Qazirgideı jahandaný zamanynda ulttyq bolmysqa degen kózqaras ózgerip keledi. Desek te qoǵam qaı baǵytqa ózgerse de ulttyq sananyń dertke ushyraýyna jol berilmeýi kerek. Kitaphana alańynda ótken keleli áńgimede osyndaı rýhty taqyryp qozǵaldy.
- Ulttyq bolmysymyz qandaı? Onyń qadirin bilip júrmiz be? Tamyry tereń, tuǵyry bıik, mártebesi joǵary – ol, árıne bizdiń ulttyq bolmysymyz. Ultqa jany ashyp, ulttyń bolmysyn jyrlap ótken uly Abaı, dana Muhtar, Qanysh Sátbaev, Jambyl syndy tulǵalarymyzdyń ózderi nege turady? Garvard ýnıversıtetinen bilim almaı-aq, osy kisiler búkil ulttyń bolmysyn ǵasyrlar boıy urpaqtan urpaqqa aıtyp, jetkizip ketti. Danalar qaldyrǵan sózder talaı jyldar qazaq elin sýsyndatatynyna kúmán joq. Demek, tamyry tereń boılaǵan eldiń tuǵyry qashan da bıik! – degen Yrza Tursynzada eldiń rýhyn kóterip, jigerlendiretin áıel qaýymynyń orny da bıik ekenin tilge tıek etti.
- Qoǵamda áıel qaýymynyń orny árqashan bólek. Dál qazirgi jaǵdaıda kóp kúsh er azamattarǵa túsip turǵany belgili. Sebebi bala-shaǵanyń kúndelikti jeıtin taǵamy, qara qazannyń qamy erlerdiń moınynda. Qıynshylyq túsken sondaı kezde er azamattarǵa qoldaý kórsetetin bizdiń analarymyz emes pe?! Tarıhtan bilesizder, qazaq analarynyń ıyǵyna talaı aýyr júk túsken. Sol qıynshylyqty da jeńip shyqqan qazaq arýlary edi, dedi ol.
Aıta keteıik, jaqynda Yrza Tursynzada etnodızaınerlikke qatysty "Yrza Tursynzada live" ıýtýb kanalyn ashyp, tegin sheberlik sabaqtaryn júrgizgen bolatyn.
