Aımaqtar • 12 Tamyz, 2020

Berdibek Saparbaev: Tártipsiz turaqtylyq bolmaıdy

32 ret kórsetildi

Qoǵamdyq-saıası turaqtylyqty qamtamasyz etýde usaq-túıek degen bolmaıdy. Jumys oryndarynyń jetispeýshiligi, baǵanyń ósýi, jer máseleleri, jastardyń bos ýaqyty jáne basqa da máseleler turaqsyzdyqqa sebep bolýy múmkin. Oblys ákimi Berdibek Saparbaevtyń tóraǵalyǵymen ótken apparattyq jıynda ondaı olqylyqtarǵa jol bermeý jaıy jan-jaqty talqylandy, - dep habarlaıdy Egemen.kz oblys ákimdigine silteme jasap.

Ishki saıasat basqarmasynyń basshysy Daýyl Beısenqulovtyń aıtýynsha, "Qazaqstan Respýblıkasyndaǵy beıbit jıyndardy uıymdastyrý jáne ótkizý týraly" zańyna engizilgen ózgertýlerge sáıkes Taraz qalasy men aýdandarda 13 arnaıy oryn jáne 12 marshrýt belgilengen.

Basqarma basshysy narazylyqqa áser etýi múmkin faktorlardyń qataryndaǵy birqatar ózekti máselelerge toqtalyp ótti. Atap aıtsaq, birinshiden, jambyldyqtardyń 42 500 teńge jáne kommýnaldyq tólemderdi óteý úshin 15000 teńge kóleminde áleýmettik tólemderdiń tólenbeýine qatysty shaǵymdary. Ekinshiden, Taraz qalasynyń mańyndaǵy turǵyn alqaptar turǵyndarynyń áleýmettik jáne turǵyn úı-kommýnaldyq máseleleri. Úshinshiden, taratylǵan "Qarataý" AAQ kásibı qyzmetkerlerine tólemder. Sondaı-aq Merki aýdanyndaǵy "Sypataı batyr" JShS qatysýshylary arasyndaǵy jer daýy jáne qarjy pıramıdasy qaǵıdaty boıynsha jumys istegen lombardtar salymshylarynyń máseleleri de mańyzdy kúıinde qalyp otyr.

"1600 shara ótkizilgen, biraq naqty nátıje qaıda? Olardyń deni esep úshin ótkizilgen. Atalǵan máseleler boıynsha keshendi is-sharalar jospary men olardy oryndaý kestesin ázirleý qajet. Negizgi másele – áleýmettik tólemder. Olarmen jumys qalaı júrip jatyr?" – dedi oblys ákimi.

Oblys ákimdiginiń jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekovtiń aıtýynsha, 42 500 teńge kólemindegi áleýmettik járdemaqy boıynsha jaǵdaı turaqtanǵan, arnaıy shtabtar óz jumystaryn atqarýda. Búginde 24,9 myń ótinish tússe, onyń 20 myńǵa jýyǵy qanaǵattandyrylypty. Túsindirý jumystary tólem alýǵa quqyǵy joq azamattarmen júrgizilýde. Jalpy alǵanda, shilde aıynda 171 myń adamǵa jalpy somasy 10,2 mlrd teńge úlestirilgen.

Taraz qalasynyń ákimi Aıtqazy Qarabalaev jazǵy kottedjder turǵyndarynyń áleýmettik jáne turǵyn úı-kommýnaldyq sharýashylyq máselelerin sheshý, balalardy qashyqtyqtan oqytýdy uıymdastyrý týraly baıandady.

"Saıajaı alqaptary turǵyndarymen jıi kezdesip, olarǵa máselelerdi sheshý úshin jasalyp jatqan ákimdik jumystarynyń algorıtmin túsindirý qajet. 163 aýlany abattandyrý, naýalar ornatý, qoqystardy ýaqtyly shyǵarý, jalaqy boıynsha bereshekti óteý baǵytyndaǵy sharýalardy jandandyrý qajet", – dedi oblys ákimi.

