Osylaısha bıylǵy chempıonat is júzinde jaz sońyna qaraı ǵana «bastalaıyn» dep tur. Eýropa memleketteri karantınnen erte shyqqandyqtan chempıonattaryn da erte jalǵastyryp, qazir óz qalyptaryna kelip úlgerse, qazaqstandyq fýtbol Eýropa lıgasynyń irikteý oıyndaryna daıyndyqsyz barmaq.
Alaıda ózdiginen úı jaǵdaıynda daıyndyqtaryn jalǵastyryp jatqandar da bar. Mysaly, «Astana» sapyna bıyl jańadan qosylǵan, buǵan deıin Kopengagenniń negizgi shabýylshysy bolǵan Peros Sotırıý men elordalyq klýbtyń taǵy bir oıynshysy Dorın Rotarıý da daıyndyqtaryn toqtatqan joq. Bul týraly fýtbolshylar ózderiniń áleýmettik jelidegi paraqshalarynda turaqty habarlap otyrady.
Alaıda, premer-lıga oıynshylarynyń barlyǵy osylaı daıyndyqtaryn jalǵastyryp jatyr deı almaımyz. Kópshiliginiń úı jaǵdaıynda daıyndalý múmkindigi bolmaýy da yqtımal. Onyń ústine, ózdinien jasalǵan daıyndyq chempıonat ýaqytyndaǵydaı qyzý bolmaıtyny anyq.
El boıynsha qatań karantın jarııalanǵanymen, qoǵamdyq oryndar men mekemeler qalypty jumys istep turǵany belgili. Olaı bolsa, Qazaqstan Fýtbol Federasııasynyń premer lıga oıyndaryn toqtatyp qoıǵany aqylǵa qonymsyz. Kórermenderdiń fýtbol tamashalaı almaýy óz aldyna, eń bastysy Qazaqstan atyn Eýropaǵa tanytyp júrgen klýbtar Eýropa lıgasynyń irikteý oıyndaryn múlde daıyndyqsyz bastaǵaly tur. Bul, árıne, komandalardyń oıynyna úlken zııanyn tıgizbek. Máselen, qazaqstandyq komandalardyń irikteý kezeńindegi qarsylastary Shotlandııa, Horvatııa, Kıpr, Izraıl, Belarýs sekildi elderdiń klýbtary saqadaı saı daıyn bolady. О́ıtkeni ol elderde chempıonat qaıta qalypty rejımge tústi. Al Belarýs tipti óz chempıonattaryn toqtatqan joq.
Jyl saıyn irikteý kezinde onsyz da joǵaryda atalǵan elderdiń klýbtarynan súrinip júrgen Qaırat, Tobyl, Ordabasylar bıyl tipti álsiz bolatyny anyq. Al jyl saıyn toptyq kezeńge deıin jetip júretin Astana bıyl irikteý kezeńinen súrinse, tań qalmaımyz.
Sol sebepti Qazaqstan Fýtbol Federasııasy chempıonatty toqtatpaýy kerek edi. Eýropa lıgasynyń irikteý oıyndary 18/19 tamyzda bastalady desek, eki aı karantınnen keıin chempıonat qaıta jalǵasty degen kúnniń ózinde bir aı ýaqyt otandyq klýbtardyń qalypty oıyndaryna túsýine jetpeýi múmkin.
Maǵjan Moldahmet
