Jalpy, búginde teńizden jylyna jeti myń tonnadaı balyq aýlanyp, onyń eki myń tonnasy eksporttalady. Qazir aıdyn 18 aýmaqqa bólinip, aýdanda 8 balyq óńdeý zaýyty jumys istep tur. Olardyń ónimi qazir álemniń ár túkpirinen tabylady.
Biraq bóget arqyly balyqtyń óli teńizge qaraı aýyp ketýi osy kúnge deıin ózekti másele bolyp kelgen edi. Halyqaralyq Araldy qutqarý qory mamandary izdenisiniń nátıjesinde Kókaralda balyqtardy tospadan ótkizbeıtin gıdroakýstıkalyq qurylǵy iske qosyldy. Qor men halyqaralyq yntymaqtastyq jónindegi German qoǵamdastyǵy (GIZ) jáne oblystyq ákimdik arasyndaǵy memorandýmy aıasynda júzege asqan joba quny – 150 mln teńge.
Halyqaralyq Araldy qutqarý qory dıreksııasynyń dırektory Bolat Beknııaz qurylǵyny «Balyq sharýashylyǵy ǴО́O» JShS mamandary patenttep alǵanyn aıtady.
– Jyl saıyn Kishi Araldan óli teńizge qaraı 5 myń tonnaǵa jýyq irili-usaqty balyq aýyp, qyrylyp qalyp jatyr. Osyny boldyrmaý baǵytyndaǵy bizdiń izdenisimizdi halyqaralyq yntymaqtastyq jónindegi German qoǵamdastyǵy (GIZ) qoldap, tospaǵa qondyrǵy ornatyldy. Mamandar ony 2 jyl kóleminde tájirıbeden ótkizedi, – deıdi Bolat Qabykenuly.
Sharaǵa Germanııa Federatıvtik Respýblıkasynyń Qazaqstandaǵy Tótenshe jáne ókiletti elshisi Tılo Klıner, oblys ákiminiń orynbasary Baqyt Jaqanov, kezinde elimizdiń Balyq sharýashylyǵy mınıstrligin basqarǵan, belgili memleket jáne qoǵam qaıratkeri Qudaıbergen Sarjanov qatysyp, bastamaǵa sáttilik tiledi.
– Adamzat balasy úshin tabıǵat ortaq. Sondyqtan da birlesken isimizdiń búgingi nátıjesin kórip qýanyp turmyn. Onyń sátti bolaryna senemin, – dedi elshi Tılo Klıner.
Tospa túbine ornalasqan qurylǵy balyqty dabyl arqyly úrkitip turady. Mamandar balyq «áýenge» boı úıretip almaýy úshin qurylǵy shyǵaratyn dybysty jıi ózgertip turýdy oılastyryp otyr.
QYZYLORDA
