Antıbıotık keri áser etýi múmkin

Jıyn barysynda Raýshan Qara­ba­eva sımptomsyz koronavırýsty úıde emdeýde qandaı qatelikterge jol bermeý kerek ekenin aıtyp berdi.

«Koronavırýs ınfeksııasynyń sımp­­­­tomy az nemese sımptomsyz naý­qas­­tar úıde emdelýi kerek. Árıne olar ózdiginen em qabyldap ja­t­yr jáne dárigerler mundaı naý­qas­­tardyń em-domyn rettep otyrýy kerek. Koronavırýstyń sımpto­my az túri patogenetıkalyq emdeýdi, dálirek aıtqanda vırýsqa qarsy, antıbakterııalyq, trombqa qarsy preparattar taǵaıyndaýdy qajet etpeıdi. Mundaı pasıentter emdeý-saqtaný rejiminde aqýyzy kóp tamaq jep, suıyqtyqty kóp ishýi kerek. Olarǵa S, D dárýmenderi jáne dene qyzýy kóterilgen jaǵdaıda para­seta­mol, ıbýprofen syndy qyzý túsiretin dáriler taǵaıyndalady», dedi dáriger.

Onyń aıtýynsha, S dárýmeniniń úlken dozasy taǵaıyndalǵan jaǵdaıda, búırek aýrýlarynyń, nesep-tas aýrýy­nyń kúsheıýi múmkin ekenin este saqtaǵan jón. Eger dene qyzýy 38 gradýstan asqanda, bulshyq et aýyryp, álsizdik baıqalsa, bas aýyryp, jótel paıda bolsa, keýde tusy aýyrsa, dáriger­ge júginip, ókpe qabynýynyń aldyn alý kerek. Ol úshin kókirek qýysyna rent­genologııalyq zertteý nemese kom­pıý­terlik tomografııa júrgiziledi.

«Koronavırýs ınfeksııasyndaǵy etıotropty (negizgi) em – vırýsqa qarsy preparattar taǵaıyndaý. Qazirgi ýaqytta KVI emdeý úshin Lopınavır/Rıtonavır, Gıdroksıhlorohın, Favıpıravır jáne Remdesevır syndy dárilik zattar jazylady. Bul rette atalǵan dárilerdiń belgili bir qaýip tóndiretinin, júrek pen baýyrǵa ýytty áser etetinin atap ótken jón. Osyǵan baılanysty sımptomy az jáne sımp­­tomsyz naýqastarǵa bul dárilerdi ózdiginen qabyldaýdyń qajeti joq», dedi R.Qarabaeva.

Sonymen qatar ol antıbıotık naý­qastyń ımmýnıtetin odan ári tómen­detetinin tilge tıek etti.

«Qazirgi ýaqytta KVI juqtyr­ǵan­dardyń esh qadaǵalaýsyz antıbıotık qabyldap jatqanyn baıqadyq. Antı­bıot­ıkter aǵzanyń ımmýndyq ja­ýabyn qalyptastyrýǵa qajetti ishek mıkroflorasyn buzady. Sáı­ke­sin­sh­e, pasıenttiń ımmýnıteti odan ári tómendeı túsedi. Adam boıynda antı­bıo­tıkti sezbeıtin mıkroaǵzalar shtamy paıda bolady jáne keleshektegi bakterııalyq ınfeksııalardy emdeý isine yqpal etedi», dedi R. Qarabaeva.

Buǵan qosa ol aýyr ınfeksııalarda ǵana qoldanylatyn rezervti antı­bıotıkterdiń de paıdalanylyp jat­qa­ny­na alańdaýshylyq bildirdi.

«Oǵan jol berýge bolmaıdy, sebebi pasıenttiń jaǵdaıyn odan ári aýyrlatýy múmkin. Bakterııalyq komponent bolǵan kezde koronavırýs­­­ty antıbıotıktermen tek dárigerdiń nusqaýymen ǵana emdeý qajet», dedi R.Qarabaeva.