"Qurmetti elorda turǵyndary men qonaqtary!
Biz tarıhymyzda alǵashqy ret 3 aıdan astam ýaqyttan beri karantın rejıminde ómir súrip kelemiz. Tótenshe jaǵdaı kezeńin bastan keshirdik. Qatań tártiptiń arqasynda, ózin-ózi oqshaýlaýdyń nátıjesinde biz qaýipti kezeńnen óttik. Qazirgi ýaqytta kóptegen kásiporyndar jumysyn jandandyrdy. Azamattar jumysyna qaıta oraldy. Qoǵamdyq kólikter qaıta júrýdi bastady. Saıabaqtar men qoǵamdyq oryndar esigin qaıta ashty. Árıne osyǵan sáıkes azamattardyń da sany kóshede kóbeıdi. Degenmen, azamattardyń kóbeıýine baılanysty qaýip arta túsýde. Birneshe máselege kóńil aýdarýdy suraımyn.
Birinshi, qazir biz baıqaǵanymyzdaı aýrý juqtyrý oshaqtary otbasylarynda paıda bolýda. Mysaly, balalary, ata-anasy, ata-ájesi de vırýsty juqtyrdy. Nátıjesinde búkil otbasy múshelerin aýrýhanaǵa jatqyzýǵa týra keldi.
Ekinshi, kóńil aýdarýdy talap etetin másele bul ujymdarda oshaqtar paıda bola bastady. Sońǵy aptadaǵy vırýs anyqtalǵan azamattardyń teń jartysynan kóbi ol ujymdardaǵy azamattar. Otbasynda da jáne jumys orynynda da sanıtarlyq normalardyń, karantınniń talaptarynyń durys saqtalmaýynyń esebinen dep mamandar aıtady.
Sondyqtan úsh máselege kóńil aýdarýdy suraımyn.
Birinshiden, qoǵamdyq oryndarda, azamattar kóp shoǵyrlanatyn jerde mindetti túrde medısınalyq maskany taǵý qajet.
Ekinshiden, qarapaıym gıgıenalyq normalardy saqtaýdy umytpaýymyz qajet. Ásirese balalarǵa aıtyp, otbasymyz ben jumysymyzda da osy tártipti buzbaýymyz kerek.
Úshinshiden, azamattar kóp shoǵyrlanatyn jerge barýdyń qajeti joq jáne de dıstansııany saqtaýǵa mindettimiz. Tek sonda ǵana biz vırýstan qutylamyz. Tájirıbe kórsetkendeı vırýs jasqa qaramaıdy. Deni saý azamattar da vırýsty juqtyryp, óz-ózin emdeımin dep densaýlyǵyn qıyndata túsýde. Jas, tepse temir úzetin azamattar aýrýhanaǵa túsýde. Aýyr hálde jatqan azamattarymyzda bar.
Eger 600-den astam aýrýhanada karantınde bolsa, sonyń teń jartysynan kóbinde pnevmonııa dıagnozy anyqtalǵan. Demek, naǵyz qaýipti topqa jatatyndar. Sonyń ishinde 34 densaýlyǵy aýyr hálde dep baǵalanýda. Olardyń 12-si IVL apparatyna qosylǵan. Karantın bastalǵaly beri, Tótenshe jaǵdaı jarııalanǵan kezde biz kóptegen mekemelerdi jabýǵa májbúr boldyq. Azamattarymyz ýaqytsha jumyssyz qaldy.
Soǵan qaramaı memleketimiz qyrýar aqsha jumsady. Az qamtylǵan otbasylarǵa kómek kórsetildi. Orta jáne shaǵyn bıznesqa úlken qoldaý kórsetildi. Endi qazir jumysty jandandyrǵannan keıin kásiporyn basshylary sony umytpaý kerek. Barlyǵymyz aıtylǵan talaptardy oryndaýǵa tıistimiz. Biz kúndelikti qarap, baqylap júrmiz. Biraq, azamattyq, áleýmettik jaýapkershilik bolý kerek. Endigi ortaq mindetimiz — vırýstyń taralýyna jol bermeý. Qatań tártipti saqtasaq, karantın rejıminen erterek ótemiz", - dedi Altaı Kólginov.
