Partııaishilik praımerız bastaldy

Jańa format deýimizdiń sebebi buǵan deıin mundaı partııalyq irikteý elimizde bolmaǵan edi. Osylaısha halyqaralyq tájirıbede keńinen qoldanylatyn partııa belsendilerin ashyq tańdaýdyń bul tásili elimizdiń bastaýysh partııasyna tyń serpin beredi degen senim paıda boldy. Qarapaıym tilmen aıtatyn bolsaq, praımerız degenimiz – partııanyń ár óńirde ótkizetin ishki saılaýy degenge saıady. Onyń negizgi maqsaty – aldaǵy Májilis pen barlyq deńgeıdegi máslıhattar saılaýyna partııalyq tizimderge engizý úshin qoǵamnyń senimi men qoldaýyna ıe bolǵan bedeldi kóshbasshylardy anyqtaý. Iаǵnı praımerız arqyly partııanyń bel sheshe iske kirisetin belsendi músheleri men kóshbasshylary aıqyndalatyn bolady. Nátıjesinde, mundaı tıimdi tetik, qarymdy qadam arqyly partııanyń el aldyndaǵy pármeni artyp, halyqtyń senimi nyǵaıa túsedi degen sóz.

Túıtkildi máselelerdiń túıinin tar­qatyp, el damýyna eleýli úles qosqysy keletin azamattardy halyq qashan da qoldaıdy. Aıtqan ár sózin ispen dálel­deıtin ondaı otandastarymyzdy bastaýysh partııa da qoldaýǵa ázir. Sebebi saılaý kezinde ǵana sahnadan kórinip, sońynda saılaýshylary atyn da, zatyn da umytyp qalatyn keı depýtattardy el senimin aqtady dep aıta almaımyz. Barlyq depýtatqa topyraq shashýdan aýlaqpyz. Alaıda saılaýdan soń kórneki qyzmetimen, belsendi is-áreketimen kózge túse qoımaıtyn depýtattar áli de bar. Endi halyq depýtatty emes, depýtat óz saılaýshylaryn izdeıtin kez keldi.

Nur Otan partııasynyń málimeti boıynsha, tirkeý bastalǵan alǵashqy birneshe saǵattyń ishinde 500-ge jýyq otandasymyz praımerızge qatysýǵa nıet bildiripti. Sonyń ishinde, aıryqsha belsendilik tanytqan – Qostanaı oblysyndaǵy partııa músheleri. Atalǵan aımaqtan 157 ótinish kelip túsipti. Al Aqmola oblysyndaǵy partııa múshe­lerinen kelip túsken ótinish sany – 110. Osylaısha bastaýysh partııa uıymdary 129 adamdy usynsa, qalǵan 342 adam (72,6%) – ózin-ózi usynǵan kandıdattar.

Aıta keteıik, praımerızge qatysý úshin ótinishti resmı https://primaries.kz/ saıtynda «Praımerız» aqparattyq júıesi arqyly onlaın joldaýǵa bolady. Sondaı-aq aýmaqtyq uıymdastyrý komıtetterine jeke ótinish berý tásili de qarastyrylǵanyn aıta ketken jón. Kandıdattardy usyný men tirkeý barysy 28 tamyzǵa (qosa eseptegende) deıin jalǵasady.

Kandıdattar praımerızge Nur Otan partııasy uıymynyń atynan nemese ózin-ózi usyný jolymen de qatysýy múmkin. Partııanyń qundylyqtaryn ustanatyn jáne saılaý quqyǵy bar kez kelgen azamat praımerızge úmitker bola alady. Ol úshin nıet bildirgen belsendi azamat praımerızge qatysýshylardy tirkeý merzimi aıaqtalǵanǵa deıin bastaýysh partııanyń qataryna qosylý kerek.

Sonymen kandıdattardy usyný jáne tirkeý 17 tamyzdan bastalyp, 28 tamyzǵa (qosa eseptegende) deıin jalǵasady. Úmitkerlerge úgit-nasıhat ju­mys­taryna daıyndalý úshin 31 tamyz­dan 6 qyrkúıekke deıin 7 kún beriledi. 7 qyrkúıekten 3 qa­zanǵa deıingi aralyqta kandıdattardyń úgit-nasıhat ju­mystary, sonyń ishinde 14-30 qyr­kúıek aralyǵynda jarııa pikir­saıystar ótedi. Pikir­saıystar «Praımerız» arnaıy aqpa­rattyq júıesi arqyly ótip, partııanyń resmı akkaýnttarynda taratylady.

Taǵy bir aıta keterligi, partııa Tóraǵasynyń tapsyrmasy boıynsha úmitkerlerge onlaın-formatta daýys berý úshin arnaıy platforma da ázirlendi. Osylaısha «Praımerız» júıesi turǵyndarmen keri baılanys­ty barynsha kúsheıtýdi, jalpy jurtshylyqtyń pikirlerin eskere otyryp, túrli bastamalar men zań jobalaryn onlaın-talqylaý múmkindigin kózdeıdi. 

Al 1-3 qazan aralyǵynda mobıldi qosymsha jáne arnaıy veb-portal arqyly elektrondy daýys berýdi ótkizý josparlanyp otyr. Daýys berýdiń sońǵy kúni (3 qazan) bas­taýysh partııa uıymdarynyń bazasynda saılaý ýchaskeleri ashylady. Internet jelisi joq eldi meken turǵyndary saılaý ýchaskelerine kelip, qaǵaz bıýl­letender arqyly daýys berýi­ne bolady. Úmitkerlerdiń reı­tıngi kórsetilgen praımerız nátı­jeleri 5 qazanda jarııalanady.

Aıta keteıik, buǵan deıin Nur Otan partııasy praımerız ótki­zý, sondaı-aq kandıdattarǵa uıym­das­tyrýshylyq jáne quqyqtyq qoldaý kórsetý máseleleri boıyn­sha 8 (800) 080 4441 arnaıy jelini iske qosqan bolatyn. Sońǵy 2 aıdyń ózinde atal­ǵan jelige 15 myńǵa jýyq qońy­raý túsipti. Sonyń ishinde, praı­me­rızge qatysýǵa ótinish bildir­gen­derdiń jartysynan kóbi 30 ben 44 jas aralyǵyndaǵy azamattar.