Almaty tórinde – álem boksy!

14-26 qazan aralyǵyndaǵy bul dodaǵa dúnıe júziniń 111 elinen 457 bylǵary qolǵap sheberi qatysady

Qazannyń 14-i kúni Almatydaǵy Balýan Sholaq atyndaǵy sport kesheninde bokstan álemniń XVII chempıonaty bastaldy. Báseke 26 qazanda márege jetedi. Osy birinshilikti qabyldaý arqyly Qazaqstan óziniń tarıhynda tuńǵysh ret sporttyń olımpııalyq túri boıynsha jahandyq jarys ótkizý quqyǵyna qol jetkizdi. Munyń ózi qazirgi tańda respýblıka boks federasııasynyń halyqaralyq deńgeıdegi zor bedeli men elimiz boksshylarynyń álemdik deńgeıdegi eń bıik týrnırlerde qol jetkizip kele jatqan eleýli jetistikteriniń arqasynda múmkin boldy.

14-26 qazan aralyǵyndaǵy bul dodaǵa dúnıe júziniń 111 elinen 457 bylǵary qolǵap sheberi qatysady

Qazannyń 14-i kúni Almatydaǵy Balýan Sholaq atyndaǵy sport kesheninde bokstan álemniń XVII chempıonaty bastaldy. Báseke 26 qazanda márege jetedi. Osy birinshilikti qabyldaý arqyly Qazaqstan óziniń tarıhynda tuńǵysh ret sporttyń olımpııalyq túri boıynsha jahandyq jarys ótkizý quqyǵyna qol jetkizdi. Munyń ózi qazirgi tańda respýblıka boks federasııasynyń halyqaralyq deńgeıdegi zor bedeli men elimiz boksshylarynyń álemdik deńgeıdegi eń bıik týrnırlerde qol jetkizip kele jatqan eleýli jetistikteriniń arqasynda múmkin boldy.

Syndarly saǵat syńǵyrlap soqty

Endi tikeleı chempıonattyń ózi týraly. Áýelgide Almatydaǵy chempıonatqa buryn-sońdy bolmaǵan mólsherde saıyskerlerdiń qatysqaly turǵany biraz áńgimeniń deregine aınalǵan. Sol tustary aıtylǵan sıfr­lar munda 116 eldiń 576 sportshysy tóńireginen órbigen. Rasynda da bul kórsetkish tirkelse, osynyń aldynda, 2011 jyly Bakýde ótken chempıonattaǵy 113 eldiń 570 boksshysy deńgeıinen sál de bolsa artyqshylyq tanylyp, jańa rekord dúnıege kelgen bolar edi. Biraq, jeme-jemge kelgende, kórsetilgen kólemdegi nátıje júzege aspaı qaldy. Nátıjesinde Almatyda 111 eldiń 457 boksshysy medaldardy sarapqa salýshylar qatarynan tabyldy.

Bul chempıonattyń taǵy mynadaı bir «qupııasy» bar. Ony ótkizý jónindegi sheshim 2011 jylǵy 1 tamyzda Astanada kadetter arasyndaǵy álem chempıonaty aıaqtalǵan boıda shaqyrylǵan Halyqaralyq boks federasııasy (AIBA) Atqarý komıtetiniń májilisinde qabyldandy. Biraq ol kezdegi uıǵarymda Almatynyń emes, Astananyń aty atalǵan bolatyn. Kelesi, 2012 jylǵy 12 sáýirde Astanada AIBA men Qazaqstan boks federasııasy arasynda 2013 jylǵy álem chempıonatyn bizdiń elimizde qabyldaý týrasyndaǵy kelisimge qol qoıý rásimi jasaldy. Onyń saltanatyna AIBA prezıdenti Chıng-Kýo Vý men Qazaqstan boks federasııasynyń prezıdenti Tımýr Qulybaev qatysty.

