Búgin Lıvııa astanasy Trıpolıde premer-mınıstr Alı Zeıdannyń urlanǵany jónindegi aqpar qate bolyp shyqty. Bul týraly ITAR-TASS habarlady.
Budan buryn BAQ ókilderi «Qarýlanǵan belgisiz bireýler premer-mınıstrdi shtab-páterinde otyrǵan jerinen urlap áketti» degen aqpar jarııalaǵan bolatyn. Derekti dereý Lıvııa úkimeti de rastady. Alaıda, keıin anyqtalǵanyndaı, munyń bári jergilikti ishki ister mınıstrliginiń júrgizgen ózindik sharasy bolyp shyqty.
«Premer-mınıstrdi eshkim urlaǵan joq», – dedi Lıvııa ishki ister mınıstrligi janyndaǵy qylmyspen kúres basqarmasynyń ókili Abdel Hakım al-Býlıazı sońynan. Ol sondaı-aq úkimet basshysy Alı Zeıdan shynymen qamaýǵa alynǵanyn aıtty. Qamaý basqarma buıryǵymen júzege asqan.
«Skaı nıýs-Arabııa» telearnasynyń bergen aqparyna qaraǵanda, Alı Zeıdanǵa jemqorlyq pen AQSh arnaıy jasaǵynyń boljam boıynsha «Al-Kaıda» toby jetekshileriniń biri Abý Anas al-Lıbıdi ustaýyna qatysy bar degen aıyp taǵylǵan. Osy aıyptarǵa baılanysty úkimet basshysy ústinen tergeý amaldary bastaldy.
Lıvııa úkimeti bul oqıǵaǵa baılanysty shuǵyl jıyn ótkizdi.
Aıdar О́risbaev.
