Monıtorıng azamattardyń áleýmettik jelilerdegi kezekti onlaın brondaý saldarynan týyndaǵan qıynshylyqtarǵa jáne kezek talondaryn satýdan aqsha tapqan deldaldardyń is-áreketterine shaǵymdanýyna oraı bastalǵan.
Osyndaı qıyndyqtar karantın jaǵdaıynda memlekettik qyzmet kórsetýge tek qana egov.kz saıty jáne Telegram-bot arqyly aldyn ala jazylý jolymen qol jetkizý nátıjesinde týyndaǵan. Monıtorıngke qatysýshylardyń pikirinshe, atalmysh másele onlaın brondaý júıesiniń tolyq jetilmegendigine baılanysty. Bul jaǵdaıdy josyqsyz paıda kózdeýshiler paıdalanyp, birneshe kezekti birden brondaý arqyly memlekettik qyzmetke zárý azamattarǵa satý ústinde.
O.Bektenovtiń aıtýynsha, qalyptasqan jaǵdaı «turmystyq» jemqorlyq alǵysharttarynyń qalyptasýyna ákelip soǵyp, qoǵammen teris qabyldanady. Osyǵan oraı jaýapty organdar qysqa merzimde máseleni sheshý úshin tıisti algorıtm ázirleýi qajet.
Monıtorıng qorytyndylary boıynsha Mamandandyrylǵan HQKO-da kezekti brondaý rásimin ońtaılandyrý is-sharalary usynyldy.
Osylaısha jaýapty memlekettik qurylymdar basshylarynyń senimdi rastaýy boıynsha kelesi aptadan bastap kezekti brondaý kezinde ótinim berýshi óz JSN kórsetýi tıis. Sondaı-aq avtokólikti tirkeý úshin Mamandandyrylǵan HQKO-ǵa júgingen kezde olardy júıede belgilengen ýaqytta bir qyzmetti alý úshin bekitý maqsatynda satýshynyń nemese kólik ıesiniń (eger kólik senimhat boıynsha satylsa) jáne satyp alýshynyń JSN kórsetý qajet bolady.
Osylaısha, deldaldar kezek alý jáne keıinnen olardy satý múmkindiginen aırylady. Jaýapty memlekettik organdarǵa azamattardyń qyzmetti deldaldar kómegine júginbeı jáne olardyń zańsyz kómekterine aqsha tólemeı onlaın nysanda alý múmkindigi týraly túsindirý jumystaryn jandandyrý qajettiligi eskertilgen.
