Qylmystyq shema halyqaralyq sıpatqa ıe bolyp, esirtki quraldaryn jetkizý, býyp-túıý jáne taratý fýnksııalaryn atqarǵan turaqty qatysýshylar jelisin qamtyǵan, al tólemder krıptovalıýta arqyly júrgizilgen. Sonymen qatar, toptyń negizgi maqsattarynyń biri azamattardy, onyń ishinde jastardy psıhotroptyq zattardyń zańsyz aınalymyna júıeli túrde tartý bolǵan.
Oblystyq prokýratýra málimetinshe, 2025 jyly Ulytaý oblysy sotynyń úkimimen atalǵan toptyń eki qatysýshysy kináli dep tanylyp, 16 jyldan 18 jylǵa deıingi merzimge bas bostandyǵynan aıyrylǵan. Osyǵan qaramastan, arnaıy prokýrorlardyń odan ári júrgizgen jumystary barysynda qylmystyq jeliniń qalǵan bóligi áshkerelenip otyr.
«Jedel-tergeý is-sharalarynyń kesheni nátıjesinde Qaraǵandy jáne Ulytaý oblystarynyń aýmaǵynda qylmystyq shemanyń úsh qatysýshysy ustaldy. Keıin Jezqazǵan qalasynyń taǵy eki turǵyny ustalyp, olardan shamamen 1 kılogramm psıhotroptyq zattar tabyldy. Qylmystyq tizbekti júıeli túrde pysyqtaý barysynda arnaıy prokýrorlar jetkizýshilerdiń birine shyqty. Odan 850 gramm esirtki zattary tárkilendi. Keıingi is-sharalar barysynda jetkizý arnasy anyqtalyp, jóneltýshi retinde Qaraǵandy qalasynyń turǵyny belgili boldy. Júrgizilgen operasııa nátıjesinde transulttyq esirtki jelisiniń býyny joıylyp, qatysýshylary ustaldy, zańsyz aınalymnan shamamen 3,5 kılogramm sıntetıkalyq esirtki zattary shyǵaryldy», delingen oblystyq prokýratýranyń resmı málimdemesinde.
Ishki ister mınıstrligi 34 jasyryn esirtki zerthanasyn joıdy
Qazirgi ýaqytta úsh aıyptalýshyǵa qatysty qylmystyq is sotta qaralyp jatyr, taǵy tórt tulǵa boıynsha sotqa deıingi tergeý aıaqtalý satysynda.
Nurbolat AMANBEK
