UBT-nyń alǵashqy kúni 161 pýnktiń 51-i ǵana isteıdi, onyń 44-i aýyldyq jerlerde ornalasqan. Ortasha eseppen 1 UBT tapsyrý pýnktine 120 adamnan keledi.
21 maýsym men 5 shilde aralyǵynda testileý tapsyrylatyn aǵyndardyń jalpy sany 15-ti quraıdy. UBT ótkiziletin árbir pýnkte medısınalyq-sanıtarlyq sıpattaǵy kúsheıtilgen sharalar qabyldanatyn bolady: dezınfeksııalyq tonnelden ótý, arnaıy dezınfeksııalanǵan kilemshede aıaq kıimderdi zararsyzdandyrý, dene qyzýyn ólsheý, qoldy zararsyzdandyrý suıyqtyǵymen óńdeý, medısınalyq maskalar berý. Testileýge kirgizý jáne otyrǵyzý kezinde testilenýshiler arasyndaǵy araqashyqtyqtyń keminde 2 metr bolýy qamtamasyz etiledi, sondaı-aq árbir aýdıtorııa bakterısıdtik quraldarmen jáne aýa resırkýlıatorlarymen kezeń-kezeńmen jeldetilip, óńdeletin bolady.
Sanıtarlyq talaptar qatań saqtalady, sondyqtan aýdıtorııany tek 50%-ǵa deıin toltyrýǵa bolady. Sáıkesinshe, jobalyq qýattylyq UBT-ny 6 kúnniń ishinde ótkizýge múmkindik bergenimen, shaǵyn aǵyndardy jınaqtaý úshin testileý 15 kúnniń ishinde júrgiziledi.
Esterińizge sala keteıik, bıyl testilenýshiler úshin buryn-sońdy bolmaǵan jaǵdaı jasaldy. Máselen, alǵash ret kalkýlıator paıdalanýǵa ruqsat etilip, talapkerler úshin tegin baıqaý synaqtary qoljetimdi boldy. Sonymen qatar testileýdi ótkizý ýaqyty 4 saǵatqa deıin uzartylyp, túlekter memlekettik emtıhannan bosatyldy.
