Oblystyq densaýlyq saqtaý basqarmasynyń málimetine súıensek, Tasqala eldi mekeniniń 40 jastaǵy turǵyny 8 maýsymda álsizdik, qurǵaq jótel, tábettiń bolmaýy, júrek aıný men qusýdyń qaıtalanýy saldarynan medısınalyq qyzmetke júginipti. Keıin naýqas jedel túrde oblystyq aýrýhananyń provızorlyq stasıonaryna jatqyzyldy. Algorıtmge sáıkes, naýqastan PTR test alynyp, nátıjesinde koronavırýs anyqtalǵan. Dárigerler áıelden ókpeniń ekijaqty "kúńgirt áınek" tıpti ózgerisin baıqaǵan.
Qabyldaý kezinde 40 jastaǵy áıelden ıntoksıkasııa belgileri anyqtalyp, jaǵdaıy "ortasha" dep baǵalandy. Naýqas tábettiń bolmaýy, qusý, dene qyzýynyń 37°C-qa kóterilýi, tamaqtyń qyzarýy jáne jıi qurǵaq jótel qaıtalanǵanyna shaǵymdanǵan. Aýrhanada naýqasqa klınıkalyq hattamaǵa sáıkes, emdik sharalary júrgizildi.
"17 maýsym kúni keshke marqumnyń jaǵdaıy kúrt nasharlap, esinen tandy. Sol sebepten, shuǵyl túrde jansaqtaý bólimine jetkizildi. Oǵan 30 mınýt ishinde reanımasııalyq sharalar tolyq kólemde júrgizilip, dárigerler naýqasty qutqarý úshin qoldan kelgenniń bárin jasady. Alaıda, saǵat 21:30-da bıologııalyq ólim anyqtaldy. Naýqasqa qoıylǵan qorytyndy dıagnoz: COVID-19, eki jaqty polısegmentti pnevmonııa. О́limniń sebebi: ókpe embolııasy", - dep túsindirdi densaýlyq saqtaý basqarmasynan.
Al, qaıtys bolǵan ekinshi áıel –73 jastaǵy Atyraý qalasynyń turǵyny. Ol 12 maýsymda oblystyq aýrýhananyń provızorlyq stasıonarynan jansaqtaý bólimine jetkizilgen. Es-tússiz kúıde reanımasııaǵa jóneltilgen naýqasqa IVL apparaty qosýly bolǵan.
"№2 oblystyq aýrýhanaǵa kelgen kezde naýqastyń jaǵdaıy óte aýyr boldy. Respýblıkalyq ahýaldyq ortalyǵynyń reanımatologtary men pýlmonologtarynan telefon arqyly birneshe ret keńes alyndy. Qabyldanǵan sharalarǵa qaramastan, 17 maýsymda saǵat 20:40-ta bıologııalyq ólim tirkeldi. Áıelge qoılyǵan qorytyndy dıagnozy: COVID-19, eki jaqty polısegmentti pnevmonııa, ilespeli aýrýlarynyń dıagnozy: júrektiń bastapqy zaqymdanýy bar gıpertenzııa jáne semizdik. Aýrýdyń asqynýy saldarynan naýqasta polıorgan jetispeýshiligi paıda bolǵan", - dedi oblystyq densaýlyq saqtaý basqarmasynan.
Osylaısha, búgin, 18 maýsymda Atyraý oblysynda koronavırýs ınfeksııasynan 8 adamnyń ólimi tirkelip otyr.
