О́ńir polıseıleri shildeniń 24-i men tamyzdyń 30-y aralyǵynda "Taza Qazaqstan" jedel-profılaktıkalyq is-sharasy aıasynda jumys isteýde. Is-sharanyń maqsaty – ekologııany jaqsartý, adamdarǵa tabıǵatqa uqyptylyqpen qaraýdy túsindirý. Bul baǵyttaǵy jumystar jergilikti polısııa qyzmetiniń túrli bólinisterimen, tabıǵatty qorǵaý prokýratýrasymen, ekologııa departamentimen, janýarlar áleminiń aýmaqtyq ınspeksııasymen jáne tabıǵı resýrstar basqarmasymen birlesip ótkizilýde.
Osyndaı reıdterdiń birinde Esil ózeniniń jaǵasyna qoqys tókken 1976 jyly týǵan er adam jaýapkershilikke tartyldy. Oǵan qatysty QR Ákimshilik quqyq buzýshylyq týraly kodeksiniń 505-baby “Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý” boıynsha hattama toltyryldy. Basty nazarda – ózen-kólderdiń jaǵasy, ormandar, jaǵajaılar men saıabaqtar.
Jıi anyqtalatyn buzýshylyqtardyń biri – alkogoldik ishimdikterdi ishý nemese qoǵamdyq oryndarǵa masań kúıde kelý faktileri. Bul úshin 120 soltústikqazaqstandyq jazalandy. Sondaı-aq, ortaq sý paıdalaný qaǵıdalaryn buzýdyń 33 faktisi anyqtaldy.
Negizinen bular – ruqsat etilmegen oryndarda masań kúıde sýǵa shomylý.
– Karantınge baılanysty jaǵajaılar men saıabaqtarda demalysqa shekteý qoıylǵan, – deıdi SQO PD Jergilikti polısııa qyzmeti quramyndaǵy Tabıǵatty qorǵaý polısııasy tobynyń bastyǵy Ashat Qojabaev. Tabıǵatta aıasynda demalýǵa ruqsat. Alaıda bul rette zańnamany buzbaǵan abzal. Ruqsat etilmegen oryndarda sýǵa shomylmaý kerek. Jaǵalaýlardy lastap, ot jaqpaý qajet. Jedel-profılaktıkalyq is-shara barysynda tártip saqshylary barlyǵy 700-den astam materıal jınady. Ekologııa salasyndaǵy quqyq buzýshylyqtardy anyqtaý jáne olardyń aldyn alý boıynsha jumystar jalǵasýda.
