Keshe Astanada ótken Ortalyq Azııa aımaqtyq ekonomıkalyq yntymaqtastyq baǵdarlamasynyń 12-shi mınıstrler konferensııasyna Qazaqstan Premer-Mınıstri Serik Ahmetov qatysty.
Keshe Astanada ótken Ortalyq Azııa aımaqtyq ekonomıkalyq yntymaqtastyq baǵdarlamasynyń 12-shi mınıstrler konferensııasyna Qazaqstan Premer-Mınıstri Serik Ahmetov qatysty.
Jyl saıynǵy mundaı mınıstrler konferensııasy Ortalyq Azııa aımaqtyq ekonomıkalyq yntymaqtastyǵynyń saıasaty men onyń baǵdarlamasynyń strategııalyq baǵyttaryn aıqyndaıdy. Al baǵdarlama jalpy ınfraqurylymdar boıynsha aımaqtyq jobalardy qarjylandyrýǵa, aralyq qyzmetti damytýdyń negizgi mindetterin sheshýge arnalǵan.
Negizinen Ortalyq Azııaaımaqtyq ekonomıkalyq yntymaqtastyǵy baǵdarlamasy Ázerbaıjan, Aýǵanstan, Qazaqstan, Qytaı, Qyrǵyzstan, Mońǵolııa, Tájikstan, О́zbekstan, Túrkimenstan, Pákstan sııaqty 10 memlekettiń jáne Azııa Damý banki, Eýropa Qaıta qurý jáne damý banki, Dúnıejúzilik bank, Halyqaralyq valıýta qory, Islam damý banki, BUU Damý baǵdarlamasy sııaqty 6 kópjaqty ınstıtýttardyń áriptestigi bolyp tabylady. Al atalmysh baǵdarlamaǵa bıyl bizdiń el tóraǵalyq etip otyr.
Osyndaı bedeldi uıymnyń Astanada ótken alqaly jıynyna Qazaqstan Úkimetiniń basshysy S.Ahmetov arnaıy qatysyp, ashylýynda sóz sóıledi.
Sózin forýmǵa qatysýshylarǵa arnaǵan Úkimet basshysy strategııa men saýda, saýda-sattyq saıasaty jáne energetıka salasyndaǵy túıindi tustardy sheshý joldaryna baǵyttalǵan Ortalyq Azııa aımaqtyq ekonomıkalyq yntymaqtastyǵy baǵdarlamasynyń mańyzdylyǵyna toqtaldy. Sondaı-aq, ol Qazaqstannyń Ortalyq Azııa óńirindegi ekonomıkasy qarqyndy túrde damyp kele jatqan elderdiń biri ekendigin atap ótti.
Álemdik ekonomıkadaǵy jáne syrtqy jaǵdaılardaǵy qolaısyzdyqqa qaramastan, bıylǵy jyly Qazaqstan ekonomıkasynyń aıtarlyqtaı turaqty ósimi baıqalyp otyrǵandyǵyna toqtalǵan S.Ahmetov, aǵymdaǵy jyldyń 9 aıynda Qazaqstannyń ishki jalpy ónimi 5,7 paıyzǵa óskenin tilge tıek etti.
Memlekettiń halyqaralyq rezervteri 90 mlrd. AQSh dollarynan asyp tústi. Biz qolaıly ınvestısııalyq jaǵdaıdy qurý úshin barlyq kúsh-jigerdi salyp otyrmyz, dedi Úkimet basshysy.
Osy oraıda Premer-Mınıstr sońǵy jeti jylda Qazaqstan ekonomıkasyna 155 mlrd. dollardan astam sheteldik tikeleı ınvestısııalar tartylǵandyǵyn aıtyp ótti. Sonymen qatar, S.Ahmetov Qazaqstannyń Ortalyq Azııa aımaqtyq ekonomıkalyq yntymaqtastyǵy baǵdarlamasyna qatysýshy retinde ıntegrasııanyń qajettiligine kóz jetkizgenin, sondyqtan taýarlar, qyzmetter jáne jumys kúshteriniń erkin qımylyn qamtamasyz etý qaǵıdalaryna negizdelgen Birtutas ekonomıkalyq keńistikti qalyptastyrý úrdisine belsendi túrde qatysatynyn atap kórsetti.
Qazaqstan Keden odaǵy men Birtutas ekonomıkalyq keńistikke múshe eldermen birlesip, basqa elderdegi saýda áriptesterimen yntymaqtastyqty keńeıtýge, ózara ınvestısııalar kólemin ulǵaıtý jáne BEK ortaq rynogynda qalyptasqan áleýetti paıdalanýǵa múddeli, dedi S.Ahmetov.
Premer-Mınıstr sondaı-aq, Ortalyq Azııa aımaqtyq ekonomıkalyq yntymaqtastyǵy hatshylyǵy – Azııa Damý bankiniń Qazaqstan ekonomıkasyn jańǵyrtýdaǵy aıryqsha rólin joǵary baǵalady.
Azııa Damý banki Qazaqstanda jumysyn bastaǵannan beri ekonomıkamyzǵa 2 mlrd.-tan astam AQSh dollary kóleminde qarjy quıdy. Bizdiń áriptestigimizdiń aıasyndaǵy «Batys Eýropa–Batys Qytaı» syndy keń aýqymdy jobany aıryqsha atap ótýge bolady. Bul halyqaralyq tranzıttik dáliz Ortalyq Azııa aımaǵyndaǵy negizgi júk tasymaly marshrýty bolady, dedi ol.
Premer-Mınıstrdiń aıtýynsha, qazirgi tańda Qazaqstan men Azııa Damý banki yntymaqtastyǵy jańa deńgeıge kóterilýde. Bir aıta keterligi, Qazaqstan qaıtarymsyz tehnıkalyq kómek alýshydan búginde damýshy elderge kómek kórsetý boıynsha Azııa Damý bankine áriptes mártebesine kóshýdi josparlap otyr.
S.Ahmetov sóziniń qorytyndysynda Ortalyq Azııa aımaqtyq ekonomıkalyq yntymaqtastyǵy baǵdarlamasy 12-shi mınıstrler konferensııasy Azııa Damý bankiniń rólin arttyrýǵa, halyqaralyq qarjy ınstıtýttaryn nyǵaıtýǵa jáne Ortalyq Azııa aımaqtyq ekonomıkalyq yntymaqtastyǵyn damytýǵa laıyqty úles qosatynyna senim bildirdi.
Dınara BITIKOVA,
«Egemen Qazaqstan».
