Jalpy, Soltústik Qazaqstan polısııasynda 21 qyzmettik-izdestirý ıti bar: onyń 11 nemis jáne 6 belgııalyq ovcharka, 3-ýi orys spanıeli, 1 labrador-retrıver. Olardyń ıis sezgishtigi iz kesý, patrýldeý, odorologııalyq sáıkestendirý (ıis boıynsha taný), esirtki men jarǵysh zattardy izdestirýde qoldanylady.
Qazir esirtki bıznesine qarsy kúreste qyzmettik-izdestirý ıtteri taptyrmas kómekshige aınaldy. Bir jyldan beri polıseıler ıtterdi jańa sıntetıkalyq esirtkilerdi izdestirýge úıretip keledi. Esirtki túrleriniń quramyndaǵy negizgi zattardyń ıis ımıtatorlary satyp alyndy. Endi ıtter ósimdik tektes esirtkilermen qatar, sıntetıkalyq túrin de ońaı anyqtaı alady. Jyl basynan SQO-da «dızaınerlik ýdy» satýmen aınalysqan «veb-dúkenderdiń» eki uıymdastyrýshylary ustaldy. Ustaý qyzmettik-izdestirý ıtteriniń qatysýymen ótti.
Jaqynda Esirtki qylmysyna qarsy is-qımyl basqarmasynyń qyzmetkerleri mefedrondy taratqan kúdiktiniń ustalýy týraly aıtyp berdi. Bul esirtki asa qaýipti sıntetıkalyq esirtkige jatady, ony qoldanǵannan keıin aǵzada qysqa merzim ishinde shirý úrdisi bastalyp, adamnyń júıke júıesi buzylady. Kúdiktiden alynǵan zattyń jalpy salmaǵy shamamen 40 gramm. SQO-da buǵan deıin munsha mefedron alynbaǵan. «Inspektor-kınolog, polısııa leıtenanty Bolat Bekmaǵambetovtiń jetekshiligimen labrador Bella mindetin jaqsy oryndap shyqty. Páterde izdeý jumysyn júrgizý kezinde ol jasyryn oryndy anyqtap, SQO Polısııa departamenti Esirtki qylmysyna qarsy is-qımyl basqarmasynyń qyzmetkerleri 5 gramnan asa erekshe ıisi bar aq tústi zat salynǵan polımerlik paketti alyp shyqty. Búgingi tańda Bella esirtkige qarsy kúreskerlerdiń aldyńǵy qatardaǵy kómekshisi, ol esirtki jelisin izdeý boıynsha árbir úshinshi jaǵdaıda paıdalanylady», dedi SQO PD Kınologııalyq qyzmet ortalyǵynyń bastyǵy, polısııa maıory Samat Tólebaev
