Keshe Reseı astanasynyń ákimi Sergeı Sobıanın 9 maýsymnan bastap qalada karantın alynatynyn habarlaǵan edi. Biraq qoǵamdyq jerlerde maska men qolǵap kııý, áleýmettik araqashyqtyqty saqtaý syndy saqtyq sharalary áli de jalǵasady. Al keńse qyzmetkerleriniń kópshiligi qashyqtan jumys isteıdi.
Shahar basshysynyń bul sheshiminen keıin eldegi ishki týrızm qaıta jumys isteýge daıyndyqty bastap ketti. Alaıda týroperatorlar eldegi týrızm 30 paıyzǵa deıin qymbattaıtynyn aıtyp eskertýde.
О́tken táýliktegi jaǵdaı boıynsha Reseıde taǵy 8595 adam koronavırýs juqtyrǵan. Onyń 1572-si Máskeýde tirkelgen. Bul 17 sáýirdegi jaǵdaımen salystyrǵanda az kórsetkish. Elde pandemııa bastalǵaly 485 253 adam indet juqtyrǵan. Sońǵy resmı derekterge súıensek, Reseıde bir táýlik ishinde vırýs juqtyrý boıynsha ósim 4 apta boıy birdeı tirkelip otyr.
О́kinishke qaraı, munda keshe 171 adam koronavırýstan kóz jumdy. Jalpy qaıtys bolǵandar sany 6 142-ge jetti. Máskeý qalasynyń ózinde qaıtys bolǵandardyń sany 3 029-ǵa kóbeıgen.
Sondaı-aq elde bir kúnde 11 709 naýqas jazylyp shyqty. Jalpy indetten aıyqqandar sany 242 397-ge jetip otyr.
