11 maýsym kúni Qytaıdan shetelge attap baspaǵan, eshbir sheteldikpen aralaspaǵan Beıjiń turǵynynyń vırýs shyrmaýyna túskeni týraly alǵashqy habar taraǵan az kúnniń ishinde el astanasy Beıjińmen odan 147 shaqyrym jerdegi Hebeı provınsııasynyń 11 mln turǵyny bar Baodın qalasynda da áskerı rejım kúshine endi.
Beıjińniń Fentaı aýdanynda ornalasqan asa iri "Sınfadı" bazarynda satylǵan azyq –túliktiń birinen, atap aıtqanda Eýropadan muzdatylyp jetken et ónimderinen vırýs juqqan degen uıǵarymmen bazar jabylyp tekseriske alynady. Sındafıǵa kelýshilerden test alyp, et pen balyqty jáýkemdeýde qoldanylatyn quraldardy teksere kele muzdatylǵan bekireni bóletin taqtaıdan vırýs tabylǵan. Al 517 tutynýshynyń arasynan 45 adamda vırýs barlyǵy anyqtalady. Osylaısha 107 ga jerdi alyp jatqan, tek astanany ǵana emes, jaqyn mańaıdaǵy qalalardy et, balyq, kókónispen qamtamasyz etip otyrǵan "Sınfadı" bazary qaýip oshaǵy bolyp shyǵa kelip, onda jumys isteıtin 10 myń adam koronavırýsty anyqtaıtaıtyn test tapsyrýda.
Al aýrý adam turatyn Beıjińniń Sıchen aýmaǵynda sport stadıony dereý jabdyqtalǵan zerthanaǵa aınalyp, jaqyn mańaıdyń turǵyndaryna aýrýǵa tekserý júrgizilgen. Munymen birge "Sınfadı" bazaryna 30 mamyrdan bastap barǵan adamdardyń bárine 14 kún óz úılerinen bir qadam syrtqa shyǵýǵa bolmaıtyny qatań eskertilgen eken.
Ýhan Vırýsologııa ýnıversıtetiniń qyzmetkeri Iаn Chjansıý Beıjińde aınaldyrǵan tórt kúnniń ishinde 79 adamnyń aýrýǵa shaldyǵýyna qarap, bul jolǵy vırýs Ýhandaǵydan juqpalyraq degen oıyn aıtypty.
Djon Hopkıns ýnıversıteti taratqan habarlamaǵa qaraǵanda 16 maýsym kúni álem boıynsha indetke shaldyqqandar sany 8 mln asyp, 188 eldiń turǵyny onyń sharpýyna ilingen.
