03 Tamyz, 2020

Qaraǵandy oblysynda 312 mektep qashyqtan oqytady

38 ret kórsetildi

Qaraǵandy oblystyq bilim berý basqarmasynyń jańadan taǵaıyndalǵan basshysy Gúlsim Qojahmetova jańa oqý jylyna daıarlyq barysyn talqylaǵan apparat jıynynda qashyqtan oqytýǵa ótý, óńir mektepterin kompıýterlermen jáne oqýlyqtarmen qamtamasyz etý jaıynan jan-jaqty maǵlumat berdi, – dep habarlaıdy Egemen.kz. oblys ákiminiń baspasóz qyzmetine silteme jasap.

Bıyl 1 qyrkúıekten bastap oblystyń 312 mektebi qashyqtan oqytý rejiminde jumys isteı bastaıdy. Qalǵan 193 mektep, onyń ishinde aýyldyq jáne shaǵyn jınaqty mektepter bar, olar balalardy dástúrli úlgide oqytýdy jalǵastyra beredi. Al bastaýysh mekteptiń 3 623 oqýshysy kezekshi synyptarǵa baryp, bilim nárimen sýsyndaıdy.

Búgingi kúnde oblys aýmaǵynda qashyqtan oqytýdy jan-jaqty meńgerý jáne jeńildetý boıynsha birqatar is-sharalardyń atqarylyp jatqanyn aıta ketken jón. Mysaly, oqytýdyń mundaı túri balalarǵa, sondaı-aq pedagogtar mamandarǵa barynsha qolaıly bolýy úshin oblysta kompıýterlerdi jańartý boıynsha aýqymdy jumystar júrgizilýde.

Bıyl bala oqytýdyń tártibine birshama ózgerister engizilgen. Atap aıtar bolsaq, bir synypta 15 oqýshydan artyq bolmaýy tıis. Sonymen birge, kabınettik júıe bolmaıdy, sabaqtar ýaqytynyń uzaqtyǵy da qysqartylmaqshy. Koronavırýs ınfeksııasyna baılanysty, qazirgi ýaqytta oblys mektepteri úshin zararsyzdandyrǵysh quraldar men sanıtarııalyq talaptardy saqtaýǵa qajetti jabdyqtar satyp alyna bastaǵan.

Jıyn barsynda Gúlsim Qojahmetova óńir mektepterindegi 35 544 kompıýterdiń barlyǵy birdeı qashyqtan oqytýǵa jaramdy emes ekenin málim etti.

– Oblystyq jáne jergilikti bıýdjetter esebinen 3 777 kompıýter satyp aldyq. Oqý jylynyń basyna deıin áli de 5 034 kompıýter alý josparda bar. Sondaı-aq, demeýshilik qarajattar esebinen taǵy da 977 birlik kompıýterdi satyp almaqshymyz. «Qazaqmys» korporasııasy 927 kompıýter alyp berdi, taǵy 50 birlikti sharýa qojalyqtary satyp áperedi, – dep esep berdi oblystyń bas muǵalimi.

1

Bul tehnıkalardyń bári úıinde kompıýteri joq muǵalimder men mektep oqýshylaryna ýaqytsha paıdalanýǵa beriledi eken. Jospar boıynsha bul  sharýa 20 tamyzǵa deıin rettelýi tıis.

Qashyqtan oqytý úlgisine ótýdiń ǵalamtormen qamtamasyz etý syndy ózekti máselemen tikeleı baılanysty ekeni belgili. Búgingi kúnde oblys mektepteri úshin 4 741 modem satý alý josparda bar eken. Onyń ishinde 198 modem demeýshilerdiń qarajatyna alynbaqshy. Buǵan qosa, óńirdegi 81 eldi mekende mobıldi ǵalamtor jyldamdyǵy ulǵaıtylady. Baılanysty 2G úlgisinen 4G úlgisine aýystyrý da alda turǵan asa mańyzdy mindetterdiń biri.

Apparat jıynynda oblys ákimi Jeńis Qasymbek aldaǵy oqý jylyna daıarlyqtyń óte mańyzdy sharýa ekenin taǵy bir márte eske saldy.

– Aýdandarda qajetti jabdyqtardy satyp alýdyń qalaı ótip jatqany týraly esepti apta saıyn tyńdaıtyn bolamyn. Sonymen birge, kadrlyq qamtamasyz etýdiń asa mańyzdy mindetterdiń biri ekenin umytpaǵan jón.  Baǵdarlamalardy ázirleý, baspana berý, jas mamandardyń kommýnaldyq  máselelerin sheshý de jiti nazarda bolý kerek, – dep eskertti óńir basshysy.

Qazirgi tańda oblysta oqýlyqtardy satyp alý belsendi túrde qolǵa alynǵan. «Informatıka» páni boıynsha 5-6-shy jáne 11-synyp oqýshylaryna arnalǵan oqý quraldary, sonymen qatar, úsh tildi oqýǵa arnalǵan ınformatıka, hımııa, fızıka jáne bıologııa oqýlyqtary, túzetý mektepteriniń 3, 6-shy jáne 8-synyp oqýshylaryna arnalǵan quraldar satyp alyndy. Bul oqýlyqtardyń 20%-y qazirdiń ózinde óńirdiń bilim mekemelerine taratylyp berilgen.

Taǵy bir aıta ketetin jaıt, bıyl oblystaǵy 413 mektep jóndeýden ótedi. Qazirgi ýaqytta 141 bilim mekemesinde kúrdeli jóndeý jáne 272 mektepte aǵymdaǵy jóndeý jumystary ekpindi túrde júrgizilýde.

Sońǵy jańalyqtar

Uqsas jańalyqtar