Saıasat • 14 Shilde, 2020

Alash aza tutqan kún

30 ret kórsetildi

Alash jurty azaly. Resmı má­limetke sensek, búginde Qa­zaq­­­stannyń 59 899 azamaty ko­­rona­vırýs ınfeksııasyna shal­dyǵyp, sonyń 34 190-y dertten aıyǵypty.

О́kinishtisi sol, 375 otandasymyz indet quryǵynan qutylyp kete alǵan joq. Qazaq eli qara jamylǵanda el Prezıdenti Qasym-Jomart Toqaev 13 shildeni – Ulttyq aza tutý kúni dep ja­rııa­lady. Memlekettik Týdy tó­men tú­sirip, halqymyz pandemııa qur­ban­daryn bir mınýt únsizdikpen eske aldy...

Iá, alapat indet alqymnan alǵan saıyn asyl azamattardan aıyrylyp jatyrmyz.

Et jaqynyn jer qoınyna tabystaǵan ár shańyraqtyń shemen-sheri – otandastarymyzǵa ortaq qaıǵy. Mundaıda «tas – túsken je­rine aýyr» deýshi edi dana hal­qymyz.

О́zekti ókinishtiń órti qary­ǵan saıyn qabyrǵamyz qaıysyp, buǵanamyz maıysady. Kúndiz kúlkiden, túnde uıqydan aıy­ryl­dyq. Apat aıtyp kelmeıdi eken. Tóbemizden oq ushyp, jaý ja­ǵadan almaı-aq aıdyń, kúnniń amanynda qynadaı qyrylamyz dep kim oılaǵan?! Oılamadyq qoı sol. Boıymyzda beıqamdyq, oıymyzda senbestik boldy. Dúnıe júzi dúr­ligip jatqanda apat Qazaq elin aınalyp ótedi dep sendik. Tyǵylyp toı jasap, qydyryp qonaqqa bar­dyq.

Qazaq halqynyń basyna tóngen alǵashqy qasiret pe edi bul? Joq. Aspanymyzdy bult torlaǵan zul­mat jyldardy buǵan deıin de kóp kórdik. Asharshylyq pen saıası qýǵyn-súrginniń, nebir surapyl soǵystyń kózi tiri kýágerleri bar aramyzda. Ol ol ma, elimiz egemendik alǵannan beri de segiz ret aza tutyp úlgergen ekenbiz. Toǵyzynshysy – topan sý emes, kózge kórinbeıtin vırýstyń kesirinen jarııalandy. Memlekettik týdy toǵyz márte tómen túsirdik! О́ńge emes, eldiń yntymaǵy, yrysy men berekesi jeńdi sol qasiretterdi. Bul joly da solaı bolmaq.

«Biz – talaı zobalań men synaq­ty bastan ótkergen, tarıhtyń talaı daýylyna boı bermegen halyqpyz. Batyr babalardyń jolyn jalǵaǵan búgingi urpaq ta qazirgi qıyndyqqa tótep beredi dep senemin. Bálkim, bul bizdiń birligimizdi baıqaý úshin berilgen synaq shyǵar. Bir jeńnen qol, bir jaǵadan bas shyǵaryp uıymdasa bilsek, bul synnan da ótermiz», dep Memleket basshysy da syn saǵatta halqynyń qasynan tabylyp, ultty uıystyra bildi. «Sal­maqty, sabyrly bolaıyq!» dedi.

Ulttyq aza tutý kúni indet qur­bandaryn eske alý is-sharalary Qazaqstannyń túkpir-túkpirinde qol­ǵa alyndy. Respýblıkalyq jáne jergilikti radıostansııa­lar men telearnalar oıyn-saýyq baǵdarlamalary men jarna­malardy taratýdy toqtatty. Qur­bandardy únsiz eske alý rásimi respýblıkanyń barlyq aımaǵynda ótti. Bas múftı Naýryzbaı qa­jy Taǵanulynyń bastamasymen eli­mizdegi respýblıkalyq, ob­lys­tyq iri-iri meshitter men me­dre­se­lerde, qarılardy daıarlaý orta­lyq­tarynda Quran qatym oqyldy.

Shyǵys Qazaqstan oblysynda indet saldarynan jıyrmadan astam adam kóz jumǵan edi. Sonyń arasynda medısına salasynyń qyzmetkerleri de bar. Qaraly kún­de oblys turǵyndary qaza tap­qandardyń otbasylaryna kóńil aıtyp, qaıǵylaryna ortaqtasty.

Aqtóbe oblysynyń barlyq memlekettik mekemelerindegi, uıym­­dar men kásiporyndardaǵy Mem­­lekettik tý tómen túsirilip, oblys ákimi Ońdasyn Orazalın, ob­lystyq máslıhattyń depýtattary, Qoǵamdyq keńestiń músheleri bastaǵan oblys turǵyndary pandemııa qurbandaryn bir mınýt únsizdikpen eske aldy.

Pavlodar oblysynyń ákimi Ábilqaıyr Sqaqov pen onyń oryn­basarlary, quqyq qorǵaý organ­darynyń basshylary, Nur Otan partııasynyń ókilderi oblystyq ákimdiktiń aldyndaǵy alańda jınalyp, indet qurbandaryn bir mınýt únsizdikpen eske aldy.

Ulttyq aza tutý kúni Batys Qa­zaq­­stan oblysynda da birneshe sha­ramen atalyp ótipti. Iаǵnı Tuńǵysh Prezıdent alańyndaǵy Memlekettik tý tuǵyrynda, ob­lystyq perınataldyq ortalyq jáne oblystyq ákimdik ǵımaraty aldynda ótken sharada jınalǵan óńir basshylary, turǵyndar men dárigerler covid-19 qurbandaryn, osy indetpen kúreste qaza tapqan árip­testerin bir mınýt únsiz turyp eske aldy. Osyndaı is-sharalar barlyq oblysta ótkenin taǵy da qaıtalap aıtamyz.

«Sabyr túbi – sary altyn!» «Úreı – derttiń jarymy, sabyr – emniń jarymy, tózim – saýyǵýdyń basy» demep pe edi medısına ǵylymynyń atasy atanǵan Ibn-Sına. Bizge de sol tolaǵaı tózim men sarabdal sabyr qajet. «Jip birikse – arqan bolar, er birikse – qalqan bolar». Arqanymyz úzilmese, birligimiz mújilmese, biz jeńbeıtin dert te, biz sóndire almaıtyn órt te bolmaıdy.

 

Sońǵy jańalyqtar

Aq úıdiń alǵashqy meımany

Álem • Búgin, 12:15

ShQO-da mal urylary ustaldy

Aımaqtar • Búgin, 11:00

Uqsas jańalyqtar