Osy baǵyttaǵy atqarylyp jatqan jumystardy kórsetip, máseleniń jaı-japsaryn túsindirý úshin qala ákimdigi BAQ ókilderine arnaıy baspasóz týryn uıymdastyrdy.
«Sáýlet» shaǵyn aýdanyndaǵy Qoısary batyr kóshesi turǵyndary osyndaı yza sýdan jaqynda ǵana qutylǵan. «Kósheni boılaı jatqan tereń kólshiktiń ıisi úıge deıin jetip jatatyn», deıdi olar. Qala ákimdigine baryp aryzdanǵannan keıin másele sheshimin taýyp, kól kómilipti. Kólemi 6 myń sharshy metr bolatyn aýmaqqa 1395 KamAZ qum tógilgen. Turǵyndardyń endigi tilegi – jer teliminiń memleket menshigine qaıtarylýy.
– Sor kóldiń sarsańymen shyryldap júrgenimizde jerdiń ıeleri bir tóbe kórsetpedi. Ákimshilik muńymyzǵa qulaq asyp, bir jarym aı jumys istep, kóldi japty. Endi ıelerinen jer telimin zań jolymen alyp, osy tóńirektiń balalary úshin oıyn alańyn salyp berse degen tilegimiz bar, – deıdi kóshe turǵyny Jámılá Ábdijálelova.
Bul osy jyly shaǵyn aýdanda kómilip turǵan besinshi kólshik eken.
Al Qorqyt ata shaǵyn aýdanyndaǵy Jastar kóshesiniń turǵyndary irgedegi yza sýdan áli qutyla almaı keledi. Ásirese, jazdyń kúni masa-shybyndy qaptatyp jiberetin sor kólge sońǵy jyldary túrli jándikter de úıir bola bastapty.
Jurt nazaryn aýdarý úshin kól jaǵasyna «Zoobaq» degen jazýy bar taqtaısha da qadap qoıǵan eken, sasyq sý kómile bastaǵan soń alyp tastapty. Olar osyndaǵy turǵyndar arasyndaǵy demikpe, allergııa sekildi aýrýlardyń órshýin de osy kólden kórip otyr.
– Aýlama jylda tal egemin. Biraq osy sor kóldiń áserinen óspeı jatyp qýrap qalady. Men ǵana emes, osyndaǵy talaı turǵyn osydan esiginiń aldyn kógerte almaı mysy quryp otyr, – deıdi osy araǵa alǵash kelip qonystanǵandardyń biri Isa Qudaıbergenov.
Turǵyndarǵa máseleni túsindirýge kelgen qala ákiminiń orynbasary Erlan Berdibaevtyń aıtýynsha, osy 30 sotyq jer kezinde úı qurylysyn salý úshin tabystalǵan. Qazir problemaly jer teliminiń ıeleri izdestirilip jatyr.
– Bul jerler burynyraqta karer retinde qazylǵan aýmaqtar. Keıinirek yza sý kóterilip, sor kólder paıda bolǵan. Onyń barlyǵyna, ásirese jekemenshik jerlerge memleket tarapynan qarajat jumsaýdy zań kótermeıtinin bilesizder. Sondyqtan da jer ýchaskesi ıelerine ózine berilgen aýmaqty ıgerý retinde talaı ret hat joldadyq. Tipti sotqa da júgingen kezimiz boldy. Onyń nátıjesi jaqyn arada belgili bolady. Eger is bizdiń paıdamyzǵa sheshilse, bul ýchaskelerdi aýksıon arqyly kásipkerlerge usynamyz nemese jer kezegin kútkenderge beremiz. Bıylǵa deıin qala boıynsha 18 kólshik kómilse, jyl basynan beri 12 kólshiktiń máselesi sheshildi. Bul iske bıýdjetten qarjy jumsaý múmkin bolmaǵandyqtan biz jergilikti kásipkerler kómegine júgindik. Bul jumys aldaǵy ýaqytta da jalǵasady. Oblystyq jumyldyrý daıyndyǵy basqarmasy jaqyn arada Syrdarııa ózeniniń arnasyn tazartý jumystaryn bastaıdy. Darııa tabanynan shyǵatyn taza qummen osy kólshikterdi toltyrýdy josparlap otyrmyz, – dedi qala ákiminiń orynbasary.
Oblys ortalyǵyndaǵy Sáýlet, Saıahat, ál-Farabı, KBI jáne Araı shaǵyn aýdandarynda osyndaı jer telimderi bar. Qala ákimdigi onyń ıgerilmeýine baılanysty Jer kodeksiniń 93 baby, 3 tarmaǵyna sáıkes sotqa talap aryz berip otyr.
Ákimdik ókilderi sor kólder jurttyń soryna aınalmaýy úshin bárin jasaıtynyn aıtady. Tek turǵyndar túsinistik tanytýy tıis. Olardyń arasynda qala tazalyǵymen aınalysatyn mekememen kelisimshartqa otyryp, esiginiń aldyna konteıner qoıǵyzǵannan góri qoqysyn osyndaı kólderge tóge salýdy tıimdi sanaıtyndar da kezdesip qalady. Arnaıy kólikterdiń de qala syrtyna shyǵýdy alyssynyp, káriz sýyn kólshikterge quıǵan kezi az emes. Osy mańdaǵy turǵyndar talaı márte sondaı jaǵdaılarǵa kýá bolǵan. Ondaı kezde polısııa men tıisti oryndar ókilderin shaqyrý kerek. «Qala – ortaq úıimiz» degendi jıi aıtamyz. Eger bılik te, turǵyndar da máselege jaýapkershilikpen qarasa, osy ortaq úıimizdiń qaı problemasy da oraıly sheshiler edi.
QYZYLORDA
