Memlekettik kirister departamentiniń basshysy tótenshe jaǵdaı kezinde bızneske qoldaý kórsetý maqsatynda qabyldanǵan Úkimet qaýlylaryn negizge alyna otyryp, oblys kóleminde salyqtar men tólemder boıynsha bıznes-sýbektilerine 6,5 mlrd teńge shamasyna jeńildik berilgendigin jetkizdi.
Ǵalymjan Orynovtyń aıtýynsha, osy jyldyń 20 naýryzynan bastap 31 jeltoqsanǵa deıin óńirde alańy 2000 sharshy metrden kem emes 29 iri saýda nysany, 3 oıyn-saýyq ortalyǵy, 2 teatr, 2 kórme zaly, 8 sport qurylys jaıy múlikke salynatyn salyqtan bosatylǵan. Osy ýaqyt aralyǵynda aýylsharýashylyq ónimin óndirýshi 37 kompanııa jer salyǵynan bosatylyp otyr.
Jeńildikter talabyna sáıkes osy jyldyń 1 sáýirinen 1 qazanǵa deıin aımaqtaǵy áýejaı termınaly, jeke praktıkamen aınalysatyn 20 adam, qoǵamdyq tamaqtandyrýmen aınalysatyn 201, qonaq úı qyzmeti salasyndaǵy 43 kásipker múlik salyǵyn tólemeıdi.
Oblystyq memlekettik kirister departamentiniń basshysy munymen qosa, 8427 shaǵyn jáne orta bıznes ókilderi eńbekaqy tóleý qorynan ustalatyn salyqtan, áleýmettik tólemderge qatysty jeńildikter qoldaný arqyly bosatylǵandyǵyn jetkizdi. Nátıjesinde joǵaryda atalǵan shaǵyn jáne orta bıznes ókilderi eńbekaqy tóleý qorynan ustalatyn salyqtan 1 mlrd 79 mln teńge, áleýmettik tólemderden 1 mlrd 853 mln teńge, 7 iri kásipkerlik sýbektisi eńbekaqydan ustalatyn salyqtan 8,1 mln, áleýmettik tólemderden 103,3 mln teńge qarjysyn únemdep otyr eken.
