Qoǵam • 01 Shilde, 2020

229 oqýshyǵa – «Altyn belgi»

Atyraýda bıyl mektepti 5 286 túlek bitirdi. Olardyń arasynan 11 jyl boıyna úzdik oqyp, túrli bilim báıgesinde juldyzy jarqyraǵan 229 oqýshy «Altyn belgini» ıelenedi. Al 183 túlektiń bilimi «Úzdik attestatpen» baǵalandy. Oblystyq bilim berý basqarmasy basshysynyń mindetin atqarýshy Aqkenje Isanbergenovanyń málim etýinshe, túlekterdiń 4 211-i UBT tapsyrýǵa ótinish beripti. Buǵan qosa kolledjderdi bitirgen 834 túlek te test tapsyrýǵa nıet bildirdi.

Joldasbek KО́ShERBAIULY

О́ńirlik kommýnıkasııalar qyzmetiniń málimetine súıensek, UBT synaǵy ózge óńirler sekildi Atyraýda da 21 maýsymda bastaldy. Sol kúni H.Dosmuhamedov atyndaǵy Atyraý memlekettik ýnıversıtetiniń testileý ortalyǵynda synaqqa 222 túlek qatysty. Test tapsyrýshylardyń barlyǵy sanıtarlyq-epıdemııalyq normalarǵa sáıkes, dezınfeksııalaýdyń bes kezeńinen ótti.

Sodan beri eki aptaǵa jýyq merzim ótse de túlekter jınaǵan joǵary ball týraly birde-bir derek jarııa etilmedi. Alǵashqy kúni, tipti odan keıin synaqta UBT tapsyrǵan túlekterdiń qanshasy joǵary ball jınaǵanyn bilgimiz kelgen edi. Alaıda bul áreketimizden eshteńe ónbedi. Oblystyq bilim berý basqarmasy basshysynyń mindetin atqarýshy Aqkenje Isanbergenova UBT ortalyǵyna siltedi. Al H.Dosmuhamedov atyndaǵy Atyraý memlekettik ýnıversıteti janyndaǵy testileý ortalyǵynyń jetekshisi Aınagúl Dúısekenova telefon tutqasyn kótermedi.

Degenmen Bilim jáne ǵylym mınıstrligi UBT tapsyrýdyń ashyqtyǵy men obektıvtiligin qamtamasyz etýge umtylys tanytyp otyrǵany daýsyz. Osy maqsatta elimizdiń barlyq óńirinde jumys toby quryldy. Onyń quramyna arnaıy monıtorıng toptyń, «Atyraý – adaldyq alańy» jobalyq keńsesiniń ókilderi men agenttik qyzmetkerleri kirdi.

Atalǵan toptyń negizgi maqsaty – testileýdi ótkizýdiń ashyqtyǵyna monıtorıng júrgizý. Máselen, 24 maýsymdaǵy jaǵdaı boıynsha Atyraý oblysynda tyıym salynǵan zattardy alyp ótýge jáne paıdalanýǵa tyrysqan 32 túlektiń ereje buzǵany anyqtalyp otyr. Túlekterdiń keıbiri oqýlyqty jasyryn túrde alyp kirgisi kelipti.

Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń usynǵan málimetine súıensek, osyndaı keleńsizdikterdiń qorytyndysymen testileýge jol bermeý jáne testileý zalynan shyǵarý aktileri jasalypty. Sonyń ishinde Atyraý qalasynda 12, Qyzylqoǵa aýdanynda 4, Maqat aýdanynda 3, Inderde 4, Jylyoıda 6 jáne Isataı aýdanynda 2 jaǵdaı tirkelip otyr.

Árıne «...adam alasy ishinde» degendeı, UBT tapsyrǵan túlekterdiń keıbiri osyndaı keleńsiz áreket jasady. Alaıda olardyń bári birdeı zań buzýshylyqqa barmaǵan shyǵar. Endeshe, atyraýlyq túlekterdiń qanshasy 100-den joǵary ball jınady eken?..

ATYRAÝ