Jastar úshin paıdaly demalys uıymdastyrýǵa da kóp kóńil bólý kerek. Tárbıe máselesine de tereń nazar aýdaryp, ata-analardyń belsendiligin arttyrý qajet. Búgingi tańda kez kelgen janjaldy ultaralyq qaqtyǵys sanatyna jatqyzýǵa daıyn arandatýshy toptar bar. Qazirgi pandemııa jaǵdaıy qoǵamdaǵy beıbitshilik pen kelisimdi nyǵaıtýǵa baǵyttalǵan is-sharalardyń uıymdastyrylýyna kedergi keltiredi. Alaıda munyń ózge de tıimdi joldaryn qarastyrý kerek.

"Tártipsiz turaqtylyq bolmaıdy. Áleýmettik jáne saıası turaqtylyqty qamtamasyz etý máselesinde Qazaqstan halqy Assambleıasynyń, úkimettik emes uıymdar men saıası partııalardyń jumysyn jandandyrýǵa tıispiz", – dedi Berdibek Saparbaev.

Oblystaǵy mektepterdiń jańa oqý jylyna daıyndyǵyn, jyly dárethanalar men beınekameralardyń bar-joǵyn tekserý qajet. Qashyqtyqtan oqytýǵa keletin bolsaq, aımaqtaǵy bilim basqarmasynyń basshysy Gúlnar Hodjabergenovanyń aıtýynsha, qajetti kompıýterlerdiń 30-40 %-y qyrkúıek aıyna deıin satyp alynady.

Jıyndaǵy ekinshi máselesi boıynsha oblys ákimi apparatynyń basshysy Qanatbek Mádibek hattamalyq tapsyrmalardyń oryndalýy týraly baıandady. Oryndalmaǵan jumystardyń kópshiligi, naqtylaı aıtqanda 12-si kásipkerlik jáne ındýstrıaldy-ınnovasııalyq damý basqarmasyna tıesili eken. Vedomstvo jetekshisi bul olqylyqtyń sebep-saldaryn túsindirdi.

"Pandemııa jaǵdaıynda, kóptegen shaǵyn jáne orta bıznes nysandary jumys istemeıtin kezde biz kásipkerlerge barynsha qoldaý kórsetip, olardyń suranystaryna jedel jaýap berýimiz kerek", – dep atap ótti oblys ákimi.

Aımaq basshysy sonymen qatar jambyldyqtardyń joldardyń, ásirese aýdan ortalyqtary men Tarazdaǵy joldardyń sapasyna shaǵymdary kóp ekenin aıtty. Sondyqtan qabyldaý aktisine qol qoıyp, qarjy tólemes buryn, tıisti zerthanalardyń kómegimen jol tóseminiń sapasyn muqııat tekserý qajet.

"Biz azamattarmen ashyq sóılesýimiz kerek. Bos ýádeler bermeı, ózimizge júktelgen mindettemelerdi sapaly jáne ýaqtyly oryndaýǵa kúsh salýǵa tıispiz", – dep qorytyndylady aımaq basshysy.

Sońǵy jańalyqtar

Ekibastuzda 40-tan astam úıge sý berilmegen

Aımaqtar • 02 Jeltoqsan, 2022

Erbolat Dosaev Almaty qalasynyń ákimi qyzmetinde qaldy

Taǵaıyndaý • 02 Jeltoqsan, 2022

QazaqGaz dırektorlar keńesiniń quramy ózgerdi

Qazaqstan • 02 Jeltoqsan, 2022

Máýlen Áshimbaev Qytaı halqyna kóńil aıtty

Parlament • 02 Jeltoqsan, 2022

Meksıkada 200-ge jýyq adam ýlanyp qaldy

Álem • 02 Jeltoqsan, 2022

Shekarany búkil el qorǵaıdy

Qoǵam • 02 Jeltoqsan, 2022

Uqsas jańalyqtar