«Nur Otan» HDP oblystyq fılıalynda «Kórkeıe ber, týǵan jer» aksııasy aıasynda stýdent-jastar eńbek jasaqtarynyń IH oblystyq sleti ótkizildi.
«Nur Otan» HDP oblystyq fılıalynda «Kórkeıe ber, týǵan jer» aksııasy aıasynda stýdent-jastar eńbek jasaqtarynyń IH oblystyq sleti ótkizildi.
Oblystyq basqarmalar basshylary, joǵary oqý oryndary men kolledjder ókilderi, aýdan ákimderiniń orynbasarlary, jas depýtattar, stýdent-jastar qatysqan slette «Atameken» stýdenttik jastar jasaqtary qoǵamdyq birlestiginiń tóraǵasy Nurlybek Mýsın eńbek semestrinde atqarylǵan jumystar jaıly baıandady. Elbasynyń stýdenttik jastar jasaqtaryn qurý jónindegi bastamasyn birinshi bolyp qoldaǵan aqtóbelikter osy dástúrdi jyl saıyn jalǵastyryp, alǵashqylardyń qatarynda jumysty bastap keledi. Aqtóbelik jastar stýdenttik qurylys jasaqtaryna belsendi qatysyp, jyl saıyn olardyń qatary kóbeıe túsýde. Bıyl jumyspen qamtýda aýdandarda turatyn jastarǵa, sonyń ishinde jumyssyz jastarǵa basymdyq berilipti. Bir sózben aıtqanda, eńbekke yntaly jastarǵa aýyldyq jerlerde de «eki qolǵa bir kúrek» tabylady. Tek uıymdastyra bilý kerek, jastardyń yntasyn oıatsa bolǵany.
– Tórt aılyq jazǵy eńbek semestrinde on eki aýdan boıynsha 1610 jas jumys istedi. Qalamyzdy kóriktendirý jáne kógaldandyrý jumystaryna 3 myń stýdent - jastar qatysty. Qurylys jasaqtarynyń jaýyngerleri «KTP», «Globýs», «Kontakt» JShS sııaqty irgeli kásiporyndarda eńbek etti. Qurylys jasaqtaryndaǵy jaýyngerler «NurAqtóbe», «Baýyrlastar-1» jáne «Batys-2» shaǵyn aýdandaryndaǵy qurylys nysandarynda jumys istedi. «Jasyl el» jasaqtary 4,5 myń gektar alqapqa jas aǵash kóshetterin otyrǵyzdy. Jaýyngerler aı saıyn ortasha 30 myń teńge eńbekaqy aldy, – dedi N.Mýsın.
Slette sóz sóılegender bul qozǵalystyń tıimdiligin, jastardy eńbekke daǵdylandyrýdaǵy jáne azamat bolyp qalyptastyrýdaǵy tárbıelik mánin aıryqsha atap ótti. Jıynǵa qatysýshylardy jańa oqý jylynyń bastalýymen jáne eńbek maýsymyndaǵy qol jetken tabystarymen quttyqtaǵan oblys ákimi Arhımed Muhambetov jastardy eńbekpen qamtamasyz etý, olardyń turmystyq máselelerin sheshý baǵytyndaǵy qolǵa alynyp jatqan sharalarǵa toqtaldy. О́ńir basshysy tek 2011-2012 jyldary ǵana «Jumyspen qamtý-2020» memlekettik baǵdarlamasy boıynsha 13 myń jastyń eńbekke tartylǵanyn, onyń 7,5 myńy 29 jasqa deıingi jastar ekenin jetkizdi. 1806 adam jastar tájirıbesinen ótip, jumysqa ornalasqan eken.
– Stýdent-jastardyń eńbek jasaqtaryna 5 myńǵa jýyq adam tartyldy. Olarǵa 100 mıllıon teńge qarjy bólindi. Oblysta jastar máselesin sheshý basty nazarda ustalýda. Bıyl aýdandarda 30-ǵa jýyq jastar uıymdary quryldy, aýdandarda jastar resýrstyq ortalyqtary ashyla bastady. Alys aýdandarǵa baratyn dárigerler úshin 2 mıllıon teńge kóleminde grant bólinetin boldy. Jyl saıyn «Dıplommen – aýylǵa!» baǵdarlamasy boıynsha 350-den astam jas mamandar aýyldyq jerge barýda. Olarǵa kóterme aqy tóleý, turǵyn úımen qamtamasyz etý, basqa turmystyq jaǵdaılar týǵyzý jolǵa qoıyldy. Bıyl jyldyń aıaǵyna deıin «Qoljetimdi turǵyn úı-2020» baǵdarlamasy boıynsha 216 jas otbasy baspanaly bolady, – dedi ákim.
A.Muhambetov eńbek maýsymynda eseli eńbek etip, úzdik dep tanylǵan 100 stýdentke Astana qalasyna baryp, demalyp qaıtýǵa tegin joldama tapsyrdy. Sondaı-aq, stýdentterdiń jazǵy eńbek maýsymyn jaqsy uıymdastyrǵan aýdan ákimderine, joǵary oqý oryndary men kolledjder basshylaryna alǵys hattar tabystaldy.
Satybaldy SÁÝIRBAI,
«Egemen Qazaqstan».
Aqtóbe oblysy.