Keıinirek chempıonat Almatydaǵy Balýan Sholaq atyndaǵy sport keshe­ninde ótkiziletin bolyp birjola bekidi. Shamasy, bul jerde bir jarym mıllıonǵa jýyq halqy bar ári erteden boksqa degen qushtarlyǵy qalyp­tasqan ońtústik astananyń bul jónin­degi áleýeti joǵary ekeni de eskeril­se kerek. Buǵan qosa, jyldyń osy ýaǵynda tústiktegi shahardyń aýa raıy jaǵdaıynyń táýirleý bolatyny da qaperde bolǵan sııaqty. Osyǵan oraı chempıonatty ótkizý jónindegi uıymdastyrý komıteti qurylyp, ony basqarý Almaty qalasynyń ákimi Ahmetjan Esimovke júkteldi. Birden aıta keteıik, ózderine berilgen ýaqyt aralyǵynda komıtet óte jaqsy jumys jasady. Bul chempıonattyń resmı ashylýy saltanaty kezinde de atap ótildi. Sonymen birge, álemniń eki dúrkin chempıony, London Olımpııalyq oıyndarynyń chempıony, Qazaqstan boks federasııasynyń sporttyq dırektory Serik Sápıev budan birneshe kún buryn-aq birinshiliktiń jartylaı fınaldyq jáne fınaldyq shaıqastary bıletteriniń túgel pyshaq ústinen úlestirilip ketkenin málimdep qoıdy. Osynyń bári elimizdiń tarıhynda alǵash ret ótkizilip otyrǵan bul chempıonat úshin Almatynyń beker tańdalyp alynbaǵanyn kórsetedi.

«Alǵash ret» demekshi, bokstan álem chempıonatynyń shejiresinde Qazaqstan ony qabyldap otyrǵan keshegi keńestik júıeniń úshinshi eli bolyp otyr. Bizde birinshi ret ol áli Keńes Odaǵy taramaı turǵan kezde, 1989 jyly Máskeýde ótken edi. Ekinshisi 2011 jyly Ázerbaıjannyń bas qalasynda kógen jazdy. Endi, mine, úshinshi el retinde Almatynyń aty shyǵyp otyr. Al, jalpy, bul birinshilikti AQSh (3) pen Germanııadan (2) basqa elder qaıtara qabyldap kórgen joq. Osy oraıda Almaty rınginiń tarıhta qalatyn aıryqsha bir ornyqty tusy bolyp tur. Munda AIBA-nyń sheshimimen kóp jyldardan beri birinshi ret boksshylar shlemsiz shaıqasyp jatyr. Osydan bastap álemdik deńgeıdegi barlyq iri halyqaralyq jarystar osylaı ótetin bolady. Bul tártip tek áıelder, jasóspirimder men jastar arasynda ótetin baıraqty básekelerge júrmeıdi. Shyndyǵy kerek, kóptegen mamandar 1986 jyly boksshylar sharshy alańǵa qorǵanysh bas kıimin kıip shyqqan kezden munyń bokstyń kórkemdigine kedergi keltiretinin aıtyp, qarsylyq bildire bastaǵan edi. Eń aldymen, dárigerler ún qosyp, shlemniń judyryqshy jigit­terdi jaraqattardan saqtap qala qoımaı­tynyn, kerisinshe onyń soqqynyń aýqymy jaıylyp, ulǵaıyp tııýge bas­taıtynyn ýájge tartqan. Keı jaǵdaıda tipti shlemniń paıdasynan góri zııany kóp bolyp shyǵatyny da baıqaldy. Aıtalyq, sportshylar onyń qorǵanys qaýqaryna úmit artyp, urystar kezinde bastaryn soqqyǵa ózderi tóseı beredi. Osylaısha budan mıǵa keletin zalaldardy esten shyǵaryp alady.

Almatydaǵy ekinshi jańalyq, munda shaıqastar upaılaryn esepteý de jańa júıe boıynsha júrgizile bastady. Ol kásipqoı bokstaǵydaı on baldyq ólshem birligine kóshti. Bul júıe eń aldymen, boksshylardy buryn baıqalyp kelgen jalǵyz-jarym soqqylarmen upaı jınap alý, birer ret kúırete uryp ótip, tas túıin qorǵanysqa kete qoıý taktıkasyn umytýǵa jeteleıdi. Aınalyp kelgende, ol naqty jekpe-jektegi shyn myqtyny anyqtaýǵa anaǵurlym ádil jol ashyp beredi. Muny dál qazirgi kúnderi Almaty rıngi de anyq baıqatyp jatyr. Osynyń bári boks óneriniń baıyrǵy ádemiligi men tartymdylyǵyn qalpyna keltirý maqsatynda qolǵa alynýda. Bul jaıynda 14 qazan kúni, chempıonat bastalýǵa bir saǵat ýaqyt qalǵan shaqta ótkizilgen baspasóz máslıhatynda da birshama taratyp aıtyldy. Onda buqaralyq aqparat quraldary ókilderiniń aldyna shyqqan AIBA prezıdenti Chıng-Kýo Vý men álem chempıonatynyń sýpervaızeri Helmýt Ranze jýrnalısterdiń osy ózgeristerge jáne birinshilikke qatysty basqa da kóptegen suraqtaryna egjeı-tegjeıli jaýap berdi. Atalmysh másele osydan eki kún buryn, 12 qazanda shaqyrylǵan AIBA-nyń tehnıkalyq keńesinde de keńinen sóz bolǵan. Halyqaralyq uıym prezıdentiniń aıtýynsha, kongress óte joǵary deńgeıde ótip, ishki uıymdastyrý jumystaryn jolǵa qoıýda, federasııalar ókilderiniń pikirlerin ortaǵa salýlaryna keńinen jol ashýda úlken ilgeri jyljýshylyq bar ekenin tanytqan.

