylyq, saıası qýǵyn-súrgin, repressııa taqyryby júıeli túrde kóterilip kele jatyr. Gazettiń ár sanynda jer-jerdegi, óńirlerdegi asharshylyq máselesin qozǵap jatyrmyz. Jáne osy taqyrypty aldaǵy aıda da kótere beretin bolamyz. Sebebi bul jyldar – ǵasyr zulmaty, el basyna túsken aýyr kezeń, aýyr qasiret, úlken náýbet. Sondyqtan biz búgingi taqyrypta asharshylyq týraly kóbirek aıtsaq degen oıymyz bar. Sebebi, saıası qýǵyn-súrgin, repressııa taqyryby óte aýqymdy», - dedi Darhan Qydyráli.
Sondaı-aq ol asharshylyq jyldary týraly aıtylyp júrgen derekterge toqtaldy.
«Tipti asharshylyqtyń ózi kóbinese 1932 jyldan bastap aıtylyp kele jatyr. Al 1921 jylǵy asharshylyqqa kelesi jyly 100 jyl bolady eken. Odan aryǵa barsaq, 1918 jylǵy Jetisýdaǵy, Túrkistan jerindegi alapat asharshylyqtyń zardaptary da bar. «Jut jeti aǵaıyndy» degen. Keńes úkimetiniń ornaýymen, 1916 jylǵy kóterilispen birge bastalǵan Qazan tóńkerisi, aq pen qyzyldyń qyrǵyny, asharshylyq, kúshtep ujymdastyrý, kámpeskeleý, mejeleý saıasaty, sonymen qatar shekara asqan, jat jerge baryp sińip ketken qandastarymyzdyń máselesi, repressııa máselesi túptep kelgende zulmat kezeńniń bir kórinisi bolatyn», - dedi «Egemen Qazaqstan» gazetiniń basqarma tóraǵasy.
Jıynǵa qatysqan ǵalymdar men zııaly qaýym ókilderi qýǵyn-súrgin jáne asharshylyq qurbandaryn eske alý kúnine baılanysty tushymdy pikirlerimen bólisip, usynys-tilekterin jetkizdi.
