Batys Ýkraınadaǵy Rovno oblysynyń Ostrog degen qalashyǵynda turatyn Mıhaıl Iаkýbovıch degen jas ýkraın ǵalymy «Qurandy» óz tiline aýdaryp shyqty. Bul týraly Ázerbaıjannyń «Dáıárlár» portaly jazdy.
Jıyrma alty jasar ǵalym bul aýdarmamen bes jyl boıy aınalysypty. Onyń kitabynda árbir súreniń túpnusqasymen qosa, mátinge ýkraın tilinde túsindirme berilgen. Ol túsindemelerdi «Qurandy» oqýdyń klassıkalyq bedeldi úlgisine súıenip jasaǵan. Oqyrmandar qazirdiń ózinde qasıetti kitaptyń ýkraın tilindgi nusqasyn Internetten taýyp oqı alady.
Mıhaıl Iаkýbovıch munymen de toqtaǵan joq. Qazirgi tańda «Ostrog akademııasy» ulttyq ýnıversıtetiniń ǵalymdary onyń basshylyǵymen «Qurannyń» Ostrozskıı tárjimalaǵan nusqasyn zertteýde. XVIII-XIX ǵasyrlarda tap osy qalada tatar qaýymynyń jınaqy bolyp turǵany belgili. Sol kezde shyǵarylǵan bul varıant polıak jáne ýkraın tilderinde jazylypty. Biraq mátini arab qaripterimen terilgen.
«Búginde Mıhaıl Iаkýbovıch óziniń ýkraın tilindegi «Qurany» Ýkraınanyń kitaphanalar júıesine keńinen taraýyn armandaıdy», - dep jazady The Kiev Times basylymy osyǵan oraı.
Atap ótý kerek, musylmandardyń qasıetti kitabynyń ýkraın tilindegi tolyq aýdarmasy aldymen Saýd Arabııasyndaǵy korol Fahd atyndaǵy «Qasıetti Quran» baspa jónindegi kesheninde jaryqqa shyqqan. Buǵan deıin bul nusqa Internet arqyly taraǵan.
«Elektrondy nusqa keshende basylyp shyqqan myń betke taıaý baspa óniminiń ózindik bir parallel basylymy bolyp tabylady», - deıdi Mıhaıl Iаkýbovıch.
Onyń aıtýynsha, aýdarma keń aýdıtorııaǵa joldama almas buryn áýeli Saýd Arabııasyndaǵy sarapshy-quranshylardyń qoldaýyna ıe bolǵan. Sonyń ishinde «Arab tiliniń oqýlyǵy» kitabynyń avtory doktor V.Abdýr-Rahım komıssııa tóraǵasy jáne keshenniń aýdarma bóliminiń jetekshisi qyzmetin atqarǵan.
Aýdarmanyń durystyǵy men dáldigi týrasyndaǵy tap osyndaı jumysty «Qurandy» ǵylymı negizde oqýshy musylmandar ortasyndaǵy bedeldi mamandar sheıh Hazım Haıdar men sheıh Omar Havııa oryndaǵan. Sondaı-aq keńesshi retinde Medına jáne Kaırdegi Al-Azhar ýnıversıtetteriniń professory Ahmad ash-Sharkavı qyzmet jasaǵan.
Eske sala keteıik, «Qasıetti Qurannyń» mán-maǵynasyn Valerıı Basyrov jasaǵan ýkraın tilindegi aýdarmasy 2010 jyly jaryqqa shyqqan bolatyn.
Murat Aıtqoja.
