Oblystyq energetıka jáne turǵyn úı-kommýnaldyq sharýashylyq basqarmasynyń basshysy Nurlan Aldamjarovtyń aıtýynsha, búgingi tańda eldi mekenderdiń 57,8 paıyzy ortalyqtandyrylǵan sýmen qamtylǵan. Sonymen qatar 2023 jyly óńir turǵyndaryn tolyqtaı aýyz sýmen qamtamasyz etý josparlanǵan eken. Sala basshysy aǵymdaǵy jyly óńirde 17,4 mlrd teńgege 50 sýmen jabdyqtaý nysanynyń qurylysy júrgizilip jatqanyn atap ótti. Jyl sońyna deıin 34 nysan paıdalanýǵa beriledi dep kútilýde. Tıisti qarjy «О́ńirlerdi damytý» jáne «Jumyspen qamtýdyń jol kartasy» memlekettik baǵdarlamalary aıasynda qarastyrylǵan. Sonymen qatar sýmen jabdyqtaý nysandarynyń basym bóligi Jýaly, Baızaq, T.Rysqulov jáne Jambyl aýdandarynda salynady. Sondaı-aq 2021-2023 jyldary 84 eldi mekenge júzdegen shaqyrym sý qubyry tartylyp, nátıjesinde oblystyń barlyq turǵyndary tolyq taza aýyz sýǵa qol jetkizedi. Bul oraıda oblys ákimi Berdibek Saparbaev kestede belgilengen merzimnen qalys qalmaý úshin Taraz qalasy men Merki, Shý jáne Qordaı aýdandarynyń ákimderine merdigerlermen týyndaǵan máselelerdi sheship, jobalyq-smetalyq qujattardy ýaqtyly daıyndaýdy tapsyrdy. Máselen, Shý aýdanynyń ortalyǵy Tóle bı aýylyna gaz tartý máselesi talaı jyldan beri sheshilmeı keledi. Jergilikti turǵyndar men gaz tartýshy «Parıev» jaýapkershiligi shekteýli seriktestigi arasynda baǵanyń kóterilýine baılanysty máseleler týyndaǵan. Sol sııaqty, oblys ortalyǵynan shalǵaıda jatqan Moıynqum aýdanynyń Aıdarly aýylynda da aýyz sý máselesi áli ózekti kúıinde qalyp otyr.
Búgingi tańda aýyldardy gazdandyrýǵa respýblıkalyq jáne oblystyq bıýdjetten, sonyń ishinde «Jumyspen qamtýdyń jol kartasy» aıasynda tıisti qarajat qarastyrylýda. Nátıjesinde, barlyǵy 84 aýyl gazdandyrylatyn bolady. Sonymen qatar bıyl 30 aýyl kógildir otynmen qamtylady. Alaıda oblystaǵy 377 eldi mekenniń 192-sine ǵana tabıǵı gaz qubyry tartylǵan. Bul 51 paıyzdy quraıdy. Atalǵan másele áýlıeatalyq áleýmet úshin áli kúnge deıin mańyzdy bolyp otyr. Aýyldaǵy turǵyndar atalǵan máselelerge baılanysty shaǵymdaryn oblys basshylyǵyna da aıtqan bolatyn. B.Saparbaev eldi mekenderdi aýy sý jáne kógildir otynmen qamtýdyń mańyzyn aıta kele, ınjenerlik ınfraqurylym júıeli túrde damýy qajettigin, turǵyndar joldar retke keltirilgennen keıin jerasty ınjenerlik jelilerin jóndeý úshin kóp ýaqyt ótpeı qaıta qazylyp, buzylatynyna jıi shaǵymdanyp otyrǵanyn, sondyqtan da barlyq jumystar qatar atqarylýy kerek ekenin atap ótken.
Sonymen qatar áleýmettiń áleýetin arttyrýǵa baǵyttalǵan túrli jobalardyń merziminde oryndalýy da basty másele. Bul oraıda, oblystyq ekonomıka jáne bıýdjettik josparlaý basqarmasynyń basshysy Gúldana Jaýynbekova óńirde 2019-2020 jyldarǵa josparlanǵan 412 jobanyń 305-i boıynsha jobalyq-smetalyq qujattamalardyń áli daıyndalmaǵanyn jetkizdi. Onyń 56-sy kúzge deıin maquldanbaq. Jobalardyń kópshiligi Taraz qalasynda jáne Jýaly, Jambyl, Baızaq, Sarysý, T.Rysqulov aýdandarynda júzege asyrylmaǵan. Al Jambyl oblysy ákimi apparatynyń basshysy Almas Mádıevtiń habarlaýynsha, oblystyq birqatar basqarmalar, Taraz qalasy men aýdan ákimdikteri oblys ákiminiń keıbir tapsyrmalaryn ýaqtyly oryndamaǵan. Bul da der kezinde túrli áleýmettik jobalardyń júzege asýyna qolbaılaý bolyp otyr.
Jambyl oblysy
