Jobany Aqparat jáne qoǵamdyq damý mınıstrliginiń qoldaýymen «Azamattyq bastamalardy qoldaý ortalyǵy» KeAQ granty aıasynda «Arnaý» damý ortalyǵy» qoǵamdyq birlestigi uıymdastyrdy.
ABQO basqarma tóraǵasy Bátımá Mýkına konferensııa barysynda jobanyń ózektiligin atap ótip, ony júzege asyrýǵa barynsha qoldaý kórsetýge daıyn ekenin bildirdi.
«Bul – azamattyq bastamalardy qoldaý ortalyǵy júzege asyratyn qaıyrymdylyqpen baılanysty alǵashqy joba. Qazaqstandaǵy karantın rejimi kezeńinde óte ózekti bolyp otyrǵan grantty «Arnaý» ortalyǵynyń basshysy Ulan Ábishevtiń utyp alǵanyna qýanyshtymyn. Bastamalaryna sáttilik tileımin. Biz óz kezegimizde jobany iske asyrýǵa daıynbyz. Jobanyń tıimdi bolýyn jáne eńbektiń túpkilikti maqsatyna jetýin qalaımyn», dedi B.Mýkına.
«Arnaý» damý ortalyǵy» qoǵamdyq birlestiginiń basshysy Ulan Ábishev «Amal» jobasynyń maqsaty men mindetteri týraly baıandady.
«Nelikten biz bul jobany «Amal» dep atadyq? Bul sóz «áreket», «qımyl» degendi bildiredi jáne bul jobanyń fılosofııasyna, ıdeologııasyna sáıkes keledi. Qaıyrymdylyq mádenıetin kópshilikke nasıhattaǵymyz keledi. Bul másele ásirese pandemııa kezinde ózekti. Biz burynǵydan da jumylyp, birligimizdi kórsetýimiz kerek», dedi U.Ábishev.
Baspasóz máslıhaty barysynda «Ahyska» Túrik etno mádenıet ortalyǵy» qoǵamdyq birlestigi fılıalynyń tóraǵasy Asker Pırıev Qazaqstandaǵy qaıyrymdylyq qyzmettiń praktıkalyq aspektilerine toqtaldy.
«Adamnyń tabıǵatynda muqtaj adamdarǵa kómektesýge degen umtylys bar. Ásirese, bizdiń halqymyzda. Qaıyrymdylyq jasaýshylar muqtaj adamdarǵa kómektesip qana qoımaı, kerisinshe, muqtaj adamdar qaıyrymdylyq jasaýshylarǵa rýhanı turǵydan kómektesetinin túsiný kerek. Sońǵy 10-15 jyldaǵy tájirıbemde qaıyrymdylyq qyzmetin úılestirý óte qıyn ekenin baıqadym. Sondaı-aq ıgi ister jasaý úshin baı adam bolýdyń qajeti joq degim keledi. Úlken júrek pen tilek jetkilikti», dedi A.Pırıev.
Nur-Sultan qalasynyń Azamattyq bastamalar ortalyǵynyń basshysy Mahabbat Espenova óz sózinde qaıyrymdylyq qazaq halqynyń mádenıeti men tarıhynyń ajyramas bóligi ekenin eske saldy.
«Amal» jobasy «Rýhanı jańǵyrý» baǵdarlamalyq maqalasynyń arqaýyna jáne ulttyq, azamattyq biregeılik, pragmatızm qaǵıdattaryna saı keledi. Eger bizdiń balalarymyz, jastarymyz qaıyrymdylyq týraly kóbirek biletin bolsa, onyń qanshalyqty mańyzdy jáne paıdaly ekenin túsinse, onda bizdiń qoǵam óziniń formatyn ózgertip, progressıvti jáne izigilikti qoǵamǵa aınalady. Dál osy azamattyq qoǵam elimizdiń tabysty bolýyna jáne halyqtyń barlyq toby úshin sapaly ómir súrýine kómektesetin áleýmettik kapıtaldy jınaqtaıdy», dep atap ótti M.Espenova.
«Jastar men balalar arasynda qaıyrymdylyqty dáripteý» keshendi aqparattyq-túsindirý áleýmettik jobasynyń maqsaty – Qazaqstandaǵy qaıyrymdylyq prosesterin standarttaý jáne júıeleý, adamdardy biriktire otyryp, ıgi ister jasaý, muqtaj adamdarǵa kómektesý, sondaı-aq jastar arasynda qaıyrymdylyq mádenıetin arttyrý.
