Sensasııaǵa toly shırek fınal

Fransııanyń PSJ komandasy Chem­pıondar lıgasynyń jartylaı fınalyna alǵashqy bolyp shyqty. Shırek fınalda parıjdikter Italııanyń «Atalanta» klýbynan 2:1 esebimen basym tústi.

Jankúıerlersiz ótken matchta «Ata­lantadan»  Pashalıch (27 mın) qanjyǵasy maılanyp, 90-mınýtqa deıin esep ózger­megen edi. Alaıda PSJ aınalasy úsh mı­nýtta «kambek» jasady. Markınos (90 mın.) pen Shýpo-Motın (90+3 mın.) gol soǵyp, komandasyn jeńiske jeteledi.

«RB Leıpsıg» sensasııa jasap, «At­letıkony»  2:1 esebimen jeńdi.

Oıyn bastalmas buryn Egemen.kz saıtyna «Leıpsıgtiń» qandaı jaǵdaıda ǵana jartylaı fınalǵa shyǵýy múmkin eke­nin aıtqan edik. «Sońǵy bes oıynda tek eki ret qana jeńiske jetken «Buqa­larǵa» La Lıgada óz qaqpalaryna eń az gol jiberetin komandalardyń biri «Atle­tıkoǵa» qarsy turý qıynǵa soǵady. Áıt­kenmen Iýlıan Nagelsmannyń shákirtteri birinshi bolyp gol soqsa, ıspan komandasyn ábigerge túsiretini sózsiz. О́ıtkeni «Atletıkonyń» qarsylas komandaǵa kóp gol soǵa bermeıtini de bar».

Aıtsa aıtqandaı, shırek fınalda «Leıpsıg» birinshi bolyp esepti ashty. Oıynnyń 51 mınýtynda Olmo esep ashyp, komandasyn alǵa shyǵardy. Araǵa 20 mınýt salyp «Atletıko» sapynan  Portýgalııanyń talantty jas fýtbolshysy Joaý Felıks 11-metrlik aıyp dobyn sátti oryndap esepti teńestirdi. Al oıynnyń 88-mınýtynda Adams bul kezdesýge núkte qoıdy. Sol qaptaldan ádemi pas alǵan ol esh oılanbastan qaqpaǵa soqqy jasady. «Atletıko» qaqpashysy Oblak soqqyny qaıtarar ma edi, eger de dop qor­ǵaý­shylardyń birine tımegende. Esep – 2:1, «RB Leıpsıg» jartylaı fınalda.

«Barselona» – «Bavarııa» matchy Lıo­nel Messı men Robert Levandovskıdiń «Altyn dopqa» kimniń laıyq ekenin kór­setip bergendeı. Árıne fýtbol tarıhynda argentınalyq fýtbolshynyń esimi, ataq-dańqy tanymal. Biraq Lıssabonda Levandovskıı jáne onyń komandasy qaı kezde de myqty ekenin dáleldeı aldy.

Buǵan deıin qarsylasynan ár taımda 4 gol jiberip alatyn «Barselonany» buryn sońdy kórmeppiz. Sóz joq Messı – fenomen! Osyndaı myqty oıynshysy bar komandany joldan taıdyrǵan jáne 8:2 esebimen oısyrata jeńgen «Bavarııada» «uıat», «aıaýshylyq» joq deýshiler de tabylar. Alaıda bul – fýtbol. Fýtbolda aıaýshylyq degen bolmaıdy.

Gol soqqandar – Alaba 7 (óz qaqpasyna), Sýares 57 («Barselona») – Mıýller 4, 31, Perıshıch 21, Gnabrı 27, Kımmıh 63, Levandovskıı 82, Koýtıno 85, 89 («Bavarııa»).

Fransııanyń «Lıon» komandasy Ang­lııanyń «Manchester Sıtı» komandasyn 3:1 esebimen basym túsip, jartylaı fı­nal­ǵa joldama alǵan sońǵy komanda.

Oıyn bastalmas buryn birqatar fýtbol mamandary Gvardıola baptaıtyn MS ujymyn úzdik tórt komandanyń qataryna qosyp qoıǵan edi. Alaıda olardyń bul jolǵy boljamyn kóbinese qarymta shabýyldarmen gol soqqan «Lıon» kúl-parshasyn shyǵardy.

«Lıon» birinshi bolyp esep ashty. Oıynnyń 24 mınýtynda Korne aıyp alańy­nyń syrtynda sol aıaqpen shirene teýip, ko­mandasyn alǵa shyǵardy. 69 mınýt­ta MS sapynan Belgııa quramasynyń tá­ji­rı­beli fýtbolshysy Kevın De Brıýıne aıyp alańy­nyń ishinde qaqpanyń oń jaq bu­ry­shyn dál kózdep, esepti teńestirdi. Al oıyn­nyń 79 jáne 87 mınýttarynda fran­­sýz shabýylshysy Dembele dýbl av­tory atanyp, bul kezdesýge núkte qoıdy. Esep – 3:1, «Lıonnyń» paıdasyna sheshildi.

18 tamyzda jartylaı fı­naldyq match­ta «Leıpsıg» – PSJ ózara myqtyny anyq­tasa, 19 tamyzda «Lıon» azýly «Bava­rııa­men» kezdesedi.