Shynasyldyń shyqqan bıigin oı talqysyna salyp tarazylamas buryn onyń qyzmet etetin salasyna toqtalaıyq. Iаǵnı, memlekettik-jekemenshik áriptestik degenimiz ne? Bul – memlekettik jáne jekemenshik sektordaǵy ınfraqurylymdyq qyzmetter men qoǵamdyq qyzmetter kórsetý jobalaryn iske asyrý maqsatyndaǵy yntymaqtastyq. Bir sózben aıtqanda, qoǵam ıgiligi úshin atqarylatyn jumystardaǵy birlesken, ekijaqty tıimdi qadamdar deýge de bolady.
Odan qorqatyn dáneńe de joq. Jyldar boıy qalyptasqan álemdik tájirıbege zer salsaq, sonyń ózi jetip jatyr. Sebebi memlekettik-jekemenshik áriptestik uǵymy bizdiń memlekettiń bastamasy emes. Burynnan bar. Bul uǵym áýeli AQSh-ta paıda bolyp, bilim men ǵylymǵa qatysty baǵdarlamalardy qarjylandyrýǵa baǵyttalǵan edi. Kele-kele atalǵan áriptestiktiń aýqymy keńeıip, qoǵamdyq paıdalaný nysandaryn qarjylaı qoldaý, jalpy, qalany jańǵyrtý máselelerinde memleket pen jeke sektor arasyndaǵy yntymaqtastyq nyǵaıa tústi.
Búginde Qazaqstandaǵy memlekettik-jekemenshik áriptestik jobalarynyń negizgi maqsaty eldiń ınfraqurylymyn damytýdy, jeke kapıtaldy tartýdy jáne turǵyndarǵa kórsetiletin qyzmetterdiń sapasyn arttyrýdy kózdeıdi. Osylaısha ekijaqty áriptestik negizinde elimizdiń bilim berý, densaýlyq saqtaý, turǵyn úı-kommýnaldyq sharýashylyǵy, energetıka jáne kólik salalarynda belgili bir dárejede damý baıqalady. Eń bastysy, bul áriptestiktiń jemisin qarapaıym halyq kóredi degen sóz.
Endeshe, Shynasyl Jeńisulynyń qazirgi qyzmeti el ıgiligin arttyrýǵa, halyqtyń jaǵdaıyn jaqsartýǵa baǵyttalǵan dep te aıtýǵa bolady. Alashtyń ardaqtysy Álıhan Bókeıhan «Ultqa qyzmet bilimnen emes, minezden» deıdi ǵoı. Onyń qalyptasýy úshin de qajyrly qaırat, tereńge tamyr tartqan tájirıbe qajet. Shynasyldyń boıynda osy qasıetterdiń barlyǵy bar. Almaty qalasynda dúnıege kelgen bolashaq mamannyń stýdenttik shaǵy sonaý Dýbaı qalasynda ótti. Wollongong ýnıversıtetinde qarjy mamandyǵy boıynsha bilim aldy. Munymen shektelmegen bilikti jas óz Otanyna qaıtyp kelip, M.Nárikbaev atyndaǵy QazGZÝ ýnıversıtetinde MVA baǵdarlamasyn ıgerdi. Oqýyn oıdaǵydaı aıaqtaǵan soń alǵashqy eńbek jolyn «Qazaqstandyq memlekettik-jekemenshik áriptestik ortalyǵy» AQ-ta bastady.
– Meniń qyzmet órisimniń negizin ekonomıkanyń bilim berý, densaýlyq saqtaý, turǵyn úı-kommýnaldyq sharýashylyq, jańǵyrmaly energııa kózderi, tabıǵat resýrstaryn paıdalaný jáne qorǵaý, sport, transport jáne basqa da salalardaǵy memlekettik-jekemenshik áriptestik jobalaryn iske asyrý jáne memlekettik-jekemenshik áriptestikti damytý strategııasyn taldaýdy qamtıtyn zertteý jáne konsaltıng qurady. Sonymen qatar jumys barysynda memlekettik-jekemenshik áriptestik salasyndaǵy mamandar úshin túrli semınarlar men vebınarlar ótkizý, otandyq, sheteldik seriktestermen jumys isteý de meniń qyzmet babyma kirdi, – deıdi Sh.Ernazar.
Jasy otyzǵa da tolmaǵan jas maman «Qazaqstandyq memlekettik-jekemenshik áriptestik ortalyǵynda» ǵana emes, «Qazposhta» AQ-ta jumys istep úlgeripti. Onda Sh.Jeńisulynyń mindetine kompanııanyń damý strategııasyn ázirleý jáne júzege asyrý, ınvestısııalyq jobalardy baǵalaý, jyldyq jáne qarjylyq esepteme daıyndaý, sondaı-aq jekeshelendirý jáne korporatıvti basqarýǵa baılanysty máselelerdi sheshý kirdi.
