Kásipqoılar arasynda asa aýyr salmaqtaǵy absolıýtti álem chempıony Vladımır Klıchko bıylǵy jyly úsh shaıqas ótkizýdi mejelegen edi. Jyl basynan beri solardyń ekeýi ótti. Al sońǵysyn aǵaıyndy Klıchkolardyń kóp jyldardan bergi áriptesi - RTL telearnasy jeltoqsan aıynyń 14-i kúni kórsetetin bolyp josparlap qoıǵan bolatyn.
Biraq bul shaıqastyń ótpeı qalatyn túri bar. Sebebi, jaqynda Gollıvýdtyń 24 jasar aktrısasy Heıden Panetterıge «quda túsip, syrǵa taǵyp» qoıǵan 37 jasar ýkraın boksshysy Vladımır Klıchko bolashaq jarynyń talabyna saı úılený toıynyń qamyna kirisip, bul matchtan bas tartatyn sııaqty.
«Vzglıad» portalynyń aqparyna qaraǵanda, amerıkalyq kıno juldyzymen bolatyn bul úılený toıy týra 14 jeltoqsan kúni ótetin kórinedi. Alaıda, osy jerde kúıeý jigit pen qalyńdyqtyń arasynda bir ǵana kelispeýshilik bolýy múmkin. Bulaı bolatyny, Vladımır nekelesý rásiminiń Kıevte ótkenin qalasa, Heıden AQSh-ta bolǵanyn qolaı kórip otyr.
Degenmen, bulardyń bir-birine jol beretin de varıanty bar. Mysaly, toıdy Ýkraınada ótkizse, bir aptadan keıin saltanatty muhıttyń arǵy jaǵalaýynda jalǵastyrady.
Sosyn jas jubaılar úshin bal aıy ornaıdy. Olaı bolsa, Vladımırdi 2014 jyldyń naýryzynan buryn sharshy alańnan kútý áýreshilik bolady.
Murat Aıtqoja.
