«Biz onlaın kanıkýlda...»

Aımaqtar • 15 Shilde, 2020

«Biz onlaın kanıkýlda...»

Bıyl óńirde Pavlodar oblystyq bilim basqarmasy 1-10-synyp oqýshylarynyń jazǵy demalys barysyn mamyr aıynda josparlaǵan bolatyn. Iаǵnı jazǵy kanıkýl kezeńinde óńirdegi epıdemııalyq jaǵdaı sharttaryn oryndaı otyryp, balalardyń jazǵy demalysyn dástúrli nemese qashyqtyq formatta ótkizý baǵdarlamasy ázirlendi.

Farıda BYQAI

Qazir jazǵy demalys, saýyqtyrý jáne bos ýaqytty ótkizý sharalaryna 105 myńnan asa oqýshy qatysyp, 5587 oqýshy eńbekke aralasty. Olardyń ishinde ormanshylyqtarda 193 oqýshy, kásiporyndar men sharýa qojalyqtarynda 3472, joǵary synyp oqýshylarynyń eńbek jasaqtarynda 1922 oqýshy jumys isteýde. Sondaı-aq, elimizdegi epıdemııalyq jaǵdaıǵa baılanysty balalardyń jazǵy demalysyn onlaın-formatta ótkizý de jalǵasyp jatyr. Bul maqsatta bilim basqarmasy jazǵy demalysty uıymdastyrý boıynsha ádistemelik usynymdar, balalardyń bos ýaqytyn ótkizý jáne úı jaǵdaıynda jumyspen qamtylýyn úılestirýge baǵyttalǵan qashyqtyq jobalar keshenin ázirledi. Iаǵnı oblystyń qosymsha bilim berý uıymdary «Demalys OFF-line «Mektep janyndaǵy lageri» oblystyq qashyqtyq jobasyn iske asyrýda.

Maı aýdany Kóktóbe aýyly mektebiniń dırektory Sanııal Zilkenovtiń aıtýynsha, jazǵy demalys kezinde qashyqtyqtaǵy lager jumysy jalǵasýda. Barlyq oqýshylar ınstagram paraqshasyna qosylyp, mektep jospary boıynsha bólingen baǵyttarda jumystaryn bólisip turady. Jaz boıy oqýshylar muǵalimderdiń baqylaýynda bolady.

Qazir oqýshylar arasynda qashyqtan «Týǵan jer» ekologııalyq baıqaýy ótýde. Baıqaýǵa qatysýshy aýyl, qala balalary karton qaǵaz qoraby, plastık quty, tyǵyn, polıetılen paket, qaǵaz, folga, mata qıqymy sııaqty tolyp jatqan ártúrli jaramsyz zattardan qoldan buıymdar jasaıdy. Al oblys ortalyǵyndaǵy oqýshylar «Qalamyzdy taza ustaıyq» ekologııalyq sýretter baıqaýynda kósheler, úıler, saıabaqtar, eskertkishter, turǵyn úılerdi qoqystardan qalaı qorǵap, saqtaý kerek ekenin sýretke salyp beıneledi. Oqýshylardyń ekologııalyq taqyrypta salǵan sýretteri eresekterge oı salarlyqtaı. Qaladaǵy M.Áýezov atyndaǵy mekteptiń oqýshysy Aıanat Sársembınovanyń «Qalamyzdyń ortalyq ózen jaǵalaýy. Sahna» sýreti, sondaı-aq №21 mekteptiń oqýshysy Evelına Galıpadtyń «Dostar, bári de jaqsy bolady!» sýreti, №19 mekteptiń oqýshysy Almıra Ilııasovanyń «Máshhúr Júsip atyndaǵy meshit» syndy sýretteri júldeli oryndarǵa ıe boldy. Al oblys ortalyǵyndaǵy «Sırıýs» lageriniń birinshi maýsymy «Barlyǵymyz birge demalyp, birge úırenemiz!» degen taqyrypta ótti. Eki apta boıy 70-ten astam bala túrli is-sharalar men konkýrstarǵa toly ýaqytty ótkizdi. Buǵan deıin úırengenderin umytpaı, onlaın oqı alady, endi balalar mektep onlaın-lagerine «barýdy» da esh qıyndyqsyz «Biz onlaın kanıkýlda júrmiz!» degen qyzyqty kóńilmen jalǵastyrýda.

Sonymen qatar árbir aýdan men qalada balalardyń demalysyn onlaın-formatta ózindik jobalar iske qosyldy.

– Balalardy mýzykalyq aspaptarda oınaýǵa úıretý boıynsha tegin onlaın-kýrstar, qyzyǵýshylyqtary boıynsha taqyryptyq sabaqtar, áńgimelesý saǵattary, shyǵarmashylyq kezdesýler, toptyq sheberlik saǵattar, murajaıǵa jáne qasıetti oryndarǵa vırtýaldy ekskýrsııalar, baıqaýlar, vıktorınalar, sporttyq jarystar uıymdastyrylýda, – dedi bilim basqarmasynyń ókilderi.

Pavlodar oblysy