Qazaqstannyń Tuńǵysh Prezıdenti – Elbasy Nursultan Nazarbaev «Bolashaqqa baǵdar: rýhanı jańǵyrý» maqalasynda: «Ájeptáýir jańǵyrǵan qoǵamnyń óziniń tamyry tarıhynyń tereńinen bastaý alatyn rýhanı kody bolady. Jańa turpatty jańǵyrýdyń eń basty sharty – sol ulttyq kodyńdy saqtaı bilý. Onsyz jańǵyrý degenińizdiń qur jańǵyryqqa aınalýy op-ońaı», deıdi. Sondyqtan ata tarıhtyń túpsiz tunyǵynan tamyr tartatyn bizdiń ulttyq kodymyz eń aldymen osy memlekettik rámizderimizde sátimen mazmundalǵan, qısyndy bederlengen.
Táýelsiz elimizdiń aıshyqty da maǵynaly rámizderi – Máńgilik eldiń máńgilik nyshandary! Táý eter táýelsizdigimizdiń túý bıiktegi tuǵyry osy rámizderimizben saltanatty. Egemen eldiń bolmysymen úılesip, taǵdyrymen úndesip, qaısar rýhymen tildesip tur! Árbir otandasymyzdyń júregine sáýle bolyp quıylyp, keýdesine maqtanysh sezimin uıalatar kúshke ıe memlekettik nyshandarymyzǵa degen qurmet – shyn máninde elge, jerge degen qurmet...
Altyndalǵan jippen ádiptelgen ulttyń oıý-órnegi, jadyraǵan altyn kún men oǵan qanaty shaǵylysyp qalyqtap bara jatqan altyn qyran beınelengen kók baıraǵymyzǵa zer salyńyz. Ejelgi túrki jurtynyń altyn besigi – Uly dalamyzdy aıalap kele jatqan halqymyz úshin aspan tektes kók tústiń de, shýaq-nury turǵan kúniń de, sol kúnge kózin tiktep qadaı alatyn qyrannyń da alar orny aıryqsha.
Ár elementi saq dáýirinen bergi Uly dala qoınaýynan tabylǵan jádigerlerde negizdelgen, ár mıllımetri tereń mazmun men maǵyna arqalaǵan Eltańbamyz erekshe rýhqa ıe demeı kórińiz... Ornymyzdan tik turǵyzyp, alaqanymyzdy júrek tusyna qoıǵyzǵan, janarǵa jas úıirip, keýdemizge namys uıalatqan Ánuranymyzdy jiger janýshy qaıraǵym dep qalaı aıtpaısyz?!
Osy úsh qasıet – Qazaq elin Otanym dep biletin árbir azamattyń eń qymbat qazynasy, qundylyǵy. Sol úshin de osynaý mán-mańyzy joǵary rámizderimizdi baǵalaı bilýimiz kerek.