Búgingi tańda keıipkerimiz joǵaryda atalǵan «Qazaqstandyq memlekettik-jekemenshik áriptestik ortalyǵy» AQ front-keńsesiniń birinshi vıse-prezıdenti laýazymyn abyroımen atqaryp otyr. Osy ortalyqta júrip, eńbekqorlyǵy men bilimdiliginiń, tájirıbesiniń arqasynda qyzmettik baspaldaqtyń barlyq satysyn basyp ótti deýge bolady. Endigi kúni atalǵan ortalyqtaǵy front-keńseniń jumysyna, sondaı-aq jergilikti memlekettik-jekemenshik áriptestik jobalaryna konsýltatıvtik qoldaý, memlekettik-jekemenshik áriptestik máseleleri boıynsha zertteý júrgizý, keńes berý jáne bıznes sektory men memlekettik organdarmen qarym-qatynas ornatý jumystaryna jetekshilik etip keledi. Talaby taýdaı jas mamannyń eńbegi eskerýsiz qalǵan joq. El ekonomıkasyna qosqan eleýli úlesi úshin 2016 jyly Ulttyq ekonomıka mınıstriniń maqtaý gramotasyn aldy.
Qajyr-qaıratyna sengen azamat byltyr Memleket basshysy Qasym-Jomart Toqaevtyń bastamasymen qolǵa alynǵan Prezıdenttik jastar kadrlyq rezervine enýdi oılaıdy.
– Bul joba týraly alǵash ret jańalyqtardan estidim. Onda el Prezıdenti joǵary saıası laýazymdarǵa taǵaıyndaý úshin talantty jastardyń arasynda irikteý júrgiziletinin aıtty. Bul jobadan men kásibı ósý men áleýetimdi júzege asyrý múmkindigin kórdim. Saıys tártibi aıtarlyqtaı kúrdeli jáne ashyq boldy. Ár kezeńniń qorytyndysy buqaralyq aqparat quraldarynda jarııalandy. Saıystyń rásimderi qatysýshylardyń túrli quzyretin anyqtaýǵa baǵyttaldy. Máselen, mátin jáne sandarmen jumys isteý, jobany ázirlep, usyna bilý, adamdarmen jumys isteý, kóshbasshylyq qasıeti jáne taǵy basqa, – deıdi Prezıdenttik jastar kadr rezervine qabyldanǵan azamat.
Onyń aıtýynsha, bul jobanyń basty mańyzdylyǵy onyń merıtokratııa qaǵıdalaryn tolyq asha alýynda. Iаǵnı, joǵary laýazym men múmkindikterge jaqsy daıyndyǵy bar, laıyqty mamandar ıe bolady. Ár adamǵa óz-ózin kórsetip, óziniń áleýetin iske asyrýǵa múmkindik beredi. Keıin bul bastamanyń kóptegen talantty jastardy memlekettik qyzmetke tartýǵa senimdi serpin bolatynyna senedi.
– О́z basym qatań irikteý tártibinen ótip, mańyzdy tájirıbe jınaqtaı aldym. Aldymda kóp múmkindik baryn sezindim. Joba barysynda memlekettik-jekemenshik áriptestiktiń múmkindikterin kórsettim. Tıisinshe, qazirgi laýazymym meniń osy baǵytta jumysymdy jalǵastyrýǵa múmkindik beredi. Osy joba arqyly laýazymym da joǵarylady. Aldaǵy maqsatym – tartylǵan ınvestısııalardyń kólemin ulǵaıtyp, memlekettik-jekemenshik áriptestik salasynda jumysymdy odan ári jalǵastyrý, – deıdi Sh.Ernazar.
Qaı memlekettiń bolsyn damý dańǵylyn daralaıtyn faktor syrtqy jáne ishki saıasattan buryn, aldymen qarqyndy ekonomıkaǵa, kásipkerlik pen ınvestısııaǵa táýeldi. Bul qaǵıdany bir kezderi sosıalızmniń shekpeninen shyqqan Qazaq eli de ustanady. Ustanbasqa ózge amal da joq. Naryqtyq ekonomıkada «nan tabýdyń» óz erejesi bar. Sondyqtan naryqtyń narqyn biletin, óz isiniń «jiligin shaǵyp, maıyn ishe alatyn» bilimdi jastarǵa únemi joǵary suranys bolady. Endeshe, Memleket basshysynyń tapsyrmasy negizinde qolǵa alynǵan Prezıdenttik jastar kadrlyq rezervi Shynasyldy da shyńǵa shyǵarady. Shynasyldaı azamattarmen birge eldiń ekonomıkasy da, áleýeti de artady degen senimdemiz.
