Aqtóbe qalasynyń Qurmysh aýdanyndaǵy Mahambet kóshesi boıynda ornalasqan úıde Sáýlebaı Rysqalıevti aqyrǵy saparǵa shyǵaryp salýǵa júzdegen adam keldi. Bul týraly «Moı gorod» portaly habarlady.
«Qazany shyǵaryp salýǵa júzdegen adam jınaldy. Ol úıdiń janyna qoıylǵan kólikterdiń sanynan-aq baıqaldy. Olardyń basym kópshiligi Atyraýdyń memlekettik nómiri taǵylǵan kólikter bolyp shyqty», - delingen habarlamada.
Marqumnyń máıitin shyǵaryp salar aldynda jýrnalısterden úıge tym jaqyndamaý ótinilgen. Sosyn ishke arnaıy kólik kirip, qaqpa jabylǵan. Aýladaǵy kórinisterdi túsirýge de ruqsat etilmegen. Janaza jabyq aýlanyń ishinde ótken. Sodan keıin darbaza ashylyp, shyqqan kólikpen birge jurt ta syrtqa bettegen. Olardyń birqatary sadaqa beriletin restoranǵa ketse, taǵy bir qorasy beıitke baratyn kólikterge otyrǵan.
Sáýlebaı Rysqalıev 78 jasynda qaıtys boldy. Týǵan-týystary osy oqıǵaǵa baılanysty jýrnalısterge áldene aıtýdan bas tartqan. Al kórshi áıel aqsaqaldyń jaqsy adam bolǵanyn, biraq uldary jóninde eshteńe bilmeıtinin, sebebi, tanystyǵy joq ekenin aıtqan.
Osy oqıǵaǵa baılanysty KTK tilshisi júrgizgen habarda «Sáýlebaı aqsaqaldyń janazasyna uldary men úsh kúıeý balasy jáne kisi óltirýge tapsyrys berdi dep aıyptalǵan qyzy qatysa almaǵany» aıtyldy. Aǵaıyndy Rysqalıevterdiń ákesi sońǵy 10 jyldan óziniń janazasy shyǵarylǵan úıde turyp kelgen. «Janazaǵa jınalǵandardyń kóp bolǵany sonsha, jol boıyna qoıylǵan kólikterden kóshedegi qozǵalys birer saǵatqa toqtap qaldy», - deıdi tilshi odan ári.
Tilshiniń baıandaýynsha, balalary elden ketkeli beri Sáýlebaı Rysqalıevtiń júregi syr berip júripti. О́miriniń sońǵy kúnderin ol habar kútip, teledıdarǵa telmireýmen ótkizipti. «Balalaryn ańsaıdy ǵoı. Ańsamaıtyn adam bar ma? Bala-baýyr eti ǵoı. Balasyn ata-anasy aq sútin bergen, qalaı joqtamasyn?», - deıdi marqumnyń dosy Alpysbaı Jumyrǵazın osy oraıda.
«Densaýlyǵy, júregi aýyryp júredi ǵoı. Kýrortqa bardy, emdelip júrdi. Báribir dámi bitken soń ketti ǵoı. Ne shara...á", - deıdi basqa qurdasy Qundyzbaı Berlepesov.
Týystarynyń aıtýynsha, balalarynyń aqtalatynyna sengen. Jáne únemi: «Áli zaman túzeledi, bári ornyna keledi» degendi jıi aıtyp júripti.
Atyraýdyń buryńǵy ákimi Bergeı Rysqalıev pen Májilis depýtaty bolǵan baýyry Amanjan ákelerin sońǵy saparǵa shyǵaryp sala almady. Olarǵa 35 adamnan turatyn qylmystyq top quryp, 71 mlrd. teńgeni jymqyrdy dep aıyp taǵylǵan bolatyn.
Rysqalıevterdiń sybaılastyq komandasynda bul áýlettiń úsh kúıeý balasy da bolǵan desedi. Olar da qazir shet elderde bas saýǵalap júr. Al qaryndasyna kisi óltirýge tapsyrys berdi dep aıyp taǵylyp, oǵan qazir halyqaralyq izdeý jarııalanǵan. Qazir Shveısarııa prokýratýrasy da aǵaıyndy Rysqalıevterge qatysty qylmystyq is qozǵapty.
Sáken Maılybaı.
