Álemdi alańdatqan ekonomıkalyq daǵdarys Qazaqstandy da sharpyp jatqany belgili. Karantın kezinde ásirese qarapaıym halyqtyń jaǵdaıyn nazardan tys qaldyrýǵa bolmaıdy.
– Úkimet elde áleýmettik turaqtylyqty saqtap, jumyspen qamtýdy qoldaýǵa baǵyttalǵan sharalardy iske asyrýda. Ekonomıkalyq daǵdarysqa qarsy turý úshin bıýdjetten 5 trln 938 mlrd teńge qarjy bólindi. Onyń 3 trln 462 mlrd teńgesi respýblıkalyq bıýdjet esebinen, al 2 trln 476 mlrd teńge bıýdjetten tys qarajat esebinde qarastyryldy. Bul qarjy alda kútip turǵan máselelerdiń aldyn alýǵa jumsalady. Sondaı-aq 250 myń jumys ornyn ashýǵa múmkindik beredi, – dedi B.Sholpanqulov.
Onyń aıtýynsha, búginde koronavırýspen qarsy kúres úshin respýblıkalyq bıýdjetten 191,9 mlrd teńge bólingen. Jaǵdaıǵa baılanysty aldaǵy ýaqytta budan da kóp qarjy qarastyrylýy múmkin.
Baspasóz máslıhaty barysynda spıkerler kásipkerlerdiń alańdaýyna esh sebep joqtyǵyn aıtty. Ulttyq ekonomıka vıse-mınıstri Mádı Tákıev bıznes ókilderiniń salyqtan bosatylǵany salany demeýge septigin tıgizetinin jetkizdi.
– Biz ǵana emes, jalpy álem dúrligýde. Ekonomıkalyq turaqtylyqty saqtap qalý úshin kásipkerlerge kóbirek kóńil bólip jatyrmyz. Memlekettik komıssııa maýsym aıynda bıznesti qoldaý josparyn qabyldady. Nesıelerdi tóleý boıynsha kúntizbelerdi keıinge shegerdi. Arnaıy tártip qarjy naryǵyn retteý agenttigimen 15 maýsymda júıelengen bolatyn. Bankter men mıkrokredıttik uıymdar soǵan saı jumys isteıdi, – dedi ol.
