«Qoja Ahmet Iаsaýı kesenesiniń aldynda turǵan qazaqtyń handary men bılerin, ıgi jaqsylaryn sýrettep shyqtym. Adam beınesin jasaý – aýyr ári úlken jaýapkershilik. Meniń armanym – sýretshi bolý. Sondyqtan óz týǵan jerimdegi barsha qazaqtyń tulǵalary elimizge aq batalaryn berip turǵan sátin sezingim keldi. Kúni-túni osy kórinisti armandap, sýrettep shyqtym», deıdi týǵan jerge degen ystyq yqylasyn óz ónerimen bildirgen jas sýretshiniń biri Esirkep Sábıtuly.
Sonymen qatar Túrkistan qalasynyń jas daryndary sýret salýdan sheberlik sabaqtaryn júrgizip, elimizdiń túkpir-túkpirindegi dostaryna onlaın túrde tanystyryp shyqty. Halyqaralyq balalardy qorǵaý kúni demalys alańshasynda otbasymen serýendegen jergilikti turǵyndar men qala qonaqtary kórmege qoıylǵan 50-ge jýyq týyndymen tanysyp, alǵystaryn bildirdi. «Áziret Sultan» memlekettik tarıhı-mádenı qoryq-mýzeıi balalardyń qyzyǵýshylyǵyn arttyra otyryp tanymyn keńeıtý, shyǵarmashylyq qabiletterin damytý baǵytynda sýretshiler saıysy, balalar kórmesi, balabaqsha jáne mektep oqýshylaryna arnalǵan ekskýrsııalar uıymdastyrýdy dástúrge aınaldyrǵan. Bıyl elimizdegi pandemııaǵa oraı jarııalanǵan saqtyq sharalaryna sáıkes kóptegen is-shara onlaın ótkizildi.
Túrkistan oblysy