«Men osy chempıonattyń ótýiniń ózin revolıýsııalyq jáne tarıhı oqıǵa dep baǵalaǵan bolar edim, – dedi baspasóz máslıhatynda Chıng-Kýo Vý. – Bul – Qazaqstannyń AIBA egıdasy astynda birinshi ret iri halyqaralyq jarysty ótkizýi emes. Endeshe, bul chempıonat ta sol kezderdegideı tıisti deńgeıde uıymdastyrylyp ótkiziledi dep oılaımyz». Uıym basshysy óziniń sózinde osy baıraqty báseke aıasynda úsh túrli sharany ótkizý josparlanǵanyn da aıtyp ótti. Olardyń birinshisi – tehnıkalyq keńes týraly álginde sóz etildi. Budan bólek, onda AIBA-ǵa múshe elder úshin jańa eseptegish máshıneler bólinip berilgen. Ekinshi shara chempıonattyń ashylý rásimi bolyp tabylady. Al úshinshi mańyzdy sharýa 24 qazan kúni Almatyda ashylatyn AIBA-nyń Búkilálemdik boks akademııasy bolmaq. Ázirge álemde tap mundaı qurylym bolǵan emes. Endi munda jer betinde birinshi ret tek jahan­­­nyń túkpir-túkpirinen jınalǵan boks­shylar ǵana emes, sonymen qatar, jattyq­­tyrýshylar men tóreshiler, menedjerler men demeýshiler bas biriktirip turady.

Sóziniń sońynda AIBA prezıdenti chempıonatqa qatysty barlyq tirlikterdi osynshalyqty aýqymdy da joǵary deńgeıde uıymdastyryp otyrǵany úshin, Boks akademııasyn der kezinde qatarǵa qosqany úshin Qazaqstan boksynyń basshysy Tımýr Qulybaev arqyly búkil federasııa ujymyna alǵys sezimin bildirdi. «Men osyndaı qamqorlyqtyń, osyndaı qamqor basshylardyń arqasynda Qazaqstan óte jaqyn aralyqta kúlli álemdegi bokstyń ortalyǵyna aınalady dep senemin», – dedi ol osy sózdiń syńaıynda.

