Departament bastyǵynyń mindetin atqarýshy osy jyldyń 7 aıynda tirkelgen qylmystyq quqyqbuzýshylyq 37 paıyzǵa (3798-den 2403-ke) tómendegenin aıtyp ótti.
Qoǵamdyq oryndarda, kóshelerde, top bolyp jasalatyn qylmystar da azaıǵan. Buryn sotty bolǵandardyń da qaıtalap qylmys jasaý kórsetkishi tómendegen. Degenmen de nazar aýdaratyn birqatar máseleler bar. Sonyń biri, jol-kólik oqıǵalary.
Qabyldanǵan sharalar nátıjesinde oblysta tirkelgen jol apattary 37 (350-den 221-ge), qaıtys bolǵandar 39 (72-den 44-ke), jaraqat alǵandar 36 paıyzǵa (410-nan 262-ge) azaıdy.
Taldaý kólik oqıǵalarynyń basty sebebi jyldamdyqty arttyrý, qarsy baǵytqa shyǵý, avtokólikti mas kúıde basqarý ekendigin kórstip otyr.
Jyl basynan jol qozǵalysyn buzýdyń 64 myń 797 deregi, onyń ishinde jol apattaryna tikeleı áser etetin avtokólikti qujatsyz basqarýdyń 5 441, avtokólikti mas kúıde basqarýdyń 946, qarsy baǵytqa shyǵýdyń 174 deregi anyqtaldy.
Osyǵan oraı aıta ketetin másele, jyl basynan avtokólikti mas kúıde júrgizgen 946 adam ustalyp, onyń 413-i ákimshilik qamaýǵa alyndy.
Degenmen, bul jaǵdaılar áli de tyıylar emes.
Jyl basynan oryn alǵan 221 jol-kólik oqıǵasynyń 18-i mas júrgizýshiniń kinásinen bolyp, nátıjesinde 7 adam qaıtys bolsa, 23 adam jaraqat alǵan.
Polıseıler tarapynan apattardyń aldyn alý maqsatynda júıeli túrde profılaktıkalyq sharalar júrgizilýde.
Osy maqsatta tamyz aıynyń 10 men 16-sy kúnderi aralyǵynda «Mas júrgizýshi - qylmysker» atty shara ótkizilýde.
Onyń alǵashqy úsh kúninde jol qozǵalysy erejesin buzýdyń 765 jáne kólik quralyn masań kúıde basqarýdyń 14 deregi áshkerlendi.
