Qala ákiminiń bastamasymen qolǵa alynǵan Jasyl Almaty aksııasynyń aıasynda kóktemde 8 myń aǵash jáne 110 myń sharshy metr aýmaqqa gúlzar egildi. Kúzgi maýsymda shamamen 250 myń jasyl jelek, onyń ishinde 280 myń japyraqty jáne 8 myń qylqanjapyraqty tuqymynan egý josparlanǵan. Jasyl jelektendiriletin jalpy aýmaq 452,6 gektardy quraıdy.
«Kóshetter geografııalyq, klımattyq jáne topyraq jabyndysynyń quramyna qaraı bólingen. Egiletin kóshetterdiń negizgi bóligi shetsiz qala qaǵıdasy boıynsha otyrǵyzylady. Alataý aýdanynda 176,7 myń kóshet, Túrksib aýdanynda 40 myń kóshet, Naýryzbaı aýdanynda 5,5 myń kóshet egiledi. Negizinen japaraqty aǵashtar – terek, shegirshin, úıeńki, talshyn, sonymen birge jemisti – alma, shıe, órik aǵashtaryna basymdyq beriledi», - dep atap ótti N.Lıvınskaıa.
Sonymen birge, ınvestorlar esebinen skverler qurý úshin 20 jer ýchaskesi anyqtalǵan. Bıznes qaýymdastyqtardy tartý arqyly 35 myń aǵash egý josparlanǵan.
2019 jyldyń qarashasynan Basqarma aǵashtardy kesýge ruqsat berýdi toqtatty. On aıda aǵashty kesýge qatysty 300-den astam ótinish túsken, olar boıynsha sebeptemeli bas tartý berildi, jobaǵa arnalǵan 33-i boıynsha ruqsat etildi.
«Ruqsat etilgender qataryndaǵy jobalar negizinen mektepter, balalar baqshasy, turǵyn úı keshenderimen baılanysty, kóshelerdi, saıabaqtar men skverlerdi rekonstrýksııalaýǵa baǵyttalǵan jobalar da bar. Biz olardy qaıta qaradyq, aýmaqqa qalaı kirý kerek ekenin, ǵımarattyń janyndaǵy kóshetterdi de eskerdik. Osylaısha, kesilý kerek dep sheshilgen jasyl jelektiń sanyn azaıttyq», - dedi Basqarma basshysy. Sonymen birge ol usynylǵan jobalar boıynsha modernızasııalaý jáne usynylǵan jobalardy jaqsartý boıynsha jumystar júrgizilgenin atap ótti.
Ruqsat berý kezinde kesilýi tıis degen tizimge engen jasyl jelek sanyn azaıtý dep jobany túzetý usynylady jáne sodan keıin ǵana kesýge ruqsat etiledi. Osylaısha, «Dostyq» saıabaǵynda joba qaıta qaralyp, kesilýi tıis aǵashtar sany 169-dan 26-ǵa deıin qysqardy.
Sonymen birge, kompensasııalyq kóshetter ádisi qaıta qaraldy, kóshetter standartqa saı egiledi, dińgek uzyndyǵy 2,5 metr, butaq júıesi qalyptasqan jáne otyrǵyzylǵannan keıin eki jyl boıy mindetti túrde kútim qajet.
«Jasyl jelekti saqtaýda qoǵamnyń qosar úlesi orasan zor. «Jasyl komıssııa» músheleri árbir fakt boıynsha baryp, óz usynystaryn aıtady», - dep atap ótti Basqarma basshysy.
