Qala ákiminiń aıtýynsha, №4 jáne 7 qalalyq emhanalar ózderiniń negizgi baǵyttary boıynsha tolyq jumys isteı bastady. Al qalǵandary ózderiniń negizgi jumystaryna kezeń-kezeńimen oralady.
Taǵy bir toqtala ketýge tıisti jaıt, kúzgi-qysqy maýsymda indettiń jańa tolqynynyń bolýy múmkin ekenin eskere otyryp, stasıonarlardyń kovıdti gospıtalder rejimimen jumys isteý jospary ázirlengen.
«Kúnine shamamen 200 gospıtal jumys isteıtin bolady. Indet sharyqtaǵan kezde biz 500-ge jýyq naýqasty aýrýhanalarǵa jatqyzdyq. Bul qalanyń medısına júıesine túsetin óte aýyr júk. Indettiń jańa tolqynyna qarsy is-áreket josparyna saı stasıonarlar 2-3 kún ishinde kovıdti naýqastardy emdeýge daıyn bolýlary tıis», dep atap ótti B.Saǵyntaev.
Sonymen qatar jedel jumys isteý úshin medısınalyq kómektiń alǵashqy býyny – alǵashqy medısınalyq-sanıtarlyq kómek nemese emhana baılanysy kúsheıtilýde. Ýchaskelik dárigerler sozylmaly aýrýlary bar táýekel tobyndaǵy qalalyqtardy baqylaýǵa alýy tıis. Al bul osy toptaǵy juqtyrýshylardy der kezinde anyqtaýǵa múmkindik beredi.
Saýaldamalarǵa sáıkes, KVI juqtyrǵandardyń ishinde stasıonarlarǵa syrqattyń asqyný túrimen túsken 55%-y úıde emdelse, 31%-y jeke klınıkalarǵa, 14%-y – ózderi tirkelgen emhanalarǵa, ýchaskelik dárigerlerge barǵan.
«Osyǵan oraı, biz KVI belgileri paıda bolǵan kezde ne isteý kerek, kimge jáne qaıda júginýge bolatyny týraly nusqaýlyqtar ázirledik. Ambýlatorııalyq em alatyn ári emhanalar dárigerleriniń baqylaýynda bolatyn naýqastardy qajetti dári-dármektermen qamtamasyz ettik. Osy maqsatta dári-dármekterdi turaqtandyrý qory quryldy, oǵan 5 mlrd teńge bólindi», dedi qala ákimi.
Sonymen qatar PTR testileýdiń qýaty artady. Búginde 455 myń PTR synaqtary ótkizildi. Testileýden qala turǵyndarynyń shamamen 15-17%-y ótti. Bul naqty epıdemııalyq kórinisti bilýge jáne ýaqytynda qajetti sharalardy qabyldaýǵa múmkindik beredi.
Sondaı-aq Almaty qalasynyń ákimi Baqytjan Saǵyntaev №17 qalalyq emhanada alǵashqy medısınalyq-sanıtarlyq kómektiń KVI indetiniń jańa tolqyny jaǵdaıyna qalaı beıimdeletinin tekserdi. Qala ákimi baspasóz qyzmetiniń habarlaýynsha, №17 emhanada taza jáne qaýipti aýmaqtar arnaıy bólingen, fıltrler men baqylaý beketteri ornatylǵan. Naýqastar arasy bólingen, ıaǵnı emdelýge jatqyzylatyn nemese tekserýden ótetin JRVI belgileri bar syrqattar, balalar, júkti áıelder ózara aralaspaıdy. Burynǵydaı dálizde birge turmaıdy. Olarǵa jeke prosedýralyq jáne zerthanalyq kabınetter, kiretin, shyǵatyn oryndar uıymdastyrylǵan. Maqsat – vırýstyń aýrýhana ishinde taralýyna jáne qyzmetkerlerdiń vırýsty juqtyrýyna jol bermeý.
№17 emhanaǵa Bostandyq aýdanynyń 82 myń turǵyny tirkelgen. Olardyń 28 myńǵa jýyǵy sozylmaly aýrýy bolǵandyqtan dıspanserlik esepte turǵandar, arasynda qan qysymyna, qant dıabetine, júrektiń ıshemııalyq aýrýyna shaldyqqan naýqastar bar.
Qala ákimi B.Saǵyntaev «qaýipti toptaǵylarǵa» jete nazar aýdarýdy tapsyrdy, óıtkeni olar KVI juqtyratyn bolsa, jaǵdaılary nasharlap, syrqaty asqynýy múmkin. Sondaı-aq qalanyń barlyq emhana basshylaryna PIK-termen qosa qajetti aqparat jazylǵan nusqaýlyqtardy taratý tapsyryldy, onda JRVI belgileri paıda bolǵan kezde kimderge júginý keregi kórsetilgen.
Búginde quramynda emhanalardyń 40 mamany bar 16 mobıldi top ambýlatorııalyq em alyp jatqan naýqastardyń jaǵdaıyn baqylaýda. Qazir KVI-den saýyǵyp shyqqan 8, syrqaty jeńil 1 jáne 18 sımptomsyz naýqas esepte tur. Jalpy, qalada alǵashqy medısınalyq-sanıtarlyq kómektiń 74 uıymy jumys isteıdi, onyń 39-y memlekettik, oǵan shamamen 1,7 mln adam tirkelgen. Al 35 jeke uıymǵa 340 myńǵa jýyq adam tirkelgen. Indet sharyqtaǵan kezde, 15 maýsymnan 15 shilde aralyǵynda 2450 vırýs juqtyrýshy úıde, dárigerlerdiń baqylaýynda em aldy. Qazir 825 naýqas tirkelgen. Quramynda 925 dárigeri bar 300 mobıldi top quryldy. Indettiń jańa tolqynyna daıyndyq barysynda bul resýrstar eki esege artatyn bolady. Mindet – KVI boıynsha epıdemııalyq ahýal órshıtin bolsa, naýqastar men vırýs juqtyrýshylardydyń basym bóligin zamanaýı medısınalyq kómekpen keńinen qamtý. Almatynyń barlyq densaýlyq júıesi osyǵan baǵyttalǵan.
ALMATY