Osy baspasóz máslıhatynan keıin sharshy alańdaǵy shaıqastardyń da tıegi aǵytyldy. Ol 52 jáne 90 kıloǵa deıingi salmaqtar dárejeleri boıynsha 1/32 fınaldyq irikteý urystary túrinde qolǵa alyndy. Al chempıonattyń kúndizgi jáne keshki sessııalary arasyndaǵy úzilis sátinde onyń saltanatty ashylý rásimi de kerýen kerdi. Ol erekshe bir kórinisterge toly qalypta ótti. Lazerli shoý, kóne qobyzdan tarqaǵan zamanaýı sıpattaǵy sony saryn, boks týraly jańa ánniń tusaýkeseri syndy baǵdarlama arqyly kórermenderin baýrap alǵan kórinister kórgen jannyń kóz aldy men kókireginde máńgi qalyp qoıatyny kúmánsiz. Eń bas­tysy, ondaǵy negizgi ıdeıa Qazaqstan boksynyń 80 jyldyǵyn pash etýge arnaldy. Muny óziniń sózinde dańqty boks­shy, AIBA Atqarý komıtetiniń múshesi, Qazaqstan boks federasııasynyń vıse-prezıdenti Serik Qonaqbaev ta erekshe atady. «Álem dodasynyń elimizde bokstyń órken jaıǵanyna 80 jyl tolatyn jyly ótkizilip otyrǵanynda da sımvoldyq mán bar», – dedi ol. Al jıyndy Ahmetjan Esimov ashty. Ol mundaı álemdik deńgeıdegi jarysty ótkizý qala basshylyǵy men jurtyna eki túrli nárseni artatynyn jetkizdi. Bulardyń birinshisi – maqtanysh sezimi, ol qazaq boksynyń álemdegi búgingi ornyn tanytady, ekinshisi – jaýapkershilik sezimi, ol birinshilikti joǵary deńgeıde ótkizýdi talap etedi. «Biz osynyń ekeýiniń de deńgeıinen kórinýge umtylamyz», – dedi ol. Budan keıin chempıonatqa qatysýshy boksshylar atynan Qazaqstan quramasynyń kapıtany Danııar Eleýsinov sóz alyp, sharshy alańda adal shaıqastyń úlgisin ustanatyndary jóninde ant berdi. Kelesi kezekte Chıng-Kýo Vý álem birinshiligine kelýshilerdi osy úlken jaryspen quttyqtady. Al chempıonatty Serik Qonaqbaev ashyq dep jarııalady.

Barlyǵynyń sońynan chempıonatqa qatysýshylardyń sherýi dúrkirep ótti. Onda uıymdastyrýshylardyń aıryqsha taýyp ketken jeri sharany osy kezge deıin túrli halyqaralyq arenalarda Qazaqstannyń dańqyn shyǵarǵan baıyrǵy bylǵary qolǵap sheberlerine qurmet kórsetýden óris aldyrǵany boldy. Budan soń jahandyq jarysqa kelgen barlyq atlet qaz-qatar sap túzedi. Olardyń kerýenin Qazaqstannyń aspan tústes baıraǵyn jelpildetip kóterip shyqqan Ádilbek Nııazymbetov bastady.

Sonymen, Almatyda kópten kútken álem chempıonatynyń tusaý kesýi de tarıhı shyndyqqa aınaldy. Syndarly saǵat syńǵyrlap soqty. Ol dúbirli dodany uıymdastyrýshylar úshin de, oǵan qatysyp jatqan sańlaqtarymyz úshin de naǵyz syndarly kezeń bolmaq.

Keshegi kúnniń búgingi áńgimesi

Almatyda ótip jatqan álem chempıo­­­natynyń taǵy bir erekshe atalyp ótetin jaıy, ol Qazaqstan boksyna 80 jyl tolyp otyrǵan bıylǵy kezeńmen tuspa-tus kelip otyr. Elimizdegi tuńǵysh boks seksııasy budan týra 80 jyl buryn, 1933 jyly tap osy Almaty qalasynda óziniń irgesin kóterip edi. Qazaq boksynyń shyn mánindegi atasy bolyp tabylatyn Shoqyr Bóltekulynyń arqalap kelgen qol­ǵabynyń arqasynda «Temp» dep atalatyn sport qoǵamynda búr jarǵan sol shaǵyn uıym keıindeý «Medık», «Dı­­­­na­mo» bolyp keńge qanatyn jaıa bastady.

Sodan bergi Qazaqstan boksy udaıy dúrmekti damý ústinde keledi. Ke­shegi ke­ńes zamanynda Mahmut Oma­rov­tyń 1947 jyly ótken Odaq birin­­­shi­li­­ginde Qazaqstan úshin tuńǵysh qola medaldy jeńip alýynan bastalǵan bul uzaq ta ulan joldyń júlgesinde respýblıka barlyq deńgeıde de eń bıik belesterden kórine bildi. Sonyń arqasynda qazaq boksynyń ókilderi KSRO chempıonattarynda 35 altyn, 42 kúmis jáne 80 qola medal jeńip alyp, bul jónindegi básekede ózinen halqynyń sany áldeneshe ese kóp Reseı men Ýkraınadan keıingi úshinshi orynǵa berik taban tiredi.

