Birikken Ulttar Uıymy kúnin atap ótý sheńberinde keshe osy halyqaralyq beldi uıymmen birlesip Memlekettik basqarý akademııasynda elimiz Syrtqy ister mınıstrliginiń uıymdastyrýymen «BUU-nyń Qazaqstanǵa kelýine – 20 jyl» taqyrybynda dóńgelek ústel bolyp ótti.
Birikken Ulttar Uıymy kúnin atap ótý sheńberinde keshe osy halyqaralyq beldi uıymmen birlesip Memlekettik basqarý akademııasynda elimiz Syrtqy ister mınıstrliginiń uıymdastyrýymen «BUU-nyń Qazaqstanǵa kelýine – 20 jyl» taqyrybynda dóńgelek ústel bolyp ótti.
Atalǵan sharaǵa halyqaralyq uıymdardyń, dıplomatııalyq korpýstyń ókilderi, Qazaqstan Prezıdenti janyndaǵy Memlekettik basqarý akademııasynyń tyńdarmandary, ǵylym men akademııalyq top, BUU jáne BAQ máseleleri jónindegi sarapshylar qatysty. Semınarǵa qatysýshylar aldynda elimiz syrtqy saıasat vedomstvosy basshysynyń orynbasary Alekseı Volkov sóz alyp, Syrtqy ister mınıstri Erlan Ydyrysovtyń quttyqtaý hatyn oqyp berdi.
Sondaı-aq BUU-nyń Qazaqstandaǵy Turaqty ókili Stıven Týll óziniń quttyqtaý sózinde adam quqyqtaryna negizdelgen BUU maqsaty beıbitshilikti arttyrý bolsa, onyń júzege asyp jatqandyǵynan habardar etti. Turaqty ókil osy rette «Qazaqstan-2050» Strategııasynyń qabyldanýy bolashaqty naqty baǵdarlaý ekendigine toqtalyp, Qazaqstannyń jahandyq deńgeıde aımaqtaǵy yqpaldy kúshke ıe bolýy qajettigine nazar aýdartty.
Budan keıin BUU halyqaralyq kúnin atap ótýge jınalǵandardy BUU Bas hatshysy Pan Gı Mýn beıneúndeý arqyly quttyqtady. Osy jerde ótkenge sál sheginis jasasaq, 1945 jyldyń 24 qazany – BUU Jarǵysy qabyldanǵan kún uıymnyń halyqaralyq kúni dep atalyp júr. Bul kúndi merekeleý 1948 jyldan bastalsa, jyl saıyn osy kúni ártúrli keńester, pikirlesýler men fotokórmeler uıymdastyrylyp, BUU tabystary pash etiledi.
1992 jyly 2 naýryzda BUU múshesi atanǵan Qazaqstan Uıymnyń barlyq is-sharalaryna belsendi qatysty jáne onyń aıasynda iri halyqaralyq forýmdardy ótkizýge muryndyq boldy. Qazaqstan osy turǵydan kelgende ózin BUU-nyń belsendi múshesi ári óz isine jaýapty el ekenin dáleldeı bildi.
Ortalyq Azııa jónindegi sýbóńirlik ofısiniń (Almaty qalasynda ornalasqan) dırektory Nıkolaı Botev 2015 jyldan keıingi damýdyń aspektilerine qurylǵan baıandama jasady. Onyń aıtýynsha, búgingi úderister BUU jumysyna áser etpeı qoımaıdy, sondyqtan da ulttyq konsýltasııalar mańyzy artýda. Buǵan deıin turaqty damýǵa negiz qalaıtyn jappaı orta bilim berý, kedeıshilikpen kúresý jáne VICh-SPID-tiń aldyn alý sııaqty máseleler qamtylyp kelse, 2015 jyldan bastap talap túbegeıli ózgerýi múmkin. Qazirdiń ózinde 60-qa tarta agenttikter men uıymdar birigip, jumys toptarynda esepter daıarlaýǵa kirisip te ketipti. Buǵan sarapshylardan ózge 100-ge tarta eldiń ulttyq konsýltasııalary atsalysyp jatsa kerek.
Sondaı-aq, jınalǵan qaýym aldynda sóz sóılegen Qazaqstan Prezıdenti janyndaǵy Memlekettik basqarý akademııasynyń rektory Bolatbek Abdrasılov oraıy kelgende Memleket basshysy N.Nazarbaevtyń elimizdiń aıaǵynan nyq turýyndaǵy BUU rólin joǵary baǵalaıtynyn jetkizdi. Jáne de ol Uıymnyń elimizde naryqtyq reformalardy júrgizýge, mamandardy daıarlaýǵa, ekonomıkanyń ártúrli salasyn qaıta qurýǵa qosqan úlesin de atap ketti.
Jalpy, semınarǵa qatysýshylar Qazaqstan Respýblıkasynyń BUU-men ózara qarym-qatynasy yrǵaqty túrde damyp kele jatqandyǵyn atap kórsetti. Máselen, Qazaqstan 2013-2015 jyldar aralyǵynda BUU-nyń Adam quqyqtary jónindegi keńesiniń múshesi bolyp tabylady.
Qoryta aıtqanda, Qazaqstan BUU-nyń elimizdiń damýyna qosqan úlesin, ásirese, táýelsizdikti jańadan alǵan jyldardaǵy qoldaýyn joǵary baǵalaıdy. Ekologııalyq zardapty sanalatyn Semeı jáne Aral óńirlerin áleýmettik-ekonomıkalyq ońaltýǵa, halyq densaýlyǵyna, bala quqyǵyna, genderlik teńdikke baılanysty máselelerdi sheshýdegi járdeminiń mańyzy zor.
Asqar TURAPBAIULY,
«Egemen Qazaqstan».
--------------------------------
Sýretti túsirgen
Erlan OMAROV.