Arǵy-bergi zamandardy túgel súzip ótkende, Qazaqstan boksshylarynyń Olımpııalyq oıyndarda 6 altyn, 7 kúmis jáne 5 qola medal alǵanyna kóz jet­­­kizer edik. Álem chempıonattarynda alǵan júldelerimiz sany bolsa, 7 altyn, 8 kúmis jáne 10 qola medalmen ólshenedi. Bastaýyn 1979 jyldan alǵan Álem kýbogy jolyndaǵy saıys osydan birneshe jyl buryn komandalyq jarysqa ulasyp ketkenge deıin bizdiń tarlandarymyz 4 altyn, 4 kúmis jáne 6 qola medal alyp úlgerdi. Keshegi Odaq kezeńinde res­pýblıkanyń boksshylary 5 altyn, 1 kúmis jáne 5 qola medal alyp keldi.

Elimiz egemendikke jetken jyldardan bastap bizdiń baǵlandarymyz Azııa qurlyǵynyń barlyq saıystarynda derlik atoı sala bastady. Sonyń arqasynda jıyrma jylǵa jetpeıtin ýaqyttyń ishinde Qazaqstan bylǵary qolǵap sheberleri Azııa oıyndarynda 10 ret top jaryp, 9 ret fınalda shaıqassa, 9 márte úshinshi orynǵa kóterildi. Al kontınent birinshiligindegi tabystarymyz budan da zor. Olarda bizdiń saıypqyran jigitterimiz 35 altyn, 11 kúmis jáne 16 qola medaldy qorjynǵa saldy.

Endi, mine, sol dańqty ulandary­myz­dyń aldynda taǵy da sol alǵan asýlardan tómen túspeý mindeti tur.

Alǵashqy urystar, alǵashqy uıǵarymdar

Kúni keshege deıin Almaty rınginde úsh kúndik irikteý shaıqastary bolyp ótti. Olarda ázirge tek 91 kılodan aýyr salmaqtaǵy boksshylar ǵana sharshy alańǵa shyqqan joq.

Jahandyq jarysty 14 qazan kúni 52 jáne 91 kıloǵa deıingi salmaqtylar bastady. Álem birinshiliginiń jańa erejesine saı, alań ıeleri týrnırdiń birinshi aınalymyna qatysqan joq. Olar chempıonatqa ekinshi aınalymnan qosylady. Al ǵalamdyq shaıqastar shymyldyǵyn 52 kıloǵa deıingi salmaqtaǵy angolalyq Vıvaldo Rodrıges pen amerıkalyq Malık Djekson ashty. Biraq urys uzaqqa sozylǵan joq. Ol ekinshi raýndtyń basynda muhıttyń arǵy jaǵynan kelgen sańlaq qarsylasyn eki ret nokdaýnǵa jibergesin toqtady. Al kelesi rıngte moldovan Aleksandr Ryshkan chempıonatqa AIBA týy astynda qatysýshy úndi Madan Laldy tize búktirdi. Osy jerde bizdiń jankúıerler avstralııalyq Endrıý Moloneı men Shrı-Lanka ókili Dralıka Pattıachchıge kóbirek kóńil bóldi. Sebebi, kelesi aınalymda bulardyń jeńgeni bizdiń Ilııas Súleımenovpen ustasatyn edi. Urys birazǵa deıin teń jaǵdaıda ótti. Alaıda, ýaqyt uzaǵan saıyn qurlyq-memlekettiń sportshysy basym bola tústi.

Keshki sessııadaǵy urystar da asa tartysty ótti. Degenmen, sonyń ózinde naqty jekpe-jekte kimniń utqanyn bilýge bolatyn edi. Máselen, lıtvan Tadas Tamashaýskastyń fın Tomı Honkanyń bir soqqysyna eki, keıde tipti úsh soqqymen jaýap bergenin kórmeý múmkin emes edi. Bolgar Aleksandar Aleksandrovtyń jeńgeni de esh daý týǵyzǵan joq. Tájik Shahrıer Ahmedov te ýkraın Aleksandr Shepelıýkti erkin jeńdi. Al venger Norbert Kalýza men afrıkalyq Iýstın Grassanyń shaıqasy óte qııan-keski deńgeıde órbidi. Munda sál de bolsa majar jigitiniń artyqshylyǵy baıqaldy.

Chempıonatta 15 qazan kúni rıngke 60 jáne 64 kıloǵa deıingi salmaqtardaǵy bylǵary qolǵap sheberleri kóterildi. Mundaǵy qazaqstandyq jankúıerlerdiń nazary 64 kıloda tórtinshi jup bolyp kúsh synasqan shotland Djosh Teılor men trınıdadtyq Akıel Oýtaram ara­syndaǵy jekpe-jekke aýdy. Nátıjesinde bulardyń aldyńǵysy basym tústi – 3:0. Ol endi bizdiń Mereı Aqshalovqa qarsy shyǵady. Bul kúngi urystardyń shy­myldyǵyn 60 kılo salmaqtaǵy nıgerııa­­­lyq Oto Djozef pen kosovolyq Lırıdon Zekırı ashty. Munda afrıkalyq jigittiń dene kúshi basym ekeni baıqaldy. Alaıda, qorǵanysta kóbirek kóringen alban atletiniń soqqylary dálirek tıip jatty. Sondyqtan tóreshiler de jeńisti soǵan ustatty. Izraıl boksshysy Almog Brıga men ırland Shon MakKomb taıtalasynda ejelden boks dástúri jaqsy qalyptasqan Brıtanııa aralynyń arlany alymdylyq tanytty.

Ázirge áldeqandaı bir sensasııa týraly aıtýǵa erte. Sebebi, jarystyń bul kezeńinde negizinen osaldaý, tipti bir-birimen shamalas boksshylar kezdesetin bolǵandyqtan, kimderdiń basym shyǵatynyn aldyn-ala boljaı da alasyń, al teń deńgeıli sheberler kezdesýinde kim jeńse de tań qala qoımaısyń. Degenmen, keshki sessııadaǵy keıbir shaıqastardyń qorytyndy nátıjeleri eptep tańdanys týdyryp ketkenin de jasyrmaımyz. Mysaly, Ýkraınanyń 2012 jylǵy chempıony Vıacheslav Kıslısynnyń Izraıldiń aty-jóni belgisizdeý Igor Lazarev degen boksshysynan utylyp qalǵany, onda da birinshi raýndta eki ret nokdaýnǵa túsip qalǵany oılantyp tastady. Sol sııaqty, túrkimen Azat Bıbıtovtyń qytaılyq qazaq jigiti Týolevýta Saırıkeni sál ǵana basymdyqpen jeńýi kishigirim erlikke tán boldy. Sol sııaqty, eki raýnd boıy ıtalıan boksshysynan basym bolyp kele jatyp, aǵylshyn Samýel Maksvelldiń sońǵy kezeńde óreskel tártip buzyp, dıskvalıfıkasııaǵa ushyraýy aıtarlyqtaı ókinish týǵyzdy.

Qalǵan shaıqastardyń deninde pálendeı oǵash qylyqtar, túsiniksiz sheshimder bolǵan joq. Tipti mońǵol boksshysy Otgodalaı Dorjnııambýýdyń qarsylasy jaraqat alyp qalǵannan keıin utylýy da sondaı bir tańǵalarlyq jaıt bolǵan joq. Ne degende de, boksshylar aldymen ózderin kinálaýlary kerek. Aıtalyq, grýzın Georgıı Gogıtashvılı urysty óte qarqyndy bastady. Biraq ekinshi raýndtan bastap, onyń bergen soqqysynan góri alǵan soqqysy kóbeıe berdi. Bul onyń talassyz jeńilisine ákeldi. Mine, osy jupta jeńiske jetken Pýerto-Rıko sheberi Danıeelıto de la Rosa kelesi aınalymda bizdiń Berik Ábdirahmanovpen ustaspaqshy. Túrkimen Farýh Iomýdovty da bastapqydaǵy qımylyna qarap biz jeńiledi dep oılaǵan joq edik. Sóıtsek, onyń qarsylasy tipti basqasha nıette júripti. Ol birtindep tizgindi óz qolyna aldy. Sońynan slovak Mıhal Zatorskıdiń taktıkasyna qarsy eshteńe isteı almady.

Keshe 49, 69 jáne 81 kıloǵa deıingi salmaqtaǵy boksshylar sharshy alań tósin shaıqaltty.

PS. Álem chempıonaty týraly jedel jańalyqtar men ondaǵy jekpe-jekterdiń tehnıkalyq málimetterimen sizder gazetimizdiń táýlik boıy jumys jasaıtyn Egemennews.kz saıtynan tanysa alasyzdar.

Arnaıy betti daıyndaǵan «Egemen Qazaqstannyń»

álem chempıonatyndaǵy kóshpeli redaksııasy